Mandiiiiiiiiiiiiiiii, o fâs un salt a cjatâ Minù

Lis olmis dal dinosaur

Bielissim zîr in moto îr, judât ancje di une grandiose zornade di soreli! O ai aprofitât cussì di viodi puescj de nestre regjon che al jere un grum che no viodevi, la zone di Pinçan, Barcis, Claut e la piçule frazion di Lesis, di dulà che partìs la stradute blancje che e puarte a un straordenari ritrovament, lis olmis di un dinosaur di 215 milions di agns indaûr! Di lâ a viodi! =)

Pasche e pascute...

Buine Pasche e pascute a ducj! =)

Imperatîf...vinci!

Dopo cualchi zornade dulà che mi soi un tic sierade in silenzi (mi sintivi di tasê par rispiet, no mi lave di scrivi nuie), al è vignût il moment di tornâ a soridi un pôc, e nuie di miôr che sfogâsi un tic sberlant tal stadio (intal câs di usgnot a cjase dal Gian!) =D Cun di plui sul MV di vuê une dichiarazion "shock" di Fabio Quagliarella: che se o passìn il turno di Uefe al va in television e al lei une poesie par furlan! Alore jo o tifi ancjemò plui fuart: FUARCE UDIN!!! =)

Buine fieste de Patrie!

Buine fieste a ducj i furlans, cu la sperance che la nestre identitât no vadi pierdude!

Pe Patrie

Us segnali chescj apontaments inmaneâts de Filologjiche in ocasion de fieste de Patrie dai 3 di Avrîl:

Comun di Codroip

Provincie di Udin

Societât Filologjiche Furlane

Fieste de Patrie dal Friûl, ai 3 di Avrîl dal 2009

Codroip - Biblioteche Civiche Don Gilberto Pressacco

Dai 3 ai 10 di Avrîl proiezions pes scuelis
- pai fruts des Scuelis primariis Omenuts vol. 4. Il mont des ruedis, carton animât par furlan realizât de Societât Filologjiche Furlane
- pai arlêfs des Scuelis mediis Friûl viaç te storie: des origjinis ae fin dal stât patriarcjâl, documentari realizât de Provincie di Udin

Joibe ai 2 di Avrîl aes siet sot sere
Scree de mostre E nas une lenghe – Nasce una lingua – The birth of a language
Consegne de Costituzion de Republiche Taliane voltade par furlan ai zovins di Codroip che a àn a pene finît 18 agns
In serade, conference su lis potenzialitâts de marilenghe tant che mieç di comunicazion moderni e creatîf: proiezion di doi video musicâi dal grup codroipês Jonokognòs cu la regjie di Marco D’Agostini e coment dai fumuts 3 di Avrîl e La disfide di Spilimberc dal disegnadôr di Bertiûl Luca Malisan

Vinars ai 3 di Avrîl aes vot e mieze di sere
Conference Napoleon a Codroip: la bataie dal Tiliment par cure di Paolo Foramitti inte suaze dai incuintris di argoment storic Al jere une volte…

O sês ducj invidâts a partecipâ.

O voi in feriis!

Mandi a ducj! O voi une setemane a suiâ i vues de umiditât intal cjalt!! =) Si viodìn ca di 8 dîs!

Si impiin i pignarûi!

Tra vuê e doman e torne la tradizion furlane dai pignarûi, che e jê simpri stade ben testemoneade un pôc pardute la regjon. O cognossarês dal sigûr chei plui famôs, soredut chei sul tarcentin, ma jo us vuli segnalâ chel dal gno paîs, che la proloco ogni an e fâs sù cun tant impegn e volontât! E alore...ducj a Vissandon doman aes 20 sot sere!.... e no stait a preocupâsi, par combati il frêt a son ben doi chioscos enogastronomics! Us spieti! =)
Inte foto il pignarûl di doi agns indaûr a Vissandon.

Bon principi!!!

Tancj auguris di un bon principi a ducj i miei letôrs!! =)

Doman i Krampus!

Aromai a son une tradizion che si ripet ogni an, cun simpri plui int che a côr a viodi chest bielissim spetacul! O feveli dai Krampus, chescj teribii mostris che a vegni jù des monts e a corin daûr a la int par fâje pôre, dant (par fente!) legnadis e pocadis! Doman a Tarvis des 17 sot sere podarês assisti al spetacul; par saventin di plui, sedi su la tradizion sedi sui oraris e la strade, lait a viodi chest sît!

Fiiiiuuuuuuu!

E je stade une emozion continue! Ma no si pues patî cussì!!
Comunque a la fin une fieste masse biele! Brâfs fantats! =)

P.S. Chi inte foto o stavi cuasi par vaì!=/

Mandi!

Us saludi par cualchi zornade, o voi in feriis a chì a viodi chest e chest! Si cjatìn cuant che o torni! Maman a ducj! =)

Gardaland!

Dopo lis faturis universitaris mi soi finalmentri gjoldude une biele zornade di divertiment a Gardaland! O ai tirade sù une strache mostre ma al è stât diviertentissim! =)

Serade cui Chieftains!

Ce figade! O ai stât a viodi un concierton pardabon biel! O ai di ameti di no sedimi mai interessade ae musiche folk, ma nosere o ai assistût a un spetacul dulà che mi soi propite divertude e che mi à permetût di cognossi un gnûf (par me) gjenar di musiche. Inte biele cornîs dal zardin su in cjistiel a Udin a sunavin il grup “La Sedon Salvadie”, oviamentri autoctons =) e dopo di lôr un grant grup irlandês “The Chieftains”, considerâts i esponents de vere musiche irlandese! Biel! Biel! Biel! =)

dotore dal bus dal cul!

Je ai fate ancje jo!!! No rivi inmò a crodiiii! Un grazie di gnûf a ducj chei che a son vignûts a sostignîmi, i miei parincj, lis mês compagnis di universitât (che o ringrazi ancje pal “biel” travestiment, ve possino...) e ai amîs e amiis che mi an sopuartade cu lis mês paranois! Une bussade grandonone a ducj!! E grazie ancje pai regai...! ;)

LAUREADE!!

Jo o ai inmò di realizâ ce che mi è sucedût vuê, ma mi pâr, des fotos che dome cumò o ai cjalât, che o jeri propite jo chê cu la corone di orâr sul cjâf che lave ator par Udin! =)

Aiar di fieste...

Vuê o ai stât a Sant Denêl ae fieste dal pressut cun lis mês amiis Barbara e Debora (cun me te prime foto) e “casualmentri” o ai cjatât ancje Christian (velu achì!).Ducj insiemit si sin sglonfonâts di pressut e des mitiches crêpes dal “baffo”! =) Come simpri une biele fieste sul serio; cjaminant pal centro no ai podût fâ di mancul di jentrâ inte gleseute di Sant Antoni, pardabon un bombon, cun dai afresc une vore biei e di grant impat apene che si jentre. Ve chì une foto che e rint però pôc la bielece di chest puest.

A la Bikerfest

Come che o ai za dit, chi o fevele no dome di archeologjie. E cussì ve chi che o soi a la Bikerfest a Osôf! =)
O soi stade contente parcè che o ai viodût un grum di motos che mi plasevin, ma come prime moto mi sa che o cjolarai cheste chi! =)

Fieste a Vissandon!

La nestre e je une piçule proloco nassude di pôc, ma cuant che si trate di fâ fieste nissun si tire indaûr!! Us spietin numerôs in place a Vissandon vinars, sabide e domenie cun grups dal vîf, chioscos e robe buine di mangjâ!! Me mi cjatarês a spinâ bire! =)

Gjite a Vignesie

Vuê o ai aprofitât de bielissime zornade par lâ a fâ un biel zîr a Vignesie cun lis mês amiis Barbara e Francesca! Partence cul tren di Udin e, une volte rivadis, cjaminade che no finive plui fint a Rialt e Sant Marc! Tante int, sorelon (mi soi ancje scotade l’agâr!) e doi pîts come dôs fertaiis!
O vin viodût tancj negoziis cun presits di no crodi ma tal Disney Store o ai scugnût jentrâ! E li o ai fat il gno bielissim acuist! *_*
A part la strache une biele zornade pardabon! =)