lunedì 29 dicembre 2008

Tierce (e ultime) part de interviste

Finalmentri us pues meti la part conclusive de interviste che mi àn fat chei di Teleudine!
Par viodimi e scoltâmi: fracait chi! =)

domenica 28 dicembre 2008

Bens culturâi: peraulis vueidis?

O ai ricevût il boletin de Societât Archeologjiche Furlane, che e à sede a Udin in Puarte Vilalte (te foto). Il notiziari si vierç cuntun biel articul di Gian Andrea Cescutti che al fevele dal significât dai Bens culturâi. Par lei l'articul, lait tal prin coment.

venerdì 26 dicembre 2008

Un consei pes fiestis

Stant chest clime di fieste us met cheste fantastiche tabele che o ai cjatât sul sît dai Fantats Furlans e che o vevi za viodût intun ristorant! A son gno pari e gno barbe inmò che a ridin come mats! Ma a part i scherçs, no stait a fâ i mones!

giovedì 25 dicembre 2008

Bon Nadâl

Oramai lu savês, une des mês passions a son i Simpson, in tancj dai miei posts a son stâts i protagoniscj, e duncje ancje par i miei auguris di un bon Nadâl us ai metude cheste foto che mi à fat murî di ridi! O speri che ancje par ducj voaltris al sedi un Nadâl plen di serenitât e sanis ridadis, che a 'nt vin tante dibisugne!! =)

martedì 23 dicembre 2008

Fondazion Aquilee

Vuê us segnali il sît de Fondazion Aquilee, par sedi simpri inzornâts su lis ativitât e lis oparis di valorizazion de citadine de basse furlane. Finalmentri si trate di alc di concret pe "nestre" archeologjie!

venerdì 19 dicembre 2008

Triest 1918

Us segnali une schirie di apontaments ator par Triest che a celebrin une des datis plui impuartantis dal secul passât; ve chì il link dal articul publicât su la riviste Archeologia Viva, che tal bimestri Zenâr-Fevrâr e presente une cuviertine di no pierdi!

martedì 16 dicembre 2008

çurviel di 2000 agns indaûr!

Beh, cuant che la ai lete, cheste notizie (leieit ancje chi) mi à propite lassade cence flât! Un çurviel cussì antîc e conservât nol jere mai stât cjatât; lis analisis a saràn une vore interessantis par discuvierzi finalmentri alc di plui concret sui nestris vons e su la lôr evoluzion!

Par Nadâl

Lu sai che al è inutil stâ chi a dî che il Nadâl aromai nol è plui chel di une volte, che si à piardût il vêr sens di cheste zornade, ma jo o ai voie di crodi che alc di bon in somp in somp al sedi ancjemò. Par chest us doi un piçul consei par fâ un biel regâl, cence metisi a cori pai centros comerciâi, cence comprâ dome monadis parcè che no si sa ce cjoli. Ma ancje par riscuvierzi ce che al rapresente realmentri il Nadâl par noaltris cristians e par diffondi une opare che e rapresente la nestre furlanetât. Jo lu ai ricevût di une persone tant cjare, e crodeitmi, savê di vê chest Libri, e cun di plui par furlan, mi à fat un plasê grandonon.

lunedì 15 dicembre 2008

Seconde part de interviste!


Ve cà la seconde part de interviste che mi àn fat chei di Teleudine (biele la barete eh! =))

domenica 14 dicembre 2008

Tal 2009 gnûf diretôr dal Museu di Udin

Maurizio Buora al è pront pe pension e tal 2009 al lassarà il puest di conservatôr dal Museu di Udin. Come che si lei su la Vita Cattolica di cheste setemane il prossin an al viodarà ancje la sostituzion dal diretôr dal Museu di Storie naturâl, Carlo Morandini.
Duncje un moment une vore delicât pes struturis museâls de Capitâl dal Friûl che e varà di frontâ un gambii no di pôc e forsit e je la volte buine che si nomenarà un gnûf diretôr.
Par lei dut l'articul, fracait su la foto.

sabato 13 dicembre 2008

Judaitlu!

Vuê matine leint il gjornâl no ai podût fâ di mancul di sintîmi mâl leint di chest cjanut: o soi simpri plui convinte che tante int no si meriti di jessi clamade "umane". Une persone cun umanitât no si sarès compuartade cussì... Jo, se o vès la pussibilitât di tignî une besteute lu varès za fat, ma par plasê, cui che al pues, che al fasi il pussibil par Miele. Clamait il numar di riferiment intal articul metût intal prin coment. Se cualchidun al sa cemût che e va a finî par plasê che mi dedi notizie.

mercoledì 10 dicembre 2008

Di gnûf a scuele

Ancje vuê o ai fate la mê jentrade "plateâl" in classe a Codroip, cuntune altre tierce, ma cheste volte intune scjate! Di gnûf casin, vuicadis e i fruts che a saltuçavin curiôs di savê ce che al jere dentri! Ma ancje chescj a àn induvinât subite che o jeri jo! Po dopo, si sin subit metûts a fevelâ di Rovul, e i fruts a jerin une vore contents di savê dut su di lui!
Inte foto la mestre Lorele, i fruts e...jo, dentri te scjate!

Su Telefriuli!

Ninine simpri plui televisive! Vuê o soi stade invidâde di Anna Casasola (che o aprofiti par ringraziâ) in te sô trasmission "Contile juste", in onde aes 18.40 su Telefriuli; in compagnie de mê amie e coleghe Francesca o sin ladis a fevelâ dal nestri progjetut di archeologjie pai fruts, in mût di dâsi un pocje di visibilitât! Sperin che nus puarti ben! Intant, buine vision! (o jeri emozionadone!) =)

martedì 9 dicembre 2008

Ninine a scuele!!!

Biel biel biel!!!
O soi masse contentone! Vuê o soi stade finalmentri a cjatâ i fruts di tierce de scuele primarie Candot di Codroip!

E je stade une esperience masse biele! O soi jentrade intun sac, lôr no savevin nuie, e la mestre Lorele i a fat induvinâ cui che al jere. Lôr a àn induvinât subit: "E jê Ninine, e jê Ninine!!
Po dopo si sin sentâts ducj in cercli e lôr a àn tacât a fâmi lis domandis su Rovul; ancje se no cjacarin ben par furlan si son sfuarçâts di leimi lis domandis par furlan, masse brâfs! Insiemit o vin ricostruît la vite e il ritrovament di Rovul, o vin discutût di ce che al mangjave e di dulà che al viveve, e lôr a son stâts bravonons!
Ae fin o vin fat un dôs fotos, che us metarai intal prossim post, e si sin saludâts cuntun biel "mandi!" =)

lunedì 8 dicembre 2008

Rispuestis su Rovul/3

6. Cuant isal nassût (nât)?
No cognossìn ben la date di nassite, o podìn dî che al è vivût cirche 4000 agns indaûr.

7. Trop timp aial vivût?
Rovul al è muart zovin, a pene 17 agns cirche.

8. Cemût isal Rovul?
Rovul al è stât cjatât in posizion distirade, cu lis mans pojadis su lis gjambis. I soi vues a son un tic consumâts, ma dopo tancj agns al è normâl!

9. Cui lu aial sapulît ?
Probabilmentri lu àn sapulît i abitants dal vilaç dulà che al viveve Rovul.

10. Come avete fatto a scoprire che aveva 4.000 anni?
Chest si lu à capît dai vues e dai materiâi cjatâts dongje Rovul. A son ciertis analisis un pôc complicadis che si fasin cun dai machinaris e che a permetin di capî trop vecjo che al è un ogjet.

11. Avete trovato altre cose di Rovul?
Dongje di Rovul a son stâts cjatâts altris ogjets, tra cui une ponte di frece. Chest al fâs pensâ che Rovul al fos ancje un vuerîr.

12. Ce mangjavial? Ce samencis mangjavial?
Rovul al veve une diete basade su cereâi, in particolâr farinis no masanadis tant finis, di fat i soi dincj a jerin une vore consumâts.

13. Ce bevevial?
Ce che al bevès Rovul oltri da la aghe no lu sai!

14. Ce fasevial?
Se Rovul al à vude une tombe cussì grande al vûl dî che lui al jere un personaç impuartant inte sô societât, probabilmentri il paron o un fuart vuerîr, o ancje chel e chel.

15. In ce museu lu vêso metût?
Par cumò Rovul al è ancjemò intal laboratori de universitât a Udin, che al spiete di sedi metût in cualchi impuartant museu par podê sedi viodût di ducj!

domenica 7 dicembre 2008

Rispuestis su Rovul/2

O continui a publicâ lis domandis che mi àn fat i frutins di Codroip!

1.Parcè isal stât batiât Rovul?

Parcè che intal comun di Merêt tancj di lôr si clamin di cognon Della Rovere e duncje lu àn clamât cussì parcè che il non Rovul al ricuarde chest cognon.
2.Mancjavino vues a Rovul? Lu vêso cjatât dut intîr (intero)?
L'antropolic che lu à scavât al à dite che il scheletri al jere in buinissimis condizions, e che ducj i vues a jerin ancjemò al lôr puest.
3.Jerial stât voluçât?
Sì, Rovul al jere stât voluçât cuntun linçûl. Chest al à permetût che i vues a restassin ben strents e inte lôr posizion origjinarie.
4.Cuant isal stât sapulît il muart?
Plui o mancul 4000 agns indaûr.
5.Dulà aial vivût? Dulà jerial a sta Rovul (dove abitava)?
Rovul probabilmentri al viveve inte campagne ator di Merêt, intune capane come che si usave in chê volte.

sabato 6 dicembre 2008

Gnove interviste!

Biele sorprese mi àn fat chei di Teleudine, clamantmi par une interviste dulà che o feveli dal gno blog! Ve chì il link par viodi la prime part! O aprofiti par ringraziâ Martina e Natascha, mandi frutis! =)

giovedì 4 dicembre 2008

Doman i Krampus!

Aromai a son une tradizion che si ripet ogni an, cun simpri plui int che a côr a viodi chest bielissim spetacul! O feveli dai Krampus, chescj teribii mostris che a vegni jù des monts e a corin daûr a la int par fâje pôre, dant (par fente!) legnadis e pocadis! Doman a Tarvis des 17 sot sere podarês assisti al spetacul; par saventin di plui, sedi su la tradizion sedi sui oraris e la strade, lait a viodi chest sît!

mercoledì 3 dicembre 2008

Lezions par inglês

Daûr de propueste dal gno prof. di Storie dal Vicin Orient, Mario Fales, o vin fat lezion di lenghe acadiche par...inglês! Biele idee pardabon, fate buine ancje de Preside di Facoltât! Al inizi o jerin un tic splaçâts, no sin abituâts al bilinghisim (ogni riferiment al furlan al è puramentri casuâl...) ma dopo o vin ingranât! Insome ae fin o fasarìn dut il modul par inglês! Vualtris ce pensaiso?

domenica 30 novembre 2008

Rispuestis su Rovul

Ve chì lis primis rispuestis su Rovul che mi àn domandât i fruts de scuele primarie Candot di Codroip, buine leture!

  1. Dulà isal stât cjatât? Al è stât cjatât sot dal tumul di tiere clamât “tumbare” a Merêt di Tombe.
  2. Cuant isal stât cjatât? Al è stât cjatât Martars ai 22 di Lui dal 2008. Il sgjâf al al fo tacât intal 2006.
  3. Parcè sêso lâts a sgjavâ li? I archeolics a son lâts a sgjavâ li parcè che e jere une montagnute che e sameave une tumbare.
  4. Trop sêso stâts a sgjavâ? Cheste Istât a son stâts 3 setemanis.
  5. Cemût isal stât cjatât? Viers il centri i archeolics a àn notât une diference inte consistence dal teren; cussì a son lâts plui in profonditât, tirant fûr une fuesse che e sprofondave par diviers centimetris. Rivâts a cirche 80 cm sot, ve ca la scuvierte: planc planc a àn tacât a vignî fûr i rescj di un scheletri.
  6. Cun ce âstu sgjavât? Prin di dut cun pale e picon, po dopo, individuât Rovul, cun calme doprant cjaçutis e pineluts.
  7. Cemût jerie la sô tombe? Trop jerie lungje? Parsore de sepulture vere e proprie al jere un côl fat di claps; parsore ancjemò a jerin strâts di tiere, savalon e argjilis, rivant a une altece di cirche 6 metris par un diametri di 25.
  8. Cemût isal muart? Si pense che Rovul al sedi muart di cualchi malatie, stant che al jere zovin.
  9. Jerial om o femine? Cemût si fasie a capî? Al jere un om. Chest si pues capîlu dai vues, soredut di chei dal bacin.
  10. Jerial un frut? Al jere un zovin tra i 17 e i 18 agns.



Doprait i cursôrs in alt a çampe te cjartute o fracait chi par viodi la mape plui in grant

O speri che cussì us vadi ben, se al è altri alc domandâimi! =)

venerdì 28 novembre 2008

I struments dal archeolic/1

Vuê o ai voie di mostrâ, soredut ai fruts che mi seguissin, i struments che a doprin i archeolics, chei che ur permetin di "sfueâ" il teren par meti in lûs i reperts. Si partìs cu lis manieris pesantis, duncje cun pale e picon, sfatant l'ideâl che l'archeolic al lavori dome cul pinelut!


Ve chi:



Po dopo, cuant che si pense di sedi rivâts intal pont just, si tache a gratâ vie il strat che al cuvierç i reperts, duncje o doprìn le cjaçute (clamade ancje trowel), lis paletutis e, se o cjatìn ogjets delicâts, come vues o ceramichis, o tirìn fûr ancje i pineluts! Eco:




Insome, fâ l'archeolic nol è mica un lavôr cussì facil e lizêr! =)

mercoledì 26 novembre 2008

La Mariutine

Juste par fâus tirâ un pêl la gole us anticipi une robe: jo e la mê amie Francesca, archeolighe ancje jê, o vin creât un progjetut par un laboratori di archeologjie di proponi ai fruts, e juste vuê o vin stât in tipografie pai volantins! Ca di cualchi zornade us fasarai viodi la nestre "creazion"!...ah, si domandarês il parcè di chest titul tal post...ancje cheste e je une sorprese! =)

martedì 25 novembre 2008

Vonde violence

Vuê e je la zornade internazionâl cuintri la violence su lis feminis. Di peraulis a'nd è stadis scritis tantis, o lassi stâ lis frasis fatis e ripetitivis, cussì o dedicarai un pôc dal gno timp par rifleti su cheste plaie, che crodêtmi, no je tant distante di cjase nestre...

sabato 22 novembre 2008

Il leon di Lion!

Al è tornât in Patrie il leon cjatât intun museu di Lion, che par un passaç di mans al jere finît fint la jù ma che al ven dal cjistiel di Spilimberc! O ringrazii Daniele par cheste segnalazion dal Gazetin.

giovedì 20 novembre 2008

Il bacin dal Erectus


Une des mês plui grandis passions di simpri e je la storie evolutive dal om, il studi dai nestris antenâts, ancje di chei vecjonons. Cussì mi è parût interessant publicaus cheste gnove su une des ultimis scuviertis paleoantropologjichis sui rescj di un ominide scuviert in Kenya, a cure de Indiana University di Bloomington. Buine leture! =)

mercoledì 19 novembre 2008

Buine gnove sul furlan


Une biele notizie (finalmentri) par il nestri "bon furlan"! Leieit l'articul dal Messagjero di vuê =)

Valorizzazione del friulano.
Dopo aver istituito, grazie ai fondi della legge regionale 482 sulle lingue minoritarie, l'Ufficio di coordinamento per la valorizzazione del friulano, la giunta ha approvato il Piano comunale di promozione e valorizzazione della lingua friulana. L'ufficio deputato alla "marilenghe", che sarà composto da tre professionisti esterni, lavorerà su molteplici iniziative. Ogni settimana sarà realizzata una puntata da mandare in onda su emittenti locali. Il focus della trasmissione si concentrerà sull'attività dell'amministrazione, anche sugli eventi e le attrazioni culturali. È in progetto, inoltre, un accordo con la sede regionale della Rai per la messa in onda di una serie di documentari dedicati alla presentazione tematica della città rigorosamente in friulano. Il piano prevede infatti la realizzazione di sei documentari da 15 minuti ciascuno per presentare la città vista dai bambini, dagli anziani, dagli sportivi, dai turisti, dagli immigrati e dai pendolari. L'ufficio di coordinamento si occuperà inoltre di elaborare i messaggi da destinare ai manifesti, agli striscioni stradali e ai display della città. Il piano, che prevede iniziative anche in occasione dei grandi eventi, avrà un occhio di riguardo per le nuove tecnologie. Le puntate del notiziario saranno caricate su una piattaforma informatica (sito del Comune, sito dedicato, YouTube, MySpace). È in progetto, inoltre, la realizzazione di una rete virtuale con le comunità friulane all'estero, per fornire a tutti i friulani nel mondo notizie e informazioni sul mondo culturale, economico e sportivo udinese.

Grazie!


Grazie a ducj! =)

martedì 18 novembre 2008

La plêf di Cesclans

O ringrazi Marino par vêmi segnalât chest articul sul riscat de plêf di Cesclans, par opare di pre Pieri, plevan di Cjavaç e Damâr. Chest puest lu vevi cognossût grazie a gno pari e al merte pardabon une visite.Finalmentri une biele notizie di valorizzazion e recupar dal nestri patrimoni!

domenica 16 novembre 2008

Visitìn Rome!

Us segnali chest biel link par une visite virtuâl di Rome, cun dutis lis sôs meraveis storichis! Bon viaç! =)

giovedì 13 novembre 2008

E vie lor, i rescj romans!

Incredibil... la notizie di ir sul Gazzetin mi à lassade cence peraulis... A Barbean di Spilimberc al jere vignût in lûs un sit (no ben specificât) in localitât Magredi, dulà che une ruspe di une ditte di spierament e à alegramentri crevât vie dut!! Leieit a chi!
Ma jo o dis: no ise ore di finile di scancelâ il nestri passât e dopo vigni a dinus che nol è lavor par noaltris archeolics?

mercoledì 12 novembre 2008

Mostre a Beglian su la Grande Vuere

La Societât Archeologjiche Furlane nus vise che dai 22 di Novembar ai 8 di Dicembar a Beglian di San Ganzian, lì dal Palaç Marchesi de Fabris, e je alestide une mostre su la Grande Vuere che tant e à segnât la nestre tiere e la nestre int. Il palaç, distrut dai bombardaments intal 1915, al fo ricostruit e adibit a ospedâl militâr par dut il periodi de vuere, deventant cussì testemoneance di tante soference e muart.
Par plui detais fracait a chì.

lunedì 10 novembre 2008

Apontaments cu la SFA

Us segnali altris apontaments a cure de Societât Furlane di Archeologjie:

- Joibe ai 20 di Novembar aes 18.00 lì de Cjase de Contadinance in cjistiel a Udin presentazion dal volum su la "Vile rustiche di Roncjis di Monfalcon" in colaborazion cu la Sovrintendince ai Bens Archeologjics dal FVG e il comun di Roncjis.
- Joibe ai 27 di Novembar, simpri in cjistiel, presentazion dal tierç volum dal "Catalic dai veris vieris dal Museu di Acuilee".
- A Codroip, lì de biblioteche aes 20.30, cicli di videoproiezions dal titul "Alte Ete di Mieç. Une ete di decadence?"
- vinars 14 Novembar "I Langobarts in Friûl";
- vinars 21 Novembar " Prin Cristianesim in Friûl: Acuilee";
- vinars 28 Novembar "Presentazion sgjâfs archeologjics 2008".

sabato 8 novembre 2008

COMPLEAN!

Vuê o fâs i agns! Ma no us conti trops...!! Tant o soi dongje di come che o jeri inte foto! =)

giovedì 6 novembre 2008

Pes classis tiercis de scuele primarie Candot di Codroip

Cun grant plasè us dis che il gno blog al è rivât ancje intes scuelis, e in particolâr te scuele primarie Candot di Codroip. Grazie a la mestre Lorele, che o vin imparât a cognossi grazie al so blog, i fruts des tiercis a son stâts inviâts al studi de informatiche e de archeologjie...par furlan! Un bielissim progjet, che la mestre mi à mostrât, e che al sburte i fruts a doprâ lis gnoviis tecnologjiis in maniere corete e formative, cence dismenteâ chê marce in plui che a àn i nestris fruts: la comunicazion fint de infancie cun dos lenghis! O sai che lor cumò a son interessâts al "nestri" von Rovul, e alore ur met cualchi foto cussì a imparin a cognossilu mior! Mandi fruts e mandi Lorele, o speri di viodius prest! =)
Par cualchi notizie in plui fracait a chì
, chì e chì!

Inte foto: Rovul al moment de scuvierte.

lunedì 3 novembre 2008

Cromazio di Aquilee

Dai 6 di Novembar ai 8 di Març a Udin, lì dal Palaç Patriarcâl si davuelzarà la mostre " Cromazio di Aquilee", su la epoche di spacadure che à ponudis lis basis pe storie europeane che o vivin ancje vuê, cuntun protagonist impuartant de storie de glesie acuileiese, il vescul Cromazio. Si trate di un percors, curât di Sandri Piussi, caraterizât di modalitâts espositivis difarentis cun oparis che a vegnin di museis locai, nazionai e internazionai, cun filmâts e ricostruzions virtualis dai edificis cristians e di Aquilee. A la inaugurazion a saran presints ancje il president de Regjon Tondo, chel de province Forlanini, il sindic Honsell, l'arcivescul di Udin Brollo e chel di Gurize De Antoni. Ma par saventin di plui viodeit a chi.

domenica 2 novembre 2008

La biblioteche di Puçui

Vuê a pagjine 10 dal Messaggero e je in evidence la biblioteche di Puçui cun gnovis ativitâts pai fruts; leturis di storiis e laboratori di tecnichis di dissen e autoritrat. Cun di plui ai 30 di Novembar aes 16.00 un spetacul teatrâl pai plui piçui de compagnie Ortoteatro cun titul: "Le peripezie di Arlecchino, nato affamato!" I oraris de biblioteche a son: miercus des 15 aes 19; joibe des 9 aes 13 e des 14.30 aes 18; sabide des 15 aes 18.

mercoledì 29 ottobre 2008

Universitât dal Friûl

Ancje jo no pues fâ di mancul di poni in evidence chest probleme che in chescj diis si è fat simpri plui fuart, sedi pe nestre comunitât sedi par ducj i students che a frecuentin la Universitât dal Friûl. No ai voie di jentrâ in discussions politichis, ancje parcè che la mê preparazion in merit e je avonde scjarse, ma chi o stin fevelant de sopravivence de NESTRE universitât! Par colpe di ideologjiis e di sotfinanziaments che nus spietaressin di dirit o riscjin di pierdi cheste istituzion che e à 30 agns di vite e che e à contribuit a fâ rinassi il Friûl de so condizion di aretratece culturâl e di visibilitât. Jo o soi indignade di sintì ogni dì ce che al sta sucedint intes aulis e pai curidors: o ai la fortune di vê un professor che ogni dì nus spieghe ce che al è daûr di dut chest casin, dal pericul che o corìn noaltris students e soredut par chei che varàn di vignì dopo di no, che forsit no varàn nancje plui la pussibilitât di studiâ inte nestre piçule ma grande universitât. Cualchi dât? Jo us ripuarti un esempli che mi tocje diretamentri: la Universitât dal Friûl e à lavorât tantonon par ufrì une sielte didatiche in ambit archeologjic che e je uniche in dute Italie; e je la uniche a vê un propri laboratori didatic (di so proprietât) a Acuilee; e je la uniche a dâ la pussibilitât di sgjavâ in scuasit ducj i ambits dissiplinârs:sgjâfs preistorics (tumui e cjastelirs), sgjâfs romans (Acuilee), sgjâfs medievâi (cjstiei inte zone colinâr), sgjâfs mediorientâi (Sirie e si sta viodint ancje pe Turchie...). Se o fevelais cun students che a vegnin di fûr regjon viodareis che dut chest in altres universitâts nol è!! E alore jo o dis: dopo tancj agns e sacrificis cemût si puedie pensâ di butâ vie dut chest?!?! Jo chest an o pai ben 200 euros di plui di tassis rispiet a l'an passât e o ai di sintimi a dì che dut chest al varà di finì!? Alore furlans, no ise ore di sveâsi? Se no lin in place par festegjâ l'Udin lin almancul par salvâ une des istituzions che a àn fat grant il Friûl!

martedì 28 ottobre 2008

Museu egjizi di Torin

Il week end passât o soi stade a visitâ la bielissime citât di Torin, e podevio no lâ a viodi il museu egjizi? Al è un puest fantastic, plen di storie e sugjestif, une des colezions di materiâi dal Antic Egjit plui grandis dal mont. Une visite che e vâl sul serio la pene di fâ, par capì cuntun percors ben articolât, la millenarie storie di cheste civiltât.

venerdì 24 ottobre 2008

Laboratori di archeologjie pai fruts

Biele, bielonone iniziative de associazion culturâl "Pas de Tor", che cul sostegn de Fondazion Carigo e propon incuintris e laboratoris di archeologjie pai fruts dai 5 ai 11 agns. Chest sabide a Gradiscje di Sedean des 15 aes 16.30 i fruts a podaràn sperimentâ lis tecnichis de archeologjie cun ogjets e esperiments. Il teme presentât al è "Viaç inte archeologjie ambientâl". La associazion e à il fin di promovi e permeti la partecipazion e la cressite culturâl dai citadins e valorizâ il patrimoni artistic, archeologjic, storic e tradizionâl dal nestri teritori.

giovedì 23 ottobre 2008

La metalurgjie inte ete dal Bronç


Ai 31 do Otubar a lis 20.30 lì de Vile Savorgnan di Lestans (Pn) cunvigne su: -metalurgjie inte ete dal Bronç e mot suntune fonde in piere par fusion di element di situle dal cjastelir di Grediscje sul Cosa (ete dal fiêr), dott. Girelli Daniele. -esperiencis di archeologjie sperimentâl sui metâi cun tecnichis e tipologjiis de ete dal Bronç, Salvador Sergio, Cesaratto Marco, Gobbato Luca. Organizzazion grup archeologjic Archeo 2000 di Lestans.

martedì 21 ottobre 2008

Cjastelir di Cjasteons di Strade

E continue la rassegne sui cjastelirs dal Friûl!
Vuê o ai stât a viodi chel di Cjasteons di Strade, dulà che a stan sgjavant i students de Universitât dal Friûl, simpri coordenâts dal Dipartiment di Storie e Tutele dai Bens Culturâi.
Il sit indagât nol è tant grant, a son però vignûts in lûs i rescj di une abitazion de ete dal Fiêr (busis di pâl), vues e cualchi repert ceramic cun decorazions tipichis di chest periodi che un zovin che al lavore lì mi à mostrât; cun di plui intal mieç de abitazion si viodevin lis olmis di un fogolâr.
Lis dimensions dal cjastelir a son avonde amplis, ma par cumò si è podût vierzi dome chest piçul setor.
Une robe e je di dì: cun chest timpat il sgjâf nol sarès podût là indevant se no grazie a la disponibilitât dai alpins che a àn fornit un grant tendon che al cjape dute la aree cussì che i archeolics a podin lavorâ ancje se al plûf! =)

domenica 19 ottobre 2008

Invit par ducj

Vinars ai 24 di Otubar aes 20.30 lì de Sale conferencis de Biblioteche Civiche di Codroip e vignarà presentade, lete e comentade " La Odissee di Omêr par furlan", la grande opare voltade par furlan di Pierluigi Visintin e Sandri Carrozzo. Une ocasion di no pierdi!

Inte foto une rapresentazion statuarie de famose scene dulà che Ulisse al svuarbe Polifemo.

venerdì 17 ottobre 2008

Gnovis de SFA

La Societât Furlane di Archeologjie nus inzorne su lis ativitâts in chest periodi.
-Di lunis 20 a joibe 26 vignaran efetuadis ricognizions e ripuliduris di ariis dal cjstiel di Atimis fint cumò no indagadis; cui che al vûl partecipâ al po iscrivisi lì de segreterie inte Tor di Puarte Vilalte.
-Vinars ai 24 di Otubar a lis 20.30 lì dal Oratori Parochiâl di San Canzian d'Isonç une conference cun Mario Bressan dal titul "Il cammino storico religioso di Santiago di Compostela. Immagini ed emozioni".
-Joibe ai 6 di Novembar aes 18.00 lì de Cjase de Contadinance in cjstiel a Udin la presentazion dai ultins volums des rivistis "Aquileia Nostra" e "Quaderni friulani di archeologia".
-Joibe ai 13 di Novembar simpri in cjstiel a Udin aes 18 presentazion dal volum "Epigrafi di Julium Carnicum" in colaborazion cul Centri di Antichitât Altadriatichis e il Ripartiment di Sciencis de Antichitât de Universitât di Triest.

Altris apontaments us ai metarai plui indevant.

mercoledì 15 ottobre 2008

The Captain and the Kid

Une cjançon fantastiche di un cjapitani fantastic...

Sondaç


I risultâts dal sondaç su lis tematichis de archeologjie che plui a interessin a àn evidenziât une sorte di omogeneitât intes sieltis, duncje i interes si sparnicin su dutis lis tematichis e no dome su ce che al rivuarde il Friûl, in particolâr su la preistorie. O ringrazi chei che a àn partecipât e us torni a dì che se o veis da lis richiestis particolârs, cualchi curiositât, di domandâmi! =)

lunedì 13 ottobre 2008

Cemût che al jere il tumul

Vuê mi à scrit bilite, un letor atent di chest blog e che o ringrazi tant, e mi à mandât cualchi foto tirade fûr di un vecjo libri dulà che si conte de tumbare di Merêt. Us publichi duncje une foto (no je vignude tant ben) dal tumul prime che al vignìs sgjavât e us met un trat gjavât dal libri.


"Viers sud-est, riferintsi al pais di Tombe, tra chest e Merêt a cualchi pas de strade che e fo chê romane e su la çampe dal Tilaventus Minus si alce une di chestis tombis di grant rilêf: si clame Tumbare o Mutare; e à une circonference ai pits di 76 m. e inte spice di 30 m, e je alte 7.5 m.
Parsore e fo cjatade un vâs cun cinisis e chest al fâs pensâ a une tombe romane, ma chest popul nol doprave chest tipo di sepolture..."

Di "Tomba di Mereto" Monografia storica ed artistica, Biblioteca Sandro Ponte.

sabato 11 ottobre 2008

Jo e Quagliarella!


Scusait se o dopri chest blog par tiramile un ticut, ma o soi masse contente di vê cognossût il grant Fabio Quagliarella!!! E in bande al jere ancje il mister Marino (ma al jere che al cenave, e al varà dite "cuise che matucele che saltuce come un frut!!". Heheheheheh! =)

venerdì 10 ottobre 2008

Il tesoretto di Codroip


Come che nus vise ancje la mestre Lorele, domenie ai 12 di Otubar, e vignarà inaugurade la mostre "Il tesoretto di Codroip" intal Museu Archeologjic (di Codroip) in ocasion de fiere di Sant Simon!
Il museu lu cjatais in bande dal Domo! =)

giovedì 9 ottobre 2008

Scuvierte a Avian

Di un articul sul Gazetin di vuê si lei che ancje inte zone di Avian, al timp de antighe Rome, si coltivave la vit. Al è stât cjatât di fat un falcet "arborari o putatori", un imprest citât ancje dai scritors latins come indispensabil inal tratament de ue, tra i rescj di une costruzion di ete romane. L'imprest al è in fiêr forgjât di 37,5 x 13 x 1 cm e al pese 530 grams. Ancje Catone al fevelave di chest argagn necessari a tajâ i rams e i pampins (fueis de vit). Cumò al è stât dât in consegne a Anna Nicoletta Rigoni, conservatrice dal Museu Archeologjic dal Friûl ocidentâl di Tor di Pordenon.

martedì 7 ottobre 2008

Cjasteîlr di Gjalerian

Dopo l'aromai nomenât tumul di Merêt, vuê us presenti un altri sît che l'Universitât dal Friûl e à sgjavât cheste istât, il cjastel îr di Gjalerian. Tacât intal 2003 lis ricercjis a son scomençadis di gnûf tal 2007; i lavôrs si son concentrâts atôr de spice nord de difese dal tiereplen. In cheste zone a son stâts individuâts i rescj de sdrumade di une abitazion lungje almancul 10 metros (de ete dal Bronç medi-resint). Un altri saç al è stât viert inte aree devant la estremitât nordorientâl dal aggere: chi si son cjapâts su dâts su la composizion e lis fasis de struture argjnade. Cun di plui si è podude verificâ l’esistince di un varc antîc, su la spice nord come intal cjastelîr di Sedean. Si trate di un comples sisteme di ingres confrontabil cun puartis monumentalis di altris cjastelîrs, come chel di Moncodogno/Monkodonja, su la cueste ocidentâl de Istrie. I sgjâfs a Gjalerian laràn indevant almancul un doi agns par completâ dutis lis ricercjis necessaris.

domenica 5 ottobre 2008

Sondaç!


Alore, chi in bande us ai metût un sondaç dulà che a podeis esprimi lis vuestris preferencis su lis tematichis che rivuardin la archeologjie, cussì viodìn se o rivi a smovi un tic chest blog! Podeis ancje dimi se al è alc in particolâr che a volaressis savè, cirarai di contentaus! Mandi a ducj! =)