Conseis pal Istât

Istât par tancj e je sinonim di relax e leturis sot dal ombrelon, e alore ve ca cualchi consei, secont il gno modest parê: L’Alchimista e Veronica decide di morire, ducj doi di Paulo Coelho, un grant autôr moderni de scriture semplice e scorevule che al sa dâ impuartants insegnaments di vite.

Studis archeologjics su Qatna

Al è stât publicât il volum, curât dal prof. Bonacossi, che al dâ cont de cunvigne internazionâl davuelzude a Udin tal 2004, dulà che al jere stade ricostruide la storie dal sgjâf di Qatna, important insediament dal Vicin Orient antîc. Us ricuardi che il sgjâf al è za di cualchi an puartât indevant cun suces de Universitât di Udin.

Aperitîf archeologjic!

Il mês di Lui o podês unî l’aperitîf cu la culture! Eh sì, difat a Aquilee son stât organizâts, ogni vinars aes 17.30, dai incuintris cun degustazions di vin e percors culturâi! Bon divertiment! =)

Contaminazions

Interessantissime esposizion museâl intal Museu Archeologjic dal Cjistiel di Tor a Pordenon. Il percors das oparis dal artist contemporani Elio Armano si disvilupe traviers lis variis salis alestidis (de preistorie al rinasciment) permetin un dialic tra l’ambient museâl, viodût come istituzion vive e vierte a diviersis propuestis, e chel de art moderne, ae cuâl si dâ dignitât museâl. La mostre e sarà viarte fint al 8 di dicembre cui seguent oraris: vinars, sabide e domenie des 15 aes 19 (di Otubar des 15 aes 18), domenie ancje des 10 aes 12.

A vore!

Doman, lunis ai 14 di Lui, o tachi a sgjavâ a Codroip inte zone dal Parc des Risultivis, par zontâ un pocje di esperience in sîts protostorics.

Cjastelîr de Gradiscje

Il sît, localizât inte zone des risultivis di Codroip e logât suntun grun di tiere, al conserve lis olmis di un cjastelîr, frecuentât intal Bronç resint-finâl I (1300-1100 p.d.C.) e tal Bronç finâl III-Fier iniziâl (1000-800 p.d.C.). Dal abitât si conserve il rilêf residuâl dal tiereplen sui lâts orientâl e ocidentâl e strichis di stratificazions protostorichis disturbadis in divierse misure di intervents agraris di ete romane. Intes precedentis campagnis di sgjâf (2004-2007) a son stadis viertis des trinceis esplorativis che a àn intercetât tocs di stratificazions protostorichis su lis clevis margjinalis; in particolâr scarics ceramics e olmis struturâls databilis tra il Bronç Resint Evolût e Bronç Finâl 1. Inte campagne 2008 si proviôt la prosecuzion de esplorazion des evidencis struturâls e dal jemplament dal fossâl interni. Lis ricercjis, che si davuelzaran dai 30 di Jugn ai 25 di Lui, a son organizadis dal Museu di Codroip in colaborazion cu la Societât Furlane di Archeologjie -sezion Friûl di Mieç- cu la direzion di Costanza Brancolini e Giovanni Tasca. I partecipants a saran impegnâts sot la vuide di operadôrs esperts intes operazions di: individuazion e delimitazion, pulizie, documentazion in plante e sezion di US; lavade e prime sistemazion dai reperts ceramics; documentazion e classificazion preliminâr dai reperts.

Serade cui Chieftains!

Ce figade! O ai stât a viodi un concierton pardabon biel! O ai di ameti di no sedimi mai interessade ae musiche folk, ma nosere o ai assistût a un spetacul dulà che mi soi propite divertude e che mi à permetût di cognossi un gnûf (par me) gjenar di musiche. Inte biele cornîs dal zardin su in cjistiel a Udin a sunavin il grup “La Sedon Salvadie”, oviamentri autoctons =) e dopo di lôr un grant grup irlandês “The Chieftains”, considerâts i esponents de vere musiche irlandese! Biel! Biel! Biel! =)

barbara

E mancjave dome une persone speciâl che e je lontan ma che o sai che e jere dongje di me cul pinsir...mandi stele, si viodìn prest! =)

dotore dal bus dal cul!

Je ai fate ancje jo!!! No rivi inmò a crodiiii! Un grazie di gnûf a ducj chei che a son vignûts a sostignîmi, i miei parincj, lis mês compagnis di universitât (che o ringrazi ancje pal “biel” travestiment, ve possino...) e ai amîs e amiis che mi an sopuartade cu lis mês paranois! Une bussade grandonone a ducj!! E grazie ancje pai regai...! ;)

LAUREADE!!

Jo o ai inmò di realizâ ce che mi è sucedût vuê, ma mi pâr, des fotos che dome cumò o ai cjalât, che o jeri propite jo chê cu la corone di orâr sul cjâf che lave ator par Udin! =)

cence peraulis...

Neolitic di Samardencje

Secont i studis fats dal Cnr di Faenza, la ceramiche che e ven dal sît neolitic di Samardencje, e je risultade une vore resistente parce che, dilunc i secui, i rescj antropics (ven a stai i vues umans) e àn emetût il lôr fosfar che si è leât ai rescj ceramics. Al è vignût fûr cussì un prodot a altissime resistence. Ce che al veve fat aprofondî i studis su chest fenomen e jere la estreme puaretât di rescj di vues intun sît cussì a lunc frecuentât, e la strane concentrazion di fosfar intes ceramichis sapulidis. (Inte foto dai esemplârs di ceramiche di tipo Fiorano che e ven di Samardencje).

Istât archeologjiche!

Stufs des solitis sieraduris estivis? L'Istât no saveiso mai ce fâ? Veiso voie di stuzicâ la vuestre curiositât? La Socjetât Furlane di Archeologjie -Sezion Cjargnele- e à organizât, insiemit a cetancj comuns de montagne, un cicli di incuintriis a teme archeologjic che si davuelzaràn dai 26 di Lui ai 11 di setembar 2008. Vechì il link cun ducj i apontaments di no pierdi!

Archeologjie e gnovis tecnologjiis

Su Archeologia in rete e je segnalade une biele gnove che rivuarde la Universitât di Udin e Aquilee.
Par lei dut la notizie fracait chi.

A vore cu la SFA

La Societât Furlane di Archeologjie e à la pussibilitât di tignî in servizi 3 volontaris par 12 mês grazie al servizi civîl; i zovins e àn di vê tra i 18 e i 28 agns e interess particolâr pes tematichis storic-archeologjichis (miôr students dal setôr). Jo no ai podût jentrâ par pôs mês (sigh!) par vie de etât, ma par cui che al è interessât e sarès di sigûr une biele esperience e un bon mût di fâ pratiche tal setôr. Plui informazions lis cjatais a chì: www.serviziocivile.it .

Il simbul di Crist in place a Aquilee

Dilunc dai lavôrs di ricualificazion de place Cjapitul a Aquilee al è vignût in lûs, suntun paviment di cuet, un mosaic cun rafigurade une rose inseride intun otagon; su ognidun dai petai de rose a son visibilis lis letaris “X” e “P” che a stan a indicâ il monogram di Gjesù Crist. Cheste scuvierte no puarte nuie di gnûf sot il soreli; di fat al è ormai ben clâr il rûl che a à vût Aquilee tal disvilup dal Cristianesim, dut câs al è simpri un segn de fuarte religjiositât che e jere presinte inte citadine.

Ete di mieç a Triest

Dal 12 di Lui al 25 di Zenâr il cjastiel di Sant Just al ospite la mostre “ Ete di mieç a Triest. Istituzions, art, societât intal ‘300”. Il cjastiel e la omonime basiliche si presentin ae fin di un radicâl restaur. Cun di plui al è stât alestît un itinerâri medievâl cun segnaletiche di pueste.

Aiar di fieste...

Vuê o ai stât a Sant Denêl ae fieste dal pressut cun lis mês amiis Barbara e Debora (cun me te prime foto) e “casualmentri” o ai cjatât ancje Christian (velu achì!).Ducj insiemit si sin sglonfonâts di pressut e des mitiches crêpes dal “baffo”! =) Come simpri une biele fieste sul serio; cjaminant pal centro no ai podût fâ di mancul di jentrâ inte gleseute di Sant Antoni, pardabon un bombon, cun dai afresc une vore biei e di grant impat apene che si jentre. Ve chì une foto che e rint però pôc la bielece di chest puest.

Volêso fâmi un regâl?

Us doi un aiût se o volarês fâmi un regâl in viste de lauree! =)
Cjoleimi chest!! =)

vie in stampe!

E je lade in stampe... finalmentri! La mê tesi! =)
Il titul al è: "La tomba 31 di Colle del Forno", e al è il gno studi sui materiâi di une tombe che e fâs part di une necropoli sabine che o vin scavât cul prof. di etruscologjie dongje Rome. Al inizi il lavôr mi someave grandonon, mi soi fate dôs setemanis sierade intal museu di Fara Sabina a netâ, selezionâ, catalogâ e disegnâ no sai trops tocs di dimensions a voltis ridiculis pûr di cjatâ fûr une cualsisei corispondence jenfri di lôr! Daspò il lavôr al è passat sui libris par tirâ fûr un pocje di storie de necropoli, di tipologjiis di tombis che si cjatin in chescj lûcs e di confront tra materiâi. Un lavoron che mi a puartât vie un biel pôcs di mês ma che ae fin mi à lassade sodisfate! Cumò starìn a viodi cemût che a va in chê dì! O soi un tic spauride! =)

biele iniziative

Us segnali cheste biele iniziative dal comun di Gonârs, inmaneade grazie a une propueste de mê amie Francesca (vele inte foto cun me intun moment...ehm... di fieste!). Dilunc de setemane dal 16 al 20, ogni dopomisdì, i fruts di elementârs e mediis a podaràn discuvierzi l’apassionant mont de archeologjie, compagnâts di une zovine che de archeologjie e à fate une mission! Il percors a si sviluparà cun lezions teorichis su cemût che si davuelç il lavôr di archeolic; podopo no mancjaràn esercitazions sul cjamp, dulà che i frutins a podaràn meti in pratiche ce che a àn imparât. Di sigûr une esperience une vore costrutive, sedi par stâ insiemit e imparâ il lavôr di grup sedi par viergi i voi su cheste dissipline inmagant! Brave Francesca, o speri che a fin lavôr tu nus contarâs de to esperience! =)

Varino di riscrivi la preistorie?

Une scuvierte sensazionâl e stares par sconvolzi dutis lis cognossincis che o vin fint cumò su la preistorie!
Dal 2006, di fat, un archeolic bosniac-american, Semir Osmanagic, al è daûr a scavâ une culine a Visoko, a 30 Km di Sarajevo in Bosnie; il studiôs al è convint che sot il strât di vegetazion che al ricuvierç la coline e sedi taponade une costruzion umane che, daûr lis misurazions, e sares adiriture plui grande de piramide di Cheope a Giza, in Egjit. In efiets a viodile, la coline e presente une forme une vore gjeometriche, masse perfete par jessi naturâl; cun di plui a pocje distance, atris colinutis plui piçulis a nascuindaressin ancjetantis costruzions piramidâls.
I prins rilevaments a confermaressin lis ipotesis dal archeolic; lis parêts de coline a son ricuviertis di lastrons di calcâr, perfetamentri incjastrâts tra di lôr e orientâts cui ponts cardinâi. Su la piche dal cuel a son vignudis in lûs stradis di claps e in cualchi bande ancje struments adats ae lavorazion de piere.
La costruzion, clamade “Piramide del Sole”, e sares opare di une civiltât vivude plui di 12.000 agns fa, e chest al fâs capî trop impuartante che a sares cheste scuvierte; a metares in discussion dutis lis modernis teoriis su lis popolazions vivudis te antichitât. Basti pensâ che lis piramidis egjiziis a son datadis a “dome” 3500-2500 agns fa!
Starin duncje a viodi i svilups di chescj studis, intant o podin dome fantasticâ su ce che la ment umane cussì primitive e po vê creât a pocje distance di noaltris!

A la Bikerfest

Come che o ai za dit, chi o fevele no dome di archeologjie. E cussì ve chi che o soi a la Bikerfest a Osôf! =)
O soi stade contente parcè che o ai viodût un grum di motos che mi plasevin, ma come prime moto mi sa che o cjolarai cheste chi! =)

Vilaç altmedievâl a Glemone

Dilunc dai lavôrs sui zardins dal cjstiel di Glemone a son saltâts fûr cetancj rescj di un vilaç altmedievâl, datâts ator il X-XI secul. Grazie al interessament dal conseîr comunâl Gianfrancesco Gubiani, che al à interpelât la sovrintendince, si è podût lâ indevant cui sgjâfs che fint cumò a àn puartât in lûs creps di ceramiche e rescj di un paviment. Il vilaç al jere situât cuasi a straplomp dal cret, ma la grant part e a ancjemò di sedi tirade fûr.

Gnûf blog di storie furlane!

Ancje il nestri amì Sandri si è cimentât cuntun gnûf blog che al sarà une vore interessant par ducj i apassionâts di storie! Brâf Sandri, chest al sarà spont par me che o varai une gnove font di notiziis e une ocasion par colaborâ, e par ducj chei che a vuelin cognossi finalmentri un pôc di plui la nestre storie!

Friûl in prin

Ai 4 di Jugn aes 11 in vie Manin 15 a Udin al vignarà presentât il progjet atuât dal Archivi di Stât di Udin “Friûl in prin” (www.friulinprin.beniculturali.it), o ben une anagrafe storiche des fameis furlanis, il plui complet archivi storic mai realizât in regjon e un model avanzât ancje a nivel nazionâl.
Il sît internet al permetarà ricercjis di tipo storic-linguistic colegadis ae identitât locâl des minorancis furlanis e slovenis, ae cognossince de tradizion onomastiche dai grups familiârs, e par agregazion di dâts, aes culturis sociâls di un luc e des sôs popolazions.
Chest sît cun di plui al sarà util ancje a chês fameis che a vivin tal forest e che a vulin ricostruî lis lôrs lidrîis.

Sgjâfs in Friûl

La Societât Furlane di Archeologjie e a presentât lis campagnis di sgjâf atuadis cheste Istât, dulà che si pues partecipâ come volontaris par vivi la esperience di archeolics. I sîts a son une vore interessants e diviers: Paestum, Cjastelîr di Gradiscje, Atimis (cjistiel superiôr e Sant Zorç) e Verzegnis (Cuel Mazéit). Us met achì il link cui programs.

...

Tra sagre, lavôr e apontaments no ai timp par curâ il gno blog in chei dîs a chi…
O speri di podê polsâ almancul lunis…

Fieste a Vissandon!

La nestre e je une piçule proloco nassude di pôc, ma cuant che si trate di fâ fieste nissun si tire indaûr!! Us spietin numerôs in place a Vissandon vinars, sabide e domenie cun grups dal vîf, chioscos e robe buine di mangjâ!! Me mi cjatarês a spinâ bire! =)

A dute culture!!

A Branc di Tavagnà dai 16 ai 25 di Mai si davuelzarà la seste edizion de manifestazion culturâl dal titul “A dute culture…Langobarts, toponomastiche, archeologjie, libris e rapuarts culturâi cun Weisskirchen”, event organizât dal Assessorât ae culture dal Comun di Tavagnà, de Societât Furlane di Archeologjie e de Societât Filologjiche Furlane. A saran presentâts un grum di events e interessantis cunvignis, un apontament di no pierdi pardabon! =)

Setemane aquileiese

Dai 15 ai 17 di Mai si davuelç la XXXIX setemane di studiis aquileiês sul teme: “Aspiets e problemis de romanizazion – Venetia, Histria e arc alpin orientâl”. La cunvigne e je organizade dal Centri di Antichitâts Altadriatichis in colaborazion cul Dipartiment di Siencis de Antichitât e cu la Scuele di Specializazion in Archeologjie de Universitât dai Studiis di Triest e e fasarà il pont su lis ultimis scuviertis des primis fasis de presince romane dai teritoris dal alt Adriatic. Ve chì il link cul program da lis zornadis.

I sîts protostorics in Friûl

E je tacade vuê une biele cunvigne su la preistorie furlane. A Vile Manin e a Udin par 3 dîs la Universitât dal Friûl e fevelarà di un periodi de nestre storie une vore pôc cognossût, ma che al merte pardabon di jessi aprofondît.
Tal prin coment us met dut il comunicât.

Te foto il sgjâf de Universitât dal Friûl tal cjastelîr di Grediscje di Sedean

1000!

A pôc plui di doi mês de screade di chest blog o soi rivade a 1000 contats!! Grazie a ducj chei che a son passats par chi! Maman! =)

L'om preistoric in Friûl

Prins abitants in Friûl: ultimis scuviertis

Dott. Andrea Pessina

Codroip, 9 di Mai 2008

I prins pas dal om tai nestris teritoris a son avignûts tal Paleolitic Inferiôr, o ben tor i 450.000 agns indaûr. La prime robe di tignî a mens e je che l’om moderni al è rivât in Europe traviers la penisule balcaniche e che duncje la nestre regjon e je stade un pont di pasaç viers chê taliane; al è partant inevitabil rinvignî olmis di chês popolazions che si spostavin ben planc cirint puescj simpri gnûfs e di ben stâ. Il sît plui impuartant che o vin in regjon dilunc chest periodi di glaciazions (di fat e jere a pene finide la glaciazion Wörm) al è chel di Visogliano, dongje Triest, che al à tornât rescj umans dal om di Hildelberg (in particolâr cualchi dint e une mandibule); si tratin dai rescj plui antics in Italie. Chest ripâr al testemonee ancje une impuartante industrie litiche, durade almancul 100.000 agns. Ma chest al è ancje il periodi dal om di Neanderthal (caraterizât soredut da l’ûs di sepolturis, duncje cu la presince di une cualchi forme di religjositât); in Trentin e in Venit al è testemoneât fint a 1.300 metris di cuote. Chi in Friûl lis sôs olmis a son miôr documentadis in grotis o ripârs come intal Cjars: inte Grotta Pocala, indagade za tai agns Trente, a Divje Babe (Slovenie) dulà che a son stâts cjatâts femurs cun busis, forsit doprâts a mût di flaut,o ancjemò a Krapina (Croazie) dulà che il Neanderthal al praticave la scuoiadure di animâi. Ma il sît forsit plui impuartant e je la Caverne dai Ors a San Dorligo della Valle, che par milenis e je restade sigjilade di une frane: chest al à permetût di conservâ numerôs rescj di ors des cavernis, animâl considerât une vore impuartant in chê ete e chi forsit al vignive praticât une sorte di cult dal ors. In Venit impuartant al è il sît di Fumane, cun rescj ben conservâts e cun cetancj claps piturâts; intun adiriture si rive a cognossi une figure umane cuntun cjapiel (forsit la imagjine di un siaman). Par tornâ in Friûl e ai sîts dal Paleolitic Inferiôr vegnin segnalâts ancje chel di Busa della Villotta a Plan dal Cjaval, chel di Biarç (Vals dal Nadison) dulà che si son ben conservadis lis faunis che comprendin un grum di rescj di pes, inte zone colinâr, dongje il lâc di Ruvigne e ancje inte Basse dongje Muçane. Sui monts o cjatin sît di cjaçadôrs comprendûts tra i 8000 e i 5000 agns indaûr come inte conche di Sauris, Casera Festòns, Casera Jeluz, Pramuel; in chescj puescj a rivavin probabilmentri grups de Austrie, stant che l’aces di chê bande al jere plui agjil, e che a bivacavin culì par dopo tornâ a partî pe cjaçe viers zonis cun clime plui bon.

Apontaments

Us segnali un doi interessants apontaments che si tignaran a Codroip inte Sale Consiliâr (in plaçe Garibaldi 81).
Ai 9 di Mai aes 20.45 incuintri cul dr. Andrea Pessina sul teme “Prins abitants in Friûl: gnovis scuviertis”.
Ai 16 di Mai, simpri aes 20.45, incuintri cul dr. Ludovico Rebaudo (gno prof. di archeologjie classiche!) sul teme: “Evoluzion de art de sculture in ete classiche in Friûl”.

Ce pôre!

Vuê o ai consegnât il modul par la amission al apel di lauree dal mês di Lui…cumò no si torne plui indaûr! =)

I cjastiei furlans/2

O continui cun la rassegne dai cjastiei furlans: us vevi fevelât di chel di Atimis superiôr, vuê o viodin chel inferiôr. Datât ae metât dal XIII secul, nol ufrìs ancjemò la pussibilitât di visitâlu parce che no je mai stade inviade une campagne di recupar. Di fat, la struture e je pericolant, son restâts dome pôs rudars e une tor parzialmentri demolide. Par chel che al rivuarde i materiai e je stade fate dome une ricercje superficiâl dal teren e la uniche robe rilevant vignude fûr al è stât un toc di ceramiche grêse cun motîfs decoratîfs tipics de basse Ete di Mieç. Il fat che duncje a sedin doi cjastiei a Atimis al po derivâ dal fat che a fossin stadis das divisions tra i nobii di Attems, o forsit par vê un atri pont strategjic.

Lis marmotis dal Clusantin

Sul gnûf numar di Archeologia Viva al è un biel articul suntun ritrovament preistoric inte grote dal Clusantin, intes Prealps Cjargnelis. Si trate di un sît dal periodi Epigravetian (tra i 20000 e i 11000 agns indaûr) cun numerôs rescj di selci schegjadis (plui di 2500 tocs), utilis par spelâ e par netâ lis piels da lis besteutis; ma ce che al à colpît di plui al è stât il ritrovament di un grant numar di carcassis di marmotis, che al à fat pensâ che chest al fos propit un sît dulà che si lavoravin in particolâr chestis bestiis. Il sgjâf al è stât puartât indevant tal 2005 dal Laboratori di Ricercje archeologjiche da la Universitât di Ferrara e al à ricuardât trop impuartante che e je la archeozoologjie tal studi dai sîts preistorics; di fat tal articul a vegnin ben spiegadis lis tecnichis di macelazion e di lavorazion des besteutis. =(

L'ugiat

Vuê us presenti il gno tatuaç, che nol podeve che jessi in teme cul Antîc Egjit, une storie che mi à simpri inmagât cui siei misteris e lis meraveis che nus à lassât. Chest al è l’ugiat, miôr cognossût come “voli di Horus”: al rapresente apont il voli dal diu falcuç Horus. La mitologjie e conte che Horus al jere fi di Iside e Osiride, divinitâts egjiziis. Ma Osiride al vignì copât dal fradi gjelôs Seth, che lu taià a tocs e lu sparniçà ator par dut l’Egjit. La femine Iside, iudade di sô sûr Nefti, dal diu Anubi e dal diu Thot, e cjatà i tocs e insieme lu imbalsamarin. Daspò Iside lu ripuartà in vite e chest al deventà diu de muart e dal aldilà. Ma Horus, cuant che al deventà grant, al frontà Seth in bataie par svindicâ la muart dal pari Osiride; il combatiment al fo lunc e cruent dulà che Horus al pierdè un voli. A la fin chei atris dius i u fermarin e a derin a Horus la sovranitât dal Egjit, invezit Seth al vignì slontanât dal paîs. Cussì inte liende il voli dal diu Horus al è deventât simbul di salût e protezion magjiche.

Gjite a Vignesie

Vuê o ai aprofitât de bielissime zornade par lâ a fâ un biel zîr a Vignesie cun lis mês amiis Barbara e Francesca! Partence cul tren di Udin e, une volte rivadis, cjaminade che no finive plui fint a Rialt e Sant Marc! Tante int, sorelon (mi soi ancje scotade l’agâr!) e doi pîts come dôs fertaiis!
O vin viodût tancj negoziis cun presits di no crodi ma tal Disney Store o ai scugnût jentrâ! E li o ai fat il gno bielissim acuist! *_*
A part la strache une biele zornade pardabon! =)

Cjastiei vierts!

Domenie ai 20 di Avrîl il Consorzi pe Salvaguardie dai Cjastiei Storics dal Friûl Vignesie Julie al organize la zornade dai cjastiei vierts in dute la Regjon, in particolâr mût chei che vie pal an no son visitabii. Pal cost di 5 euros o podarês visitâ bielecis come il cjastiel di Vilalte, di Cordovât, Mugle e v.i. Une ocasion di no pierdi! =)

L'om di Similaun

Vinars 18 aes 20.45 inte sale grande de Biblioteche Civiche di San Vît dal Tiliment si davuelzarà un incuintri culturâl dulà che a vignaran discutudis lis ultimis scuviertis sul om di Similaun. La mummie jo la ai viodude al museu di Bolzan e e à daûr di sé une storie une vore interessante: cjatade intal 1991 sul confin tra Italie e Austrie e à simpri coinvolt un grun di studiôs. E je stade datade a ben 5000 agns fa e si pense che il puaret al sedi muart in maniere violente par vie di une frece penetrade inta spale a çampe; cun di plui sul so cuarp a son stâts cjatât adiriture 57 tatuagjos! Al jere za di mode!! =)

Spider pork, spider pig [ITA] versione completa

Un regâl par un amì =)

I cjastiei furlans/1

Dopo la mê visite a la mostre in cjastiel a Udin, dulà che si fevelave dal sît archeologjic di Atimis, o ai pensât di fâ une sorte di rassegne sui cjastiei che o vin in regjon. Un biel mût par riscuvierzi puescj une vore biei e plens di storie. Il teritori plui siôr di chescj rescj e je la zone pedemontane orientâl che e va di Cividât fint a Tarcint. Cussì o ai decidût di tacâ a presentâus il cjastiel di Atimis superiôr. Lis ricjercis archeologjichis a son scomençadis cui agns ’70 ma dal 1998 in ca la Societât Archelogjiche Furlane e sta continuant a studiâ chest sît che al è chel plui antîc tra i doi presints a Atimis. L’edifici al è di origjn todescje, di proprietât de famee Attems. La forme e je pentagonâl ma lis resintis ricjercis dai Civics Museus di Udin a àn rivelât la presince di rescj muraris plui antîcs che no si riferissin al asset di vuê.
I tancj reperts tirâts fûr a son conservâts a Udin ma si spere prest di puartâju al museu di Atimis.
Se o volês fâ une biele cjaminade o podês rivâ ancje a pît fint li dal cjastiel!

Tieris di incuintri

Joibe 17 aes 18.00 inte Cjase de Contadinance sul cjastiel di Udin al vignarà presentât dai profesôrs Mitja Guštin e Andrea Saccocci il volum “Tieris d’incuintri contats e scambis di lunc lis Vals dal Nadison e dal Lusinç da antichitât a la Ete di Mieç” a cure di Giorgio Banchig, Stefano Magnani e Andrea Pessina.

Il mus tal gnûf mileni

O soi propit contente di daus cheste notizie: sabide ai 12 di Avrîl das 16.45 aes 18.45 in tal cjastiel di Colorêt di Montalban e vignarà presentade la cunvigne "Il mus tal gnûf mileni. Partner intas ativitâts sociâls: onoterapie". A vignaràn presentadis lis ativitâts di riabilitazion e di recupero atuadis grazie a chest simpatic e bon animalut, da lis potenzialitâts une vore grandis trop inaspetadis. La cunvigne e je organizade da la Asociazion Amîs di Totò o.n.l.u.s. in colaborazion cun la Comunitât Colinâr dal Friûl e il Patrocini dal Comun di Buie e Maian.

A cene cui Etruscs!

Une simpatiche iniziative de tratorie "Al cercjeben" a Colorêt di Prât: vinars 11 aes 8 di sere e vignarâ proponude une cene cuntun menù a base di specialitâts etruschis! La cene e sarà compagnade da musichis in teme, ancelis in toghe e vin servût in anforis! Une cerce dal menù? Bruschete cun luanie e olivis neris, sope etrusche, lasagnis sul jeur, cinghiâl cun puâr e râf, "schiaccia" cun fîcs secs! Viodût cussì al sune stran, dut câs compliments pe fantasie! =)

Il blog dal Comitât 482

Il gno blog, come che o varês viodût, nol fevele dome di archeologjie. Duncje us met achì, ancje se cuntun pôc di ritart, il link dal gnûf blog dal Comitât 482: comitât nassût in Friûl tal 2002 par tutelâ lis comunitâts linguistichis e nazionâls de nestre regjon (furlane, slovene e gjermanofone). Par me e je une robe une vore impuartante, che e vâl la pene di sostignî!

Fieste de solidarietât a Vissandon

Vuê intal gno paîs, Vissandon, comun di Basilian, o vin fate la fieste pe soliarietât: o soi stade contente parce che no dome o vin judât la comunitât di Fraelà ma ancje parce che o ai fate une rimpatriade tal mieç de mê int, des mês lidrîs. Cussì o ai bevût un tai cui miei coscrits, po dopo un cui cusins, e ancje cui cognossints... insome, o podês capî cemût che e je lade a finî la zornade! Cence contâ che o ai fate ancje la foto cun Dario Zampa! =)
Un grazie a ducj i organizadôrs, a chei che si son dâts tant da fâ in cusine e daûr il chiosco e a ducj chei che a son vignûts a cjatânus, grazie, grazie, grazie!!

Tornade!

Finalmentri o soi rivade a meti a puest il pc! =) Puar, plen di virus e cuisà ce atri...ma cumò al stâ mior e o podi tornâ a tacâ a scrivi! Maman a ducj!