Gnove publicazion sul tumul di Merêt

Vuê o ai vût il plasê di vê e di lei la gnove publicazion sul tumul di Merêt dulà che si cjatin ducj i inzornaments sul sgjâf e la conservazion di cheste struture impuartantone.

Finît di sgjavâ tal 2008 de Universitât dal Friûl il tumul nus à dât indaûr une schirie di informazions sul periodi protostoric furlan, ancje in face al confront cun altris struturis di cheste fate presintis sul teritori. Di lui o vevin za fevelât chi , chi e cui fruts de scuele primarie "Candotti" di Codroip, che a jerin restâts inmagâts di Rovul e de sô storie. Cumò chestis scuviertis a son fruibilis di ducj ancje gracie a cheste biele publicazion (par cure de Associazion Culturâl "La Grame").

Mi auguri che chestis ricercjis a vadin indevant ancje tai agns a vignî, e je une part de nestre storie masse impuartante par che e vignedi dismenteade sot tiere.

Par chest post o ringraci in maniere particolâr l'assessôr Claudio Violino.

Ultimis su la protostorie furlane

Us segnali un interessant articul vignût fûr sul ultin numar di Tiere Furlane, la riviste culturâl de Regjon, scrit de professore Paola Càssola Guida de Universitât dal Friûl sui ultins studis fats in merit ae nestre protostorie. In particolâr si fevele dai tumui e cjistielîrs cun riferiment particolâr a chei studiâts pôc timp indaûr (S.Svualt, Merêt e Sedean). Biel ancje il confront cu lis realtâts protostorichis dal Cjars, de Dalmazie e Istrie, segn di une civiltât slargjade e ben organizade.

La riviste si le pues lei scjamantle dal sît de Regjon Friûl-VJ a chest link.

O aprofiti ancje par visâus che domenie ai 29 di Zenâr aes 15.00 te canoniche di Vençon si tignarà une cunvigne dal professôr Agnul Floramo propit su cheste tematiche, cul titul "I cjastelîrs: olmis di antighe int in Europe e in Friûl". Di no mancjâ!

Dentri un tumul protostoric a S.Svualt

Come che us vevi dit, îr ai 14 di Otubar al è stât inaugurât il tumul protostoric a S.Svualt, dongje de Aziende agrarie universitarie. Cetante int e à partecipât entusiaste a chest event unic tal so gjenar, la musealizazion dal tumul dal periodi dal Bronç (1900 d.d.C. cirche) che al jere stât scavât al inizi dai agns 2000. La sepolture, esempli ecelent pe metodologjie di sgjâf puartât indevant soredut cul impegn de prof. Paola Cassola Guida de Universitât di Udin, e je stade mantignude cuasi dal dut intate, permetint cussì di mostrâ ai visitadôrs la costruzion e la inumazion dal defont.
Te ocasion al è stât ancje presentât il libri "Una sepoltura monumentale dell'antica età del bronzo: il tumulo di S.Osvaldo (Udine) - scavi 2000-2002" par cure di Paola Cassola Guida e Massimo Calosi (edizioni Quasar, Roma 2011) dulà che si puedin cjatâ dutis lis ricercjis fatis in chescj agns sul sît.
Il tumul al merite lât a viodi e par chest o podês, a partî di lunis ai 17 di Otubar, prenotâ lis visitis vuidadis clamant i Civics Museus di Udin il lunis des 10 ae 13 e des 14 aes 17 clamant il numar 0432 271767 o il Studio D Friuli il martars e joibe des 10 aes 17 al numar 346 3257139.
Jo mi auguri dome une robe, che dut chest entusiasim no si sfanti in pôc timp ma che al sedi di sproc par continuâ cu lis ricercjis in chest cjamp de nestre preistorie inmò dute di scuvierzi.

(Te foto la gnove costruzion par visitâ il tumul)

Finalmentri!

Une biele gnove!
O soi di gnûf a fevelâ di tumui protostorics furlans!
Ai 14 di Otubar si inaugurarà la gnove struture che e permetarà di visitâ il tumul protostoric di S.Svualt, ogjet di indagjin tai agns passâts di bande de Universitât dal Friûl.
Ricuardìn che il tumul, sepulture monumentâl di un individui de ete dal Bronç, al veve dât indaûr impuartants risultâts e soredut il scheletri dal inumât, furnint cussì grandis prospetivis tai studis di chest periodi.
L'aveniment al è cetant impuartant ancje par vie che al sarà il prin sît di chest gjenar musealizât e visitabil, cun didatiche organizade pes scuelis, come tal sît Neolitic di Samardencje.
L'apontament alore al è ai 14 di Otubar as 11.00 daûr il vecjo "manicomio" dulà che a saràn presints i responsabii dal sgjâf, la retore Cristiana Compagno e altris autoritâts.
(te foto la cuvierture di claps parsore de sepulture)

Rispuestis su Rovul/3

6. Cuant isal nassût (nât)?
No cognossìn ben la date di nassite, o podìn dî che al è vivût cirche 4000 agns indaûr.

7. Trop timp aial vivût?
Rovul al è muart zovin, a pene 17 agns cirche.

8. Cemût isal Rovul?
Rovul al è stât cjatât in posizion distirade, cu lis mans pojadis su lis gjambis. I soi vues a son un tic consumâts, ma dopo tancj agns al è normâl!

9. Cui lu aial sapulît ?
Probabilmentri lu àn sapulît i abitants dal vilaç dulà che al viveve Rovul.

10. Come avete fatto a scoprire che aveva 4.000 anni?
Chest si lu à capît dai vues e dai materiâi cjatâts dongje Rovul. A son ciertis analisis un pôc complicadis che si fasin cun dai machinaris e che a permetin di capî trop vecjo che al è un ogjet.

11. Avete trovato altre cose di Rovul?
Dongje di Rovul a son stâts cjatâts altris ogjets, tra cui une ponte di frece. Chest al fâs pensâ che Rovul al fos ancje un vuerîr.

12. Ce mangjavial? Ce samencis mangjavial?
Rovul al veve une diete basade su cereâi, in particolâr farinis no masanadis tant finis, di fat i soi dincj a jerin une vore consumâts.

13. Ce bevevial?
Ce che al bevès Rovul oltri da la aghe no lu sai!

14. Ce fasevial?
Se Rovul al à vude une tombe cussì grande al vûl dî che lui al jere un personaç impuartant inte sô societât, probabilmentri il paron o un fuart vuerîr, o ancje chel e chel.

15. In ce museu lu vêso metût?
Par cumò Rovul al è ancjemò intal laboratori de universitât a Udin, che al spiete di sedi metût in cualchi impuartant museu par podê sedi viodût di ducj!

Rispuestis su Rovul/2

O continui a publicâ lis domandis che mi àn fat i frutins di Codroip!

1.Parcè isal stât batiât Rovul?
Parcè che intal comun di Merêt tancj di lôr si clamin di cognon Della Rovere e duncje lu àn clamât cussì parcè che il non Rovul al ricuarde chest cognon.
2.Mancjavino vues a Rovul? Lu vêso cjatât dut intîr (intero)?
L'antropolic che lu à scavât al à dite che il scheletri al jere in buinissimis condizions, e che ducj i vues a jerin ancjemò al lôr puest.
3.Jerial stât voluçât?
Sì, Rovul al jere stât voluçât cuntun linçûl. Chest al à permetût che i vues a restassin ben strents e inte lôr posizion origjinarie.
4.Cuant isal stât sapulît il muart?
Plui o mancul 4000 agns indaûr.
5.Dulà aial vivût? Dulà jerial a sta Rovul (dove abitava)?
Rovul probabilmentri al viveve inte campagne ator di Merêt, intune capane come che si usave in chê volte.

Rispuestis su Rovul

Ve chì lis primis rispuestis su Rovul che mi àn domandât i fruts de scuele primarie Candot di Codroip, buine leture!

1. Dulà isal stât cjatât? Al è stât cjatât sot dal tumul di tiere clamât “tumbare” a Merêt di Tombe.
2. Cuant isal stât cjatât? Al è stât cjatât Martars ai 22 di Lui dal 2008. Il sgjâf al al fo tacât intal 2006.
3. Parcè sêso lâts a sgjavâ li? I archeolics a son lâts a sgjavâ li parcè che e jere une montagnute che e sameave une tumbare.
4. Trop sêso stâts a sgjavâ? Cheste Istât a son stâts 3 setemanis.
5. Cemût isal stât cjatât? Viers il centri i archeolics a àn notât une diference inte consistence dal teren; cussì a son lâts plui in profonditât, tirant fûr une fuesse che e sprofondave par diviers centimetris. Rivâts a cirche 80 cm sot, ve ca la scuvierte: planc planc a àn tacât a vignî fûr i rescj di un scheletri.
6. Cun ce âstu sgjavât? Prin di dut cun pale e picon, po dopo, individuât Rovul, cun calme doprant cjaçutis e pineluts.
7. Cemût jerie la sô tombe? Trop jerie lungje? Parsore de sepulture vere e proprie al jere un côl fat di claps; parsore ancjemò a jerin strâts di tiere, savalon e argjilis, rivant a une altece di cirche 6 metris par un diametri di 25.
8. Cemût isal muart? Si pense che Rovul al sedi muart di cualchi malatie, stant che al jere zovin.
9. Jerial om o femine? Cemût si fasie a capî? Al jere un om. Chest si pues capîlu dai vues, soredut di chei dal bacin.
10. Jerial un frut? Al jere un zovin tra i 17 e i 18 agns.

Doprait i cursôrs in alt a çampe te cjartute o fracait chi par viodi la mape plui in grant

O speri che cussì us vadi ben, se al è altri alc domandâimi! =)

Cemût che al jere il tumul

Vuê mi à scrit bilite, un letor atent di chest blog e che o ringrazi tant, e mi à mandât cualchi foto tirade fûr di un vecjo libri dulà che si conte de tumbare di Merêt. Us publichi duncje une foto (no je vignude tant ben) dal tumul prime che al vignìs sgjavât e us met un trat gjavât dal libri.


"Viers sud-est, riferintsi al pais di Tombe, tra chest e Merêt a cualchi pas de strade che e fo chê romane e su la çampe dal Tilaventus Minus si alce une di chestis tombis di grant rilêf: si clame Tumbare o Mutare; e à une circonference ai pits di 76 m. e inte spice di 30 m, e je alte 7.5 m.
Parsore e fo cjatade un vâs cun cinisis e chest al fâs pensâ a une tombe romane, ma chest popul nol doprave chest tipo di sepolture..."

Di "Tomba di Mereto" Monografia storica ed artistica, Biblioteca Sandro Ponte.

Cjasteîlr di Gjalerian

Dopo l'aromai nomenât tumul di Merêt, vuê us presenti un altri sît che l'Universitât dal Friûl e à sgjavât cheste istât, il cjastel îr di Gjalerian. Tacât intal 2003 lis ricercjis a son scomençadis di gnûf tal 2007; i lavôrs si son concentrâts atôr de spice nord de difese dal tiereplen. In cheste zone a son stâts individuâts i rescj de sdrumade di une abitazion lungje almancul 10 metros (de ete dal Bronç medi-resint). Un altri saç al è stât viert inte aree devant la estremitât nordorientâl dal aggere: chi si son cjapâts su dâts su la composizion e lis fasis de struture argjnade. Cun di plui si è podude verificâ l’esistince di un varc antîc, su la spice nord come intal cjastelîr di Sedean. Si trate di un comples sisteme di ingres confrontabil cun puartis monumentalis di altris cjastelîrs, come chel di Moncodogno/Monkodonja, su la cueste ocidentâl de Istrie. I sgjâfs a Gjalerian laràn indevant almancul un doi agns par completâ dutis lis ricercjis necessaris.

Ancjemò su la Tumbare

Joibe ai 2 di Otubar, aes 20.30, intal contest de Mostre regjonâl dal miluç a Merêt si davuelzarà une cunvigne dal titul “La mutare di Tombe”, cun lis ultimis sul sgjâf de tombe di Rovul. A saràn presintis lis dott. Elisabetta Borgna (la mê prof. di Archeologjie Egee!) e Susi Corazza de Universitât dal Friûl, che nus spiegaràn i studis efetuâts su cheste grande scuvierte archeologjiche.

Lis gnovis su Rovul!

Nosere o ai vût cualchi gnove su Rovul, cemût che al stâ e dulà che al è! =)
Duncje, subit dopo dal sgjâf i adets a àn proviodût al calc: prime di dut il scheletri al è stât netât ben de tiere e metût in lûs; daspò i è stade metude parsore une colade di une gome speciâl che aderint ai vues e permet di stacaiu de tiere in maniere sigure, tocut par tocut.
Duncje cumò al è stât puartât intal laboratori de universitât dal Friûl, in vie Largje a Udin, in spiete dai risultâts des datazions; difat tre framents a son stâts mandâts in tre laboratoris difarents pal Radiocarbonio, cussì o savarin tros agns che al à il nestri von! =)

La fadie di jessi archeolic

Ta chescj dîs al è vignût fûr un dibatit sul Gazetin tra il prof. Gianfranco Ellero e la prof.se Paola Cassola Guida de Universitât dal Friûl su lis condizions dal tumul di Sant Svualt, sgjavât tal 2002 e dopo lassât un pôc al so destin. Al è di dî però che chest al è un probleme che si presente puntualmentri intun sgjâf archeologic, za a son pôcs i bêçs par sgjavâ (il plui des voltis cence paiâ chei che a lavorin...), ae fin i sîts a vegnin lassâts a mieç propite par chest probleme. Us met intai prins doi coments i intervents.