giovedì 4 giugno 2009

mandi


Par cumò o voi, cun displasê. O speri che al sedi un moment, ma no rivant a stai daûr cun continuitât mi somee plui just sierâlu, almancul par un pôc. Grazie a ducj chei che mi àn seguît fint cumò. Maman

giovedì 21 maggio 2009

Gnove scuvierte a Luxor

La mission taliane a Luxor (Egjit) e à discuviert un gnûf tesaur inte tombe di Harwa: un grant basrilêf cuntune dance funebre, 4 mumiis, di cui 2 ben conservadis e cun olmis di aur su la muse e sul cuarp, e un ritrat funerari piturât suntune taule di len dal II secul dopo di Crist che al mostre un zovin cun bafs, toghe e mantel.
Trops tesaurs inmò di discuvierzi!



martedì 19 maggio 2009

Storie e archeologjie intal comun di Maian

L'aministrazion comunâl di Maian e à inmaneât un bielissim programe culturâl cun escursions intal teritori par discuvierzi i lûcs e i paesagjios; cun di plui si tignaràn, inte Sale dal Consei dal Palaç Comunâl, incuintris cun esperts di archeologjie e storie che nus spiegaràn chestis evidencis. Si tache joibe ai 21 aes 20.45 cuntun incuintri dal titul "Dalla Protostoria al Medioevo", percors storic culturâl vie par i ritrovaments archeologjics intal Comun di Maian, tignût des archeolighis Tiziana Cividini e Chiara Magrini.

lunedì 18 maggio 2009

La cunvigne di toponomastiche

Sabide la cunvigne di toponomastiche a Branc e je lade ben, i intervents a son stâts interessants e la coordenadore, dopo un prim moment di "panic", e je lade vie avonde ben (almancul cussì mi àn dite!). Prossim apontament doman di sere aes 20.30 pal intervent "Par une ricercje archeologjiche dal teritori: i rilevaments 4D" par cure di Ivano Sebastianutti dal comun di Tavagnà. Us spieti!
Inte foto cun me i relatôrs Filippo Rosset e Benvenuto Castellarin.

venerdì 15 maggio 2009

toponomastiche a Branc

Vuê aes 18.30 si vierzin i lavôrs de setime cunvigne di toponomastiche a Branc di Tavagnà cu la scree de mostre " La Panarie' 1924-1931. Lis cartulinis di Giovanni Fiorini" cu la presentazion di Gisella Fiorini. Po dopo la presentazion dal sît internet "Fotografie e teritori", par cure di Franco Martelli Rossi.

mercoledì 13 maggio 2009

Il divorzi di Indrì VIII

Interessant articul vuê sul Corîr suntun document ecezionâl: finalmentri publiche la pergamene dal 1530 indiriçade dai Pari di Ingletiere al pape Clement VII par l' anulament dal matrimoni tra Indrî VIII e Catarine di Aragone par podê sposâ Ane Bolene: leieit a chì.

sabato 9 maggio 2009

Cunvigne di toponomastiche


Dai 15 ai 24 di Mai al Centri Sociâl di Branc di Tavagnà si davuelzarà la setime cunvigne di toponomastiche locâl. Sabide 16 o fasarai di coordenadore ai varis intervents dai relatôrs, cun inizi aes 15. Us spieti! =)
Par viodi miôr la locandine fracait su la imagjin

giovedì 7 maggio 2009

Scuele taliane

























O ai un grant displasê, ma ancje une grande rabie. Chest an, inte Universitât dal Friûl, pai students iscrits al cors di lauree in Conservazion dai Bens Culturâi e Archeologjie a saràn atîfs dome i sgjâfs didatics di Aquilee. Gjavâts chei medievâi, chei mediorientâi e chei protostorics. Inutil stâ chi a spiegâ il parcè. O jerin une des universitâts cun plui ufierte didatiche, une ponte di ecelenze in chest cjamp...ce avilizion.
Chê altre dì o soi lade a fevelâ cu la diretrice de scuele medie di Basilian par proponi il gno laboratori didatic di archeologjie. Dopo l'entusiasim iniziâl pe biele ativitât, la solite rispueste: no vin bêçs. Ma cemût si fasie a vivi intun paîs che al gjave i bêçs ai zovins e ai students, a lis scuelis, a la culture! Jo no lu aceti!

Inte foto: la scuele taliane

mercoledì 6 maggio 2009

martedì 5 maggio 2009

Cunvigne

Doman ai 6 di Mai in tor Puarte Vilalte aes 18 interessant incuintri cul prof. Lorenzo Braccesi, docent universitari a Vignesie e Padue, sul teme "Il confine alle Alpi. Dall'Italia augustea all'Italia risorgimentale".

domenica 26 aprile 2009

Patrimoni artistic dal FVG intun click

Doman ai 27 di Avrîl des 10.00 aes 12.30 lì dal Parc Scientific e Tecnologjic di Udin "L. Danieli" in vie Linussio 51 l'Universitât dal Friûl e Friuli Innovazione a presentin i risultâts dal prin an di ricercje su la informatiche pai Bens Culturâi. Lait a viodi a chì pal program.

mercoledì 22 aprile 2009

Mi ricuarde la Societât Filologjiche Furlane che vinars ai 24 di Avrîl a Vile Manin di Passarian e sarà inaugurade la mostre "Ugo Pellis 1882-1943. Il Friuli nelle immagini" che e durarà fint ai 7 di Lui 2009.
Ve chì i oraris:

martars- vinars 14.00-19.00
sabide-domenie 10.00-19.00

lunis sierât

ingrès libar



martedì 21 aprile 2009

Pieri Pauli Pasolini

Ai 23 di Avrîl il prof. Roberto Dapit de Facoltât des Sciencis de Formazion Primarie de Universitât di Udin al tignarà dai seminaris su la figure di Pieri Pauli Pasolini, ve chì il link cui programs.

domenica 19 aprile 2009

XX agns de SFA

Dai 18 ai 26 di Avrîl, des 17 aes 19 la tor di Puarte Vilalte e restarà vierte in ocasion de mostre fotografiche pai vincj agns di ativitât de societât, cun fotos di events, aveniments e iniziativis de SFA e des sôs sezions. Auguris! =)

sabato 18 aprile 2009

Cjstiei vierts

Vuê e doman podìn lâ a visitâ i cjistiei de regjon, vierts in ocasion de zornade "castelli aperti", program organizât dal consorzi pe Salvaguardie dai Cjistiei Storics dal Friûl Vignesie Julie.
Par info: www. consorziocastelli.it

mercoledì 15 aprile 2009

Apontaments


Us segnali doi apontaments di lâ a sintî:

- doman ai 16 di Avrîl aes 20.30 lì de Sale don Attilio Della Mora intal oratori di San Canzian dal Lusinç, presentazion dal libri "
Torri di Porta Aquileia" a cure de autrice Desiree Dreos.

- Simpri doman aes 20.30 lì de biblioteche a Codroip la dott.re Diana Bitto e tratarà il teme: "La scrittura dei numeri dalla preistoria al medioevo".

martedì 14 aprile 2009

Lis olmis dal dinosaur

Bielissim zîr in moto îr, judât ancje di une grandiose zornade di soreli! O ai aprofitât cussì di viodi puescj de nestre regjon che al jere un grum che no viodevi, la zone di Pinçan, Barcis, Claut e la piçule frazion di Lesis, di dulà che partìs la stradute blancje che e puarte a un straordenari ritrovament, lis olmis di un dinosaur di 215 milions di agns indaûr! Di lâ a viodi! =)

lunedì 13 aprile 2009

Pasche e pascute...

Buine Pasche e pascute a ducj! =)

giovedì 9 aprile 2009

Imperatîf...vinci!

Dopo cualchi zornade dulà che mi soi un tic sierade in silenzi (mi sintivi di tasê par rispiet, no mi lave di scrivi nuie), al è vignût il moment di tornâ a soridi un pôc, e nuie di miôr che sfogâsi un tic sberlant tal stadio (intal câs di usgnot a cjase dal Gian!) =D Cun di plui sul MV di vuê une dichiarazion "shock" di Fabio Quagliarella: che se o passìn il turno di Uefe al va in television e al lei une poesie par furlan! Alore jo o tifi ancjemò plui fuart: FUARCE UDIN!!! =)

lunedì 6 aprile 2009

O soi dongje...


O soi dongje cul cûr e cul pinsîr...

sabato 4 aprile 2009

Mostre sui Langobarts

Fint ai 7 di Jugn o podês lâ a viodi la mostre dal titul "I Langobarts" di Mario Micossi inte glesie di Sante Marie a Cividât.
Oraris: Vinars 16.00 – 19.00; Sabide, domenie e festîfs 10.00 –12.30 / 15.00 – 19.30.

venerdì 3 aprile 2009

Buine fieste de Patrie!


Buine fieste a ducj i furlans, cu la sperance che la nestre identitât no vadi pierdude!

mercoledì 1 aprile 2009

Pagjine Marilenghe

Vuê il Messaggero Veneto al à proponût la pagjine Marilenghe, curade de Societât filologjiche furlane.
O ringrazii la Sff e Sonia Sicco che e à scrit un toc dedicât ai blogs par furlan e mi à clamât par domandâmi une opinion a rivuart.
Tal prin coment us met l'articul. =)

martedì 31 marzo 2009

Pe Patrie

Us segnali chescj apontaments inmaneâts de Filologjiche in ocasion de fieste de Patrie dai 3 di Avrîl:

Comun di Codroip

Provincie di Udin

Societât Filologjiche Furlane

Fieste de Patrie dal Friûl, ai 3 di Avrîl dal 2009

Codroip - Biblioteche Civiche Don Gilberto Pressacco

Dai 3 ai 10 di Avrîl proiezions pes scuelis
- pai fruts des Scuelis primariis Omenuts vol. 4. Il mont des ruedis, carton animât par furlan realizât de Societât Filologjiche Furlane
- pai arlêfs des Scuelis mediis Friûl viaç te storie: des origjinis ae fin dal stât patriarcjâl, documentari realizât de Provincie di Udin

Joibe ai 2 di Avrîl aes siet sot sere
Scree de mostre E nas une lenghe – Nasce una lingua – The birth of a language
Consegne de Costituzion de Republiche Taliane voltade par furlan ai zovins di Codroip che a àn a pene finît 18 agns
In serade, conference su lis potenzialitâts de marilenghe tant che mieç di comunicazion moderni e creatîf: proiezion di doi video musicâi dal grup codroipês Jonokognòs cu la regjie di Marco D’Agostini e coment dai fumuts 3 di Avrîl e La disfide di Spilimberc dal disegnadôr di Bertiûl Luca Malisan


Vinars ai 3 di Avrîl aes vot e mieze di sere
Conference Napoleon a Codroip: la bataie dal Tiliment par cure di Paolo Foramitti inte suaze dai incuintris di argoment storic Al jere une volte…

O sês ducj invidâts a partecipâ.

giovedì 26 marzo 2009

Cjarlin centri culturâl par 3 dîs

Vuê sul MV un biel articul dulà che si fevele dal impuartant incuintri internazionâl di archeologjie che si tignarà doman, sabide e domenie a Cjarlin, dal titul "Late Roman Glazed Pottery in Carlino and in Central-East Europe: production, function and distribution"...tant l'inglês lu savês no? =)

mercoledì 25 marzo 2009

O soi tornade...sul gjornal!


Ve chì che o soi di gnûf! Cumò o soi un tic plui abronzade che no te foto...=)
Us segnali chest articul dal MV di vuê su la mostre des Grovis di Basilian che us vevi za fevelât: lait a viodi il prin coment.
O vês timp inmò fint domenie par lâ a viodile!

Inte foto: jo dongje de Cividini e la assessore ae culture di Basilian D'Avena Mariagrazia.

sabato 14 marzo 2009

O voi in feriis!

Mandi a ducj! O voi une setemane a suiâ i vues de umiditât intal cjalt!! =) Si viodìn ca di 8 dîs!

martedì 10 marzo 2009

e vie no...

O soi simpri plui sconcertade a sintî in ce condizions che o sin oramai cu la universitât (no dome dal Friûl, ma jo o vîf in particolâr cheste realtât).
Martars in biblioteche di storie in Palaç Antonini o vin fate une riunion tra students, cu la presince ancje di rapresentants dal ateneu, su la riduzion dai oraris des bibliotechis, a seguit oviamentri dai tais proviodûts (ancje) pe istruzion. Al à fevelât par prin il delegât dal Retôr, il prof. Ludovico Rebaudo, spiegantnus la reâl situazion economiche de universitât. Cualchi dât tant par capîsi: cumò come cumò la universitât di Udin e jê in deficit di 8 milions di euros (!), che a deventaràn 11 milions entri il prossim an. Oramai o savìn che il nestri ateneu al è sotfinanziât dal 1992, creant duncje cheste situazion di emergjence.

Lis primis risorsis a jessi duncje tajadis a son stadis propit lis bibliotechis (pont fondamentâl di studi e ricercje par un student...) sedi in oraris che in materiâl; ven a stâi: cun il 16 di Fevrâr i oraris si son ridots a 40 oris setemanâls (un student lavoradôr cuant podial lâ a reperî i libris se dopo des 17 al ciate sierât?), cun di plui no podaràn jessi comprâts plui che tancj libris e ancje rivistis (inzornaments, ultimis ricercjiis...il mont de culture al è in continue evoluzion!). Insome, une situazion no dome di discomut, ma ancje di involuzion culturâl; par une universitât nassude a pene 30 agns indaûr, za jessi in chestis condizions...


Tra i varis intervents, sedi dai students che dai rapresentants (a jerin presints ancje il preside de facoltât di Letaris prof. Tabarroni e il diretôr de biblioteche di Storie prof. Zannini) e je vignude fûr cualchi propueste; la plui votade e je stade chê di meti in pîts un grup di students volontariis che si metaràn a disposizion par cuvierzi lis oriis di sieradure, ufrìnt distess il servizi di consultazion libris. Pe serie: dopo 1200 euros di tassis ad an...ma o ai di dî che la adesion e je stade alte, duncje sperìn che "par cumò" la situazion di emergjence si podedi risolvi in cheste maniere, in spiete di cualchi soluzion plui continuative.

venerdì 6 marzo 2009

Mostre a Basilian


Vuê aes 17.30 o soi stade ae inaugurazion de mostre fotografiche sul sgjâf di Grovis a Basilian. Inte biele cornîs di Vile Zamparo, centri culturâl dal comun, e jê stade alestide cheste mostre, che e durarà fint al 29 di Març, realizade cun undis cuadris espositîfs, dulà che si ripercorin i 10 agns di sgjâf di cheste localitât. Grovis (il significât de peraule al è "grun di claps") in comun di Basilian, al confin cul comun di Merêt di Tombe, al è il sît che dal 1999 in cà al sta dant grancj e impuartants risultâts in evidencis archeologjichis, intun arc di timp comprendût tra il I secul prin di Crist e il VII secul dopo Crist, o ben fint te epoche Altmedievâl (chi in Friûl ta chest periodi o vevin za presincis langobardis). A esponi i risultâts des ricercjis a jerin lis dotoris Cividini, Maggi e Magrini, che a àn fint dal inizi segûit i lavôrs; al incuintri a àn partecipât ancje un rapresentant de Sovrintendince e la Bancje di Credit Cooperatîf di Basilian, il prin finanziadôr dai lavôrs. Il fint dal incuintri, tra l'altri, al jere ancje chel di cjatâ un acuardi tra ents e comun su la maniere di proseguî lis ricercjiis. Plui indevant us contarai di plui su chest impuartant e prometint sît!

mercoledì 4 marzo 2009

An academic 2009

Lunis ai 9 di Març aes 11 inaugurazion dal gnûf an academic in plaçâl Kolbe. Che al sedi un moment ancje di riflession su la situazion critiche dal nestri ateneu...

lunedì 2 marzo 2009

Mostre dal libri antîc


Dai 13 ai 15 di Març, intal Palaç de Permanente a Milan, si davuelzarà la vincjesime edizion de Mostre dal Libri Antîc, apontament impuartant par ducj i apasionâts e colezioniscj. Inaugurazion ai 12 di Març aes 18.30.

sabato 28 febbraio 2009

Il diu dal soreli


Îr si è vierte une mostre al Palaç Bricherasio di Torin dal titul Akhenaton faraone del sole, il faraon che al à istituît il cult di Aton, disc solâr, fasintlu deventâ uniche divinitât dal Regn. La storie dal faraon Akhenaton (Ehknaton-chel che al è util a Aton), omp di Nefertiti, e je une vore avincente, cun lui l'Egjit al passà agns di gambiaments e di contrascj, par vie de sô riforme "amarniane", stant che al impedì il cult di chei altris deis e la sierade dai templis. Ma forin ancje agns di rinovament culturâl e artistic. O vês timp par lâ a viodi la mostre fint al 14 di Jugn.

venerdì 27 febbraio 2009

Sgjâfs estîfs


Daûr segnalazion de Societât Furlane di Archeologjie us met a chì i programs dai sgjâfs estîfs che o podês svolzi come volontaris, par imparâ il lavôr di archeolic e cognossi miôr il nestri teritori (e no dome);

Paestum: dai 28 di Mai ai 6 di Jugn
Codroip-Cjastelîr de Gridiscjie: dai 28 di Jugn ai 24 di Lui (fûr di sabide e domenie)
Atimis-cjstiel superiôr: dai 28 di Jugn ai 24 di Lui (fûr di sabide e domenie)
Atimis-Sant Zorz: date e program di definî
Verzegnis-Cuel Mazeit: dai 27 di Lui ai 14 di Avost


martedì 24 febbraio 2009

Bagnarie-Amburgo


Gnovis ricercjiis su teritori di Bagnarie, ancje cheste volte seguidis de Universitât di Amburgo su progjet de Roemische-Germanische Kommission di Francoforte sul Meno e dal Deutsche Institut di Archeologjie. Come che aromai si sa la zone e je interessade de presince di tracis romanis ma ancje langobardis. A lis ricercjiis a parteciparàn ancje il Museu di Udin e la Societât Furlane di Archeologjie. Ve chì il link cu la notizie.

Inte foto: piçule statue in bronç di Venere cjatade l'an passât a 'Sevean

venerdì 13 febbraio 2009

Incuintris a Aquilee

Interessants incuintris a Aquilee su diviers temis cun la partecipazion di professôrs de Universitât dal Friûl; si tache ai 20 di Fevrâr aes 18 inte Sale Pasqualis cul intervent dal dott. Mirabile de Universitât di Reggio Calabrie che al presentarà un volum di studiis sul teatri di Taormine; e intervignarâ la dotore Rubinich de Universitât dal Friûl. Par chei altris apontaments fracait a chì!

mercoledì 11 febbraio 2009

Cunvigne su Qatna

Miercus ai 18 di Fevrâr aes 18 inte Sale conference de Fondazion CRUP, vie Manin 15 a Udin, e sarà inmaneade la cunvigne in ocasion dai prins 10 agns de mission archeologjiche de Universitât dal Friûl a Mishrifeh (antighe Qatna), in Sirie. Cun di plui al vignarà ancje presentât il prim volum dai Studis Archeologjics di Qatna. A saràn presints, sore dai professôrs de Universitât, ancje il Preside, il President de Fondazion CRUP e il sindic Honsell.

lunedì 9 febbraio 2009

sabato 7 febbraio 2009

Gjeroglific a la SFA


Ai 5 di Març al tache un minicors di 3 lezions di scriture gjeroglifiche inte sede de Societât Furlane di Archeologjie, in Tor di Puarte Vilalte; par cui che al è interessât us met chest link!

giovedì 5 febbraio 2009

Cunvigne su Darwin

Îr o ai stât a sintî la interessante cunvigne su Darwin tignude dal antropolic di fame mondiâl Ian Tattersall, inte bielissime sale dal Parlament di Udin. Dopo une prime introduzion al pinsîr di Darwin, su la sô teorie evoluzionistiche ilustrade bielzà 150 agns indaûr intal libri "La origjin des speciis", il specialist al è intervignût spiegantnus i soi ultims studis, proponint une sô interpretazion su la evoluzion: o ben, la sô idee e je che, inte evoluzion, umane tant che animâl, a son dai moments plui "lents" e moments dulà che lis speciis a si evolvin plui "di corse". Cun di plui, chescj "salts" evolutîfs a son ben visibii intai nestris gjens dulà che a son dai "rescj" di gjens di altris nimâi e bateris, prove inconfutabile che noaltris o derivin di formis di vite precedentis, e che o sin il risultât di un lavôr lunc milions di agns. Ce dî, un argoment une vore interessant e stimolant par cui che al vûl capî lis nestris lidrîs e il nestri straordenari procès evolutîf.

lunedì 2 febbraio 2009

Va ca la mê interviste su RadioUno

Come che us vevi dit, vuê o ai stât a RadioUno, ospit te trasmission "Vuê o fevelìn di..." di Antonella Lanfrit, che o ringrazii.
Ve ca la mê interviste.

video

venerdì 30 gennaio 2009

Archeofurlane su Radio1


O soi stade contatâde di Antonella Lanfrit di Rai Radio1 inte gnove trasmission radiofoniche par furlan "Vuê o fevelin di..." par un intervent sul teme de archeologjie; un cuart di ore dulà che o ai fevelât dal gno blog e dal gno pregjetut di laboratori didatic. O podarês scoltâmi lunis ai 3 di Fevrâr a lis 15.15 su la frecuence regjionâl FM 94.9.

giovedì 29 gennaio 2009

Charles Darwin e la evoluzion umane


150 agns indaûr al vignive dât ae stampe un dai libris che di plui a àn gambiât la muse de storie, "La origjin des speciis" di Charles Darwin. A Udin e vignarà ricuardâde cheste impuartantissime figure che tant nus à dât ai 4 di Fevrâr, a lis 18.00, lì dal Salon dal Parlament in cjistiel, cul contribût di un antropolic di fame mondiâl, Ian Tattersall. Apontament di no pierdi!

mercoledì 28 gennaio 2009

Auguris!





Tancj auguris a une persone speciâl...! =)

lunedì 26 gennaio 2009

Tesaurs d'Egjit

Bielissime mostre a Torin, uniche tappe in Italie, di passe 500 reperts dal Antîc Egjit, cjatâts a Alessandria, Canopo e Heracleion, sul delte dal Nilo, cumò sprofondadis sot 6 metros di aghe. Dai 7 di Fevrâr ai 31 di Mai ae Venaria Reale. Par dutis lis informazions cjalait a chì e chì.

giovedì 22 gennaio 2009

La Mariutine

Come za acenât timp indaûr jo e la mê coleghe Francesca ( inte foto cun me intant che o sgjavìn!) o sin daûr a promovi il nestri progjet di laboratori di archeologjie par fruts; si trate di un cors di ativitât didatiche sedi teoriche che pratiche sul mont de archeologjie, cun esperiments in sgjâfs simulâts, in te costruzion di mosaics o inte piture come che si faseve une volte. Cun di plui il laboratori al sarà disvilupât sedi par talian sedi par furlan, par dâ une ofierte didatiche plui ampie. Cumò o stin vint i prins contats par lavorâ in cualchi centro estîf, sperant che cheste esperience nus puarti a pandile ancje in te scuelis cul mês di Setembar. O aprofiti ancje par ringraziâ Christian pe segnalazion su so blog! Sperìn ben!! =)

martedì 20 gennaio 2009

Concors pai bb. cc., une comedie?

O vareis let o sintût in chescj dîs la polemiche vignude fûr in merit al concors nazionâl dal Mibac (Ministeri pai Bens e Ativitâts Culturâls); dut il mont de archeologjie si è mot cun indignazion par il svolziment des provis preseletivis e ancje par la grave disorganizazion dal concors intîr. Si lei di int rivade a jentrâ ancje cence recuisîts (...), de difusion di domandis sbaliadis e confusionadis, di criteris di valutazion assurts, di disparitât di timps pe preparazion de prove... Par chest l'ANA (Associazion Nazionâl Archeolics) e la CIA (Confederazion Italiane Archeolics) a àn domandât di retificâ il concors ma nuie di fâ, il ministri Bondi nol à dât rispueste. Jo personalmentri o cognòs cualchidun dai mei coleghis che a son stâts a fâ il concors e a sintî ce razze di domandis che a jerin al jere di sgrusulâsi! Mi spiegaiso a ce che mi covente a mi archeolighe savè equazions e disequazions, nozions su codic DNA e RNA, petroli e cacau?!? Robis di mats. E dopo jo mi incazzi come une bestie cun chei che mi domandin:"Ma cu la tô lauree dulà âstu di lâ a vore? In Egjit?" Mah, viodint cemût che a van lis robis chi in Italie forsit o ai cualchi sperance in plui di lavorâ cun Zahi Hawass!

lunedì 19 gennaio 2009

giovedì 15 gennaio 2009

5000!


Ustie! Rît e scherçe o sin rivâts a 5000 contats!! Graziiiiiissssss! =)

mercoledì 14 gennaio 2009

Il gotic intal Patriarcjiât di Aquilee

Us ricuardi la mostre lì de glesie di Sant Francesc a Udin, che fint dal '300 e je stade abelide di impuartantis pituris, vuê restauradis e tornadis ae lôr bielece. Un biel articul su la mostre podeis leilu a chì.

martedì 13 gennaio 2009

Tesaur di Codroip

Dopo 70 agns a son tornadis in mostre lis 109 monedis patriarcjialis di arint dal secul XIV, cjatadis di lunc di lavôrs in place Garibaldi intal 1934. Fint ae fin dal 2010 a saràn in mostre al Museu Archeologjic di Codroip. Par lei l'articul fracait a chi.

sabato 10 gennaio 2009

Grignei di scuele!

O ringrazi di gnûf la mestre Lorele che mi à segnalât il sît dal gjornalut de scuele G.B. Candot di Codroip, dulà che je e i fruts des tiercis a àn tacât a fevelâ de lôr esperience cu la "archeolighe" (magari no dome su la cjarte!). Lait a visitâlu parcè che al è une vore biel e simpatic! =)
Inte foto la mê jentrade "spetacolâr" in classe!

mercoledì 7 gennaio 2009

L'àn pierdude lant a messe...

A Nadâl mi è rivât un bielissim regâl: un libri de golaine di Glesie Furlane cun lis riflessions di pre Toni Beline su la famee e il matrimoni in Friûl. Us met juste un tocut di cerce, ma leieitlu che al è propite biel! " La famee e je il santuari de vite, ma ce gust e rispiet puedio vê pe vite di chei altris, se no ai mai stimât il gno popul, la sô fadie, la sô voie di jessi dongje di chei altris, par gjoldi ce che a àn di biel e mostrâ ce che si è te lenghe e te culture?"

lunedì 5 gennaio 2009

Si impiin i pignarûi!

Tra vuê e doman e torne la tradizion furlane dai pignarûi, che e jê simpri stade ben testemoneade un pôc pardute la regjon. O cognossarês dal sigûr chei plui famôs, soredut chei sul tarcentin, ma jo us vuli segnalâ chel dal gno paîs, che la proloco ogni an e fâs sù cun tant impegn e volontât! E alore...ducj a Vissandon doman aes 20 sot sere!.... e no stait a preocupâsi, par combati il frêt a son ben doi chioscos enogastronomics! Us spieti! =)
Inte foto il pignarûl di doi agns indaûr a Vissandon.