domenica 31 agosto 2008

Proteste archeologjiche


Ai 14 di Jugn si son cjatâts in place pe prime volte i archeolics par denunciâ lis condizion precariis di lavôr, in particolâr la mancjance di dirits e tutele. Us met in coment la letare di Lidia Vignola dal Diretîf Nazionâl de Associazion Nazionâl Archeolics, par denunciâ cheste condizion vergognose di une categorie di professioniscj che e cîr di tutelâ il nestri patrimoni culturâl tra mil dificoltâts.

venerdì 29 agosto 2008

Retifiche

Timp indaûr us vevi scrit di une notizie che e sameave e vès di sconvolzi dutis lis nestris cognossincis su la preistorie: la scuvierte di costruzions piramidâls dongje Sarajevo in Bosnie, dulà che un archeolic al sta sgjavant di cualchi timp sostignint l’esistence di une civiltât preistoriche evolude. Za mi jeri domandade cemût mai che une scuvierte dal gjenar no ves vût un eco a nivel mondiâl, stant che e sarès stade pardabon une notizie sconvolzent; cumò o scuen retificâ ce che o ai scrit, parce che aprofondint lis ricercjs, al è vignût fûr che nol è nuie di scientific, che chest “archeolic” al varès manipolât la sô passion archeologjche par fins comerciâi e di lustri personâl. Il segretari gjenerâl dal Consei Superiôr pes Antichitâts dal Egjit, Zahi Hawass, al à definît chestis teoriis “puris alucinazions”. Plui indevant o speri di daus plui notiziis in merit, restant intant cuntun amâr in bocje pensant a dulà che si po rivâ...

mercoledì 27 agosto 2008

Tornade!

Ve ca che o soi tornade, abronzade e un tic ingrassade (...)!
Ancje par cheste Istât lis feriis a son purtrop finidis, e cumò e je ore di tornâ a tacâ a inzornâ il gno blog! Us met subit une gnove che e rivuarde Aquilee: intal sît da lis Grandis Termis, ven a stai lì che a sgjavin i students de Universitât dal Friûl, e je vignude in lûs une tombe altmedievâl (1500 agns indaûr) cuntun inumât (om) alt cirche 1.65/1.70 cm, i cui vues a mostrin olmis di une vite dure, segnade dal traspuart di grancj pês.
Il cuarp al jere distirât dentri dos grandis anforis produsudis in Afriche, rinvignudis di lunc dal mûr meridionâl dal implant termâl. Purtrop ulteriôrs dâts a son lâts pierdûts cul lâ dai secui, stant che tra il XIII e il XIV secul i aquileiês di chel timp a smontarin fint aes fondazions i mûrs dal grant comples termâl roman par reimpiegâ pieris e modons, come che al avignive in chei agns.

giovedì 14 agosto 2008

Mandi!

Us saludi par cualchi zornade, o voi in feriis a chì a viodi chest e chest! Si cjatìn cuant che o torni! Maman a ducj! =)

lunedì 11 agosto 2008

La fadie di jessi archeolic

Ta chescj dîs al è vignût fûr un dibatit sul Gazetin tra il prof. Gianfranco Ellero e la prof.se Paola Cassola Guida de Universitât dal Friûl su lis condizions dal tumul di Sant Svualt, sgjavât tal 2002 e dopo lassât un pôc al so destin. Al è di dî però che chest al è un probleme che si presente puntualmentri intun sgjâf archeologic, za a son pôcs i bêçs par sgjavâ (il plui des voltis cence paiâ chei che a lavorin...), ae fin i sîts a vegnin lassâts a mieç propite par chest probleme. Us met intai prins doi coments i intervents.

domenica 10 agosto 2008

Irlande

E je une tiere maraveose, o speri di podê lâ a visitâle il plui prest pussibil...

sabato 9 agosto 2008

Ancje sul Diari!

Cuntun tic di braure =) us segnali la presince dal “vuestri blog di archeologjie preferît” ancje sul cuindisinâl “Il Diari” dai 6 di Avost, diret di Mauro Tosoni, intun articul di Stefano Gasti. Grazie a ducj! =)
(Mi viodês ancje inte foto insiemit cun Rovul! )

Il sigjîl di Corado

Di gnûf Atimis in prime pagjine par une straordenarie scuvierte intal sît dal Cjistiel Superiôr; un sigjîl di aur blanc apartignût a Corado I di Atimis, cjavalîr che al vivè propit intal cjistiel par presidiâ la zone. Il so non al jere za cognossût inte zone di Cividât e in chê di Aquilee come un prôt e cun incarics di rilêf. Il repert, in otim stât di conservazion al figure di une bande un Diu Pari cun simbui di podê, di chê altre l’imperadôr dal Imperi Roman di Orient cun dongje la scrite “Alexio Despote”. Di là di chest impuartant ritrovament ancje altris reperts: une monede di bronç, piçui pês, rescj di ciotolis par past, vues di bestiis, dâts par zuiâ e tocs di une golaine.
(Inte foto un esempli di sigjil)

Interviste su Radio Onde Furlane

No podarês mai imagjinâ ce muse che o ai fat cuant che mi à telefonât "niepopodimanculchè" Mauro Missana, il mitic diretôr di Radio Onde Furlane!!!
Mi à clamade par domandâmi di fâ une interviste te sô trasmission "Ator ator". Il teme de interviste al jere fevelâ dal gno blog.
Vonde cjacaris, ve ca la regjistrazion e lis fotos fatis su la Tumbare cul om di Merêt, che al è stât batiât "Rovul".
Un grazie di cûr a Mauro Missana! =)

giovedì 7 agosto 2008

Gardaland!

Dopo lis faturis universitaris mi soi finalmentri gjoldude une biele zornade di divertiment a Gardaland! O ai tirade sù une strache mostre ma al è stât diviertentissim! =)

martedì 5 agosto 2008

Cjastelîr de Gradiscje

Uns dos setemanis indaûr o soi stade a scavâ intal cjastelîr de Gradiscje che si cjate a Codroip, dongje dal Parc des Risultivis. Il cjastelîr al è un borc fortificât, a voltis cun mûrs o cun rialçaments di tiere, di forme elitiche o cuadrangolâr, cun al interni struturis abitativis di tipo sempliç, fatis sù cun materiâi deperibii. Cheste tipologjie di insediament al è tipic de aree istriane, de Dalmazie, dal Venit e dal Friûl - Vignesie Julie. La datazion si coloche inte ete dal Bronç di mieç (XV secul p.d.C.) e e durà sù par jù un mileni.
La campagne di sgjâf di chest an, direte di Piero Tasca de Socjetât Furlane di Archeologjie, e à permetût di ricostruî la vite intal cjastelîr; l'abitât al jere costituît di barachis cu la struture puartant in len e il cuviert di stran e pantan. Si è calcolât che i abitants a fossin sù par jù un centenâr e che si dedicassin al arlevament di pioris e cjavris; chest si è podût dî par vie che a son stâts cjatâts struments adats ae tiessidure (fusaiolis, o ben dai pês par tignî la lane). Di lôr però no si cognòs la lenghe, duncje no je ancjemò ben clare la origjin.
Ducj i reperts tirâts fûr chest an cumò a laran in restaur, po dopo a vignaran metûts intal museu di Codroip.
(In mancjance di une foto dal cjastelîr de Gradiscje us met chê dal cjastelîr di Savalons - Merêt di Tombe -)

lunedì 4 agosto 2008

Museu su la Tumbare

L’intenzion e je chê di rindi visitabil il sît de Tumbare, (la struture di chest gjenar plui grande di Italie) come che cun fuarce al sosten il Comun di Merêt; cumò il progjet al è intes mans dal assessôr regjonâl Roberto Molinaro, che intant al à dât l’ok pe spese di cirche 6.000 euros par fâ il calc e il prelêf dal scheletri. Si è capît aromai che chel dai tumui al è un percors culturâl di preservâ e studiâ a font, carateristic de nestre regjon e leât ai teritoris confinants (Istrie, Dalmazie, Venit).