Fieste a Vissandon!

La nestre e je une piçule proloco nassude di pôc, ma cuant che si trate di fâ fieste nissun si tire indaûr!! Us spietin numerôs in place a Vissandon vinars, sabide e domenie cun grups dal vîf, chioscos e robe buine di mangjâ!! Me mi cjatarês a spinâ bire! =)

A dute culture!!

A Branc di Tavagnà dai 16 ai 25 di Mai si davuelzarà la seste edizion de manifestazion culturâl dal titul “A dute culture…Langobarts, toponomastiche, archeologjie, libris e rapuarts culturâi cun Weisskirchen”, event organizât dal Assessorât ae culture dal Comun di Tavagnà, de Societât Furlane di Archeologjie e de Societât Filologjiche Furlane. A saran presentâts un grum di events e interessantis cunvignis, un apontament di no pierdi pardabon! =)

Setemane aquileiese

Dai 15 ai 17 di Mai si davuelç la XXXIX setemane di studiis aquileiês sul teme: “Aspiets e problemis de romanizazion – Venetia, Histria e arc alpin orientâl”. La cunvigne e je organizade dal Centri di Antichitâts Altadriatichis in colaborazion cul Dipartiment di Siencis de Antichitât e cu la Scuele di Specializazion in Archeologjie de Universitât dai Studiis di Triest e e fasarà il pont su lis ultimis scuviertis des primis fasis de presince romane dai teritoris dal alt Adriatic. Ve chì il link cul program da lis zornadis.

I sîts protostorics in Friûl

E je tacade vuê une biele cunvigne su la preistorie furlane. A Vile Manin e a Udin par 3 dîs la Universitât dal Friûl e fevelarà di un periodi de nestre storie une vore pôc cognossût, ma che al merte pardabon di jessi aprofondît.
Tal prin coment us met dut il comunicât.

Te foto il sgjâf de Universitât dal Friûl tal cjastelîr di Grediscje di Sedean

1000!

A pôc plui di doi mês de screade di chest blog o soi rivade a 1000 contats!! Grazie a ducj chei che a son passats par chi! Maman! =)

L'om preistoric in Friûl

Prins abitants in Friûl: ultimis scuviertis

Dott. Andrea Pessina

Codroip, 9 di Mai 2008

I prins pas dal om tai nestris teritoris a son avignûts tal Paleolitic Inferiôr, o ben tor i 450.000 agns indaûr. La prime robe di tignî a mens e je che l’om moderni al è rivât in Europe traviers la penisule balcaniche e che duncje la nestre regjon e je stade un pont di pasaç viers chê taliane; al è partant inevitabil rinvignî olmis di chês popolazions che si spostavin ben planc cirint puescj simpri gnûfs e di ben stâ. Il sît plui impuartant che o vin in regjon dilunc chest periodi di glaciazions (di fat e jere a pene finide la glaciazion Wörm) al è chel di Visogliano, dongje Triest, che al à tornât rescj umans dal om di Hildelberg (in particolâr cualchi dint e une mandibule); si tratin dai rescj plui antics in Italie. Chest ripâr al testemonee ancje une impuartante industrie litiche, durade almancul 100.000 agns. Ma chest al è ancje il periodi dal om di Neanderthal (caraterizât soredut da l’ûs di sepolturis, duncje cu la presince di une cualchi forme di religjositât); in Trentin e in Venit al è testemoneât fint a 1.300 metris di cuote. Chi in Friûl lis sôs olmis a son miôr documentadis in grotis o ripârs come intal Cjars: inte Grotta Pocala, indagade za tai agns Trente, a Divje Babe (Slovenie) dulà che a son stâts cjatâts femurs cun busis, forsit doprâts a mût di flaut,o ancjemò a Krapina (Croazie) dulà che il Neanderthal al praticave la scuoiadure di animâi. Ma il sît forsit plui impuartant e je la Caverne dai Ors a San Dorligo della Valle, che par milenis e je restade sigjilade di une frane: chest al à permetût di conservâ numerôs rescj di ors des cavernis, animâl considerât une vore impuartant in chê ete e chi forsit al vignive praticât une sorte di cult dal ors. In Venit impuartant al è il sît di Fumane, cun rescj ben conservâts e cun cetancj claps piturâts; intun adiriture si rive a cognossi une figure umane cuntun cjapiel (forsit la imagjine di un siaman). Par tornâ in Friûl e ai sîts dal Paleolitic Inferiôr vegnin segnalâts ancje chel di Busa della Villotta a Plan dal Cjaval, chel di Biarç (Vals dal Nadison) dulà che si son ben conservadis lis faunis che comprendin un grum di rescj di pes, inte zone colinâr, dongje il lâc di Ruvigne e ancje inte Basse dongje Muçane. Sui monts o cjatin sît di cjaçadôrs comprendûts tra i 8000 e i 5000 agns indaûr come inte conche di Sauris, Casera Festòns, Casera Jeluz, Pramuel; in chescj puescj a rivavin probabilmentri grups de Austrie, stant che l’aces di chê bande al jere plui agjil, e che a bivacavin culì par dopo tornâ a partî pe cjaçe viers zonis cun clime plui bon.

Apontaments

Us segnali un doi interessants apontaments che si tignaran a Codroip inte Sale Consiliâr (in plaçe Garibaldi 81).
Ai 9 di Mai aes 20.45 incuintri cul dr. Andrea Pessina sul teme “Prins abitants in Friûl: gnovis scuviertis”.
Ai 16 di Mai, simpri aes 20.45, incuintri cul dr. Ludovico Rebaudo (gno prof. di archeologjie classiche!) sul teme: “Evoluzion de art de sculture in ete classiche in Friûl”.

Ce pôre!

Vuê o ai consegnât il modul par la amission al apel di lauree dal mês di Lui…cumò no si torne plui indaûr! =)

I cjastiei furlans/2

O continui cun la rassegne dai cjastiei furlans: us vevi fevelât di chel di Atimis superiôr, vuê o viodin chel inferiôr. Datât ae metât dal XIII secul, nol ufrìs ancjemò la pussibilitât di visitâlu parce che no je mai stade inviade une campagne di recupar. Di fat, la struture e je pericolant, son restâts dome pôs rudars e une tor parzialmentri demolide. Par chel che al rivuarde i materiai e je stade fate dome une ricercje superficiâl dal teren e la uniche robe rilevant vignude fûr al è stât un toc di ceramiche grêse cun motîfs decoratîfs tipics de basse Ete di Mieç. Il fat che duncje a sedin doi cjastiei a Atimis al po derivâ dal fat che a fossin stadis das divisions tra i nobii di Attems, o forsit par vê un atri pont strategjic.

Lis marmotis dal Clusantin

Sul gnûf numar di Archeologia Viva al è un biel articul suntun ritrovament preistoric inte grote dal Clusantin, intes Prealps Cjargnelis. Si trate di un sît dal periodi Epigravetian (tra i 20000 e i 11000 agns indaûr) cun numerôs rescj di selci schegjadis (plui di 2500 tocs), utilis par spelâ e par netâ lis piels da lis besteutis; ma ce che al à colpît di plui al è stât il ritrovament di un grant numar di carcassis di marmotis, che al à fat pensâ che chest al fos propit un sît dulà che si lavoravin in particolâr chestis bestiis. Il sgjâf al è stât puartât indevant tal 2005 dal Laboratori di Ricercje archeologjiche da la Universitât di Ferrara e al à ricuardât trop impuartante che e je la archeozoologjie tal studi dai sîts preistorics; di fat tal articul a vegnin ben spiegadis lis tecnichis di macelazion e di lavorazion des besteutis. =(

L'ugiat

Vuê us presenti il gno tatuaç, che nol podeve che jessi in teme cul Antîc Egjit, une storie che mi à simpri inmagât cui siei misteris e lis meraveis che nus à lassât. Chest al è l’ugiat, miôr cognossût come “voli di Horus”: al rapresente apont il voli dal diu falcuç Horus. La mitologjie e conte che Horus al jere fi di Iside e Osiride, divinitâts egjiziis. Ma Osiride al vignì copât dal fradi gjelôs Seth, che lu taià a tocs e lu sparniçà ator par dut l’Egjit. La femine Iside, iudade di sô sûr Nefti, dal diu Anubi e dal diu Thot, e cjatà i tocs e insieme lu imbalsamarin. Daspò Iside lu ripuartà in vite e chest al deventà diu de muart e dal aldilà. Ma Horus, cuant che al deventà grant, al frontà Seth in bataie par svindicâ la muart dal pari Osiride; il combatiment al fo lunc e cruent dulà che Horus al pierdè un voli. A la fin chei atris dius i u fermarin e a derin a Horus la sovranitât dal Egjit, invezit Seth al vignì slontanât dal paîs. Cussì inte liende il voli dal diu Horus al è deventât simbul di salût e protezion magjiche.

Gjite a Vignesie

Vuê o ai aprofitât de bielissime zornade par lâ a fâ un biel zîr a Vignesie cun lis mês amiis Barbara e Francesca! Partence cul tren di Udin e, une volte rivadis, cjaminade che no finive plui fint a Rialt e Sant Marc! Tante int, sorelon (mi soi ancje scotade l’agâr!) e doi pîts come dôs fertaiis!
O vin viodût tancj negoziis cun presits di no crodi ma tal Disney Store o ai scugnût jentrâ! E li o ai fat il gno bielissim acuist! *_*
A part la strache une biele zornade pardabon! =)

Cjastiei vierts!

Domenie ai 20 di Avrîl il Consorzi pe Salvaguardie dai Cjastiei Storics dal Friûl Vignesie Julie al organize la zornade dai cjastiei vierts in dute la Regjon, in particolâr mût chei che vie pal an no son visitabii. Pal cost di 5 euros o podarês visitâ bielecis come il cjastiel di Vilalte, di Cordovât, Mugle e v.i. Une ocasion di no pierdi! =)

L'om di Similaun

Vinars 18 aes 20.45 inte sale grande de Biblioteche Civiche di San Vît dal Tiliment si davuelzarà un incuintri culturâl dulà che a vignaran discutudis lis ultimis scuviertis sul om di Similaun. La mummie jo la ai viodude al museu di Bolzan e e à daûr di sé une storie une vore interessante: cjatade intal 1991 sul confin tra Italie e Austrie e à simpri coinvolt un grun di studiôs. E je stade datade a ben 5000 agns fa e si pense che il puaret al sedi muart in maniere violente par vie di une frece penetrade inta spale a çampe; cun di plui sul so cuarp a son stâts cjatât adiriture 57 tatuagjos! Al jere za di mode!! =)

Spider pork, spider pig [ITA] versione completa

Un regâl par un amì =)

I cjastiei furlans/1

Dopo la mê visite a la mostre in cjastiel a Udin, dulà che si fevelave dal sît archeologjic di Atimis, o ai pensât di fâ une sorte di rassegne sui cjastiei che o vin in regjon. Un biel mût par riscuvierzi puescj une vore biei e plens di storie. Il teritori plui siôr di chescj rescj e je la zone pedemontane orientâl che e va di Cividât fint a Tarcint. Cussì o ai decidût di tacâ a presentâus il cjastiel di Atimis superiôr. Lis ricjercis archeologjichis a son scomençadis cui agns ’70 ma dal 1998 in ca la Societât Archelogjiche Furlane e sta continuant a studiâ chest sît che al è chel plui antîc tra i doi presints a Atimis. L’edifici al è di origjn todescje, di proprietât de famee Attems. La forme e je pentagonâl ma lis resintis ricjercis dai Civics Museus di Udin a àn rivelât la presince di rescj muraris plui antîcs che no si riferissin al asset di vuê.
I tancj reperts tirâts fûr a son conservâts a Udin ma si spere prest di puartâju al museu di Atimis.
Se o volês fâ une biele cjaminade o podês rivâ ancje a pît fint li dal cjastiel!

Tieris di incuintri

Joibe 17 aes 18.00 inte Cjase de Contadinance sul cjastiel di Udin al vignarà presentât dai profesôrs Mitja Guštin e Andrea Saccocci il volum “Tieris d’incuintri contats e scambis di lunc lis Vals dal Nadison e dal Lusinç da antichitât a la Ete di Mieç” a cure di Giorgio Banchig, Stefano Magnani e Andrea Pessina.

Il mus tal gnûf mileni

O soi propit contente di daus cheste notizie: sabide ai 12 di Avrîl das 16.45 aes 18.45 in tal cjastiel di Colorêt di Montalban e vignarà presentade la cunvigne "Il mus tal gnûf mileni. Partner intas ativitâts sociâls: onoterapie". A vignaràn presentadis lis ativitâts di riabilitazion e di recupero atuadis grazie a chest simpatic e bon animalut, da lis potenzialitâts une vore grandis trop inaspetadis. La cunvigne e je organizade da la Asociazion Amîs di Totò o.n.l.u.s. in colaborazion cun la Comunitât Colinâr dal Friûl e il Patrocini dal Comun di Buie e Maian.

A cene cui Etruscs!

Une simpatiche iniziative de tratorie "Al cercjeben" a Colorêt di Prât: vinars 11 aes 8 di sere e vignarâ proponude une cene cuntun menù a base di specialitâts etruschis! La cene e sarà compagnade da musichis in teme, ancelis in toghe e vin servût in anforis! Une cerce dal menù? Bruschete cun luanie e olivis neris, sope etrusche, lasagnis sul jeur, cinghiâl cun puâr e râf, "schiaccia" cun fîcs secs! Viodût cussì al sune stran, dut câs compliments pe fantasie! =)

Il blog dal Comitât 482

Il gno blog, come che o varês viodût, nol fevele dome di archeologjie. Duncje us met achì, ancje se cuntun pôc di ritart, il link dal gnûf blog dal Comitât 482: comitât nassût in Friûl tal 2002 par tutelâ lis comunitâts linguistichis e nazionâls de nestre regjon (furlane, slovene e gjermanofone). Par me e je une robe une vore impuartante, che e vâl la pene di sostignî!

Fieste de solidarietât a Vissandon

Vuê intal gno paîs, Vissandon, comun di Basilian, o vin fate la fieste pe soliarietât: o soi stade contente parce che no dome o vin judât la comunitât di Fraelà ma ancje parce che o ai fate une rimpatriade tal mieç de mê int, des mês lidrîs. Cussì o ai bevût un tai cui miei coscrits, po dopo un cui cusins, e ancje cui cognossints... insome, o podês capî cemût che e je lade a finî la zornade! Cence contâ che o ai fate ancje la foto cun Dario Zampa! =)
Un grazie a ducj i organizadôrs, a chei che si son dâts tant da fâ in cusine e daûr il chiosco e a ducj chei che a son vignûts a cjatânus, grazie, grazie, grazie!!

Tornade!

Finalmentri o soi rivade a meti a puest il pc! =) Puar, plen di virus e cuisà ce atri...ma cumò al stâ mior e o podi tornâ a tacâ a scrivi! Maman a ducj!

Rome e i Barbars a Vignesie

Us segnali une biele mostre in cors a Palaç Grassi di Vignesie, considerade l'event culturâl dal an: Rome e i Barbars. E je stade inaugurade ai 26 di Zenâr e e durarà fint ai 20 di Lui. In esposizion 1700 ogjets che a rivin di 24 Paîs diferents cun documents, reperts e pituris che a testemonein la formazion de Europe da la colade dal Imperi Roman fint a la vignude dai Barbars.

Aule multimediâl in museu

Îr sul gjornâl o ai let une biele notizie che rivuarde il museu di Cividât: e je stade screâde la aule multimediâl…cuissà se a mi leiaran ancja di là?! =)

Pro memoria

Us torni a ricuardâ l’apontament cun le storie di ‘Savean, che e metarâ in mostre, dai 28 di Març ai 28 di Jugn, dutis lis ultimis novitâts a riguart dai sgjâfs e dai studis efetuâts sul so teritori. Us met achì ancje il link di un biel articul vignût fûr su Archeomedia, dulà che al è dut ben spiegât.

Pascute di culture

Vuê o ai passât il lunis di Pascute in plene culture, sfrutant i biliets a presit ridot che i Museus de nestre regjon a fasevin. Alore o ai stât a Udin in Cjistiel a viodi cheste mostre "I Goti dall'oriente alle Alpi".
O ai vude cussì ocasion di cognossi un popul che al è passât ancje par chi, ma che i stes storics e archeolics no àn inmò cjatât tantis testemoneancis: di fat se te toponomastiche o vin olmis tai nons di Gôt (dongje Glemone) e Godie (dongje Udin), l'unic sît che al è stât sgjavât al è chel di Sant Zorç parsore Atimis. Te foto grande o viodês un cjâf di femine, deformât parcè che chel popul al veve la usance di fassâ il cjâf fint di cuant che a jerin piçui: e jere une maniere par diferenziâsi di chês altris popolazions, une maniere par caraterizâsi. Fûr de bilietarie dal cjistiel o ai cjatât "par câs" Christian che al veve a pene cjolt il biliet e cussì i ai fat di vuide! =)

Buine Pasche!

Auguris a ducj di une Pasche serene!

La antighe Qatna

Vuê us presenti un biel e impuartant progjet che e stâ puartant indevant la Universitât dal Friûl insiemit cun la Direzion Gjenerâl des Antighitâts e dai Museus di Sirie. La nestre, ancje se piçule, e je une universitât ben inviade e cun progjets di rilêf, come che al dimostre chest lavôr che al vâ indevant cun bogns risultâts za di cualchi an. La mission archeologjiche a Mishrifeh, antighe Qatna, e à l’obietîf di ricostruî la storie, l’implant urban e il disvilup dal sît intai diviers periodis de sô storie, in mût di realizâ un parc archeologjic fruibil al public. Dongje de archeologjie a colaborin un grum di dissiplinis scientifichis come la antropologjie, la archeozoologjie, la archeobotaniche, la palinologjie, la gjeo-chimiche e v.i.

E je rivade la Vierte!

Finalmentri o jentrìn te biele stagjon, dulà che lis zornadis a son plui lungjis, la temperadure si alce e al è un plasê stâ di fûr, fâ cualchi cjaminade pe campagne o cualchi corse in biciclete! Vêso mai stât a fâ un zirut pe ipovie che e passe di lunc dal Cormôr? O podês partî dal parc dongje il stadio e lâ su fint a Buie! Jo une dì le ai fate dute, e crodêtmi, e vâl propite la pene!

Art a cost di ce??

Vuê o resti sciocade di une notizie che e zire sul web: il “pseudoartist” Guillermo Habacuc Vargas dal Costa Rica al varès metût intune galarie di un museu un cjan vagabont, peât intun cjanton de sale e lassât murî di fam e di sêt! Dut chest par sensibilizâ la opinion publiche sul probleme dal abandon dai cjans intal so paîs. Cun di plui al à vût il coragjo di clamâle opare di art! Centenârs di miârs di personis di dut il mont si son rivoltadis cuintri chest at disuman che secont me nol cjate definizion. Intun blog come chest, dulà che si propon e si publicize la art in ogni sô forme, no podevi no trasmeti chest messaç di indignazion e di rabie par chê che sta deventant “art a ducj i coscj”. Lei la notizie.

La archeologjie

Par lâ indenant o vin di capî cui che o sin e di dulà che o vignìn: cheste e je la archeologjie.
(Piero Pruneti, diretôr de riviste “Archeologia Viva”)

Lis presincis langobardis in Italie

Al Prin e ai 2 di Març a Udin e Cividât si è tignude une cunvigne nazionâl dal titul: "Lis presincis langobardis intes Regjons di Italie”.
Chest incuintri al fâs part dal “Progjet Langobarts” inviât de Federazion Taliane da lis Associazions Archeologjichis par metî in evidence lis realtâts plui piçulis intal periodi in cuistion, midiant da lis testimoneancis architetonichis, documentariis, iconografichis, religjosis, toponomastichis, e v. i. leadis a la storie dai singui lûcs e rivadis fint a vuè.
In fin a son stadis definidis lis prossimis tapis dal progjet, che a vignaran discutudis intun secont incuintri tal Novembar dal 2009 a Paestum (Sa), cun chescj temis:
- i cunfins e i sistemis difensîfs dai ducâts langobarts sul teritori nazionâl
- lis feminis dai Langobarts
- la toponomastiche riferintsi al periodi langobart.
La iniziative di Udin e Cividât e varà un seguit in ocasion de seste “Cunvigne di Toponomastiche locâl” a Branc di Tavagnà ai 17 di Mai dal 2008.

Visite a la mostre de simie crote!

Vuê o soi stade a viodi la mostre de simie crote in te glesie di Sant Francesc a Udin, come che us vevi segnalât chê altre dì.
E o scuen dîus che e je propite biele!!
Oltri che a vê tant materiâl di viodi e je ancje multimediâl e interative!
Jo e Christian (chi te foto cun me!) o vin provât i tancj esperiments che a jerin a disposizion: par esempli o vin fat la simulazion dal guant cence poleâr in maniere di provâ cemût che e funzionarès la man cence il dêt oponibil. Po dopo o vin provade une machine che e elaborave lis nestris musis e nus à fat viodi une simulazion che e invecjave i nestris caratars somatics: e cussì si sin viodûts come che o sarìn ca di 50 agns! Dut di ridi! Pardabon une visite di fâ!

Apontaments

Vierzidure straordenarie de tor medievâl di Puarte Vilalte a Udin in ocasion de setemane de culture. O podarês visitâle dai 25 ai 29 di Març, da lis 15.00 a lis 19.00. Us ricuardi che la tor e je la sede principâl de Societât Archeologjiche Furlane.