Rome e i Barbars a Vignesie

Us segnali une biele mostre in cors a Palaç Grassi di Vignesie, considerade l'event culturâl dal an: Rome e i Barbars. E je stade inaugurade ai 26 di Zenâr e e durarà fint ai 20 di Lui. In esposizion 1700 ogjets che a rivin di 24 Paîs diferents cun documents, reperts e pituris che a testemonein la formazion de Europe da la colade dal Imperi Roman fint a la vignude dai Barbars.

Aule multimediâl in museu

Îr sul gjornâl o ai let une biele notizie che rivuarde il museu di Cividât: e je stade screâde la aule multimediâl…cuissà se a mi leiaran ancja di là?! =)

Pro memoria

Us torni a ricuardâ l’apontament cun le storie di ‘Savean, che e metarâ in mostre, dai 28 di Març ai 28 di Jugn, dutis lis ultimis novitâts a riguart dai sgjâfs e dai studis efetuâts sul so teritori. Us met achì ancje il link di un biel articul vignût fûr su Archeomedia, dulà che al è dut ben spiegât.

Pascute di culture

Vuê o ai passât il lunis di Pascute in plene culture, sfrutant i biliets a presit ridot che i Museus de nestre regjon a fasevin. Alore o ai stât a Udin in Cjistiel a viodi cheste mostre "I Goti dall'oriente alle Alpi".
O ai vude cussì ocasion di cognossi un popul che al è passât ancje par chi, ma che i stes storics e archeolics no àn inmò cjatât tantis testemoneancis: di fat se te toponomastiche o vin olmis tai nons di Gôt (dongje Glemone) e Godie (dongje Udin), l'unic sît che al è stât sgjavât al è chel di Sant Zorç parsore Atimis. Te foto grande o viodês un cjâf di femine, deformât parcè che chel popul al veve la usance di fassâ il cjâf fint di cuant che a jerin piçui: e jere une maniere par diferenziâsi di chês altris popolazions, une maniere par caraterizâsi. Fûr de bilietarie dal cjistiel o ai cjatât "par câs" Christian che al veve a pene cjolt il biliet e cussì i ai fat di vuide! =)

Buine Pasche!

Auguris a ducj di une Pasche serene!

La antighe Qatna

Vuê us presenti un biel e impuartant progjet che e stâ puartant indevant la Universitât dal Friûl insiemit cun la Direzion Gjenerâl des Antighitâts e dai Museus di Sirie. La nestre, ancje se piçule, e je une universitât ben inviade e cun progjets di rilêf, come che al dimostre chest lavôr che al vâ indevant cun bogns risultâts za di cualchi an. La mission archeologjiche a Mishrifeh, antighe Qatna, e à l’obietîf di ricostruî la storie, l’implant urban e il disvilup dal sît intai diviers periodis de sô storie, in mût di realizâ un parc archeologjic fruibil al public. Dongje de archeologjie a colaborin un grum di dissiplinis scientifichis come la antropologjie, la archeozoologjie, la archeobotaniche, la palinologjie, la gjeo-chimiche e v.i.

E je rivade la Vierte!

Finalmentri o jentrìn te biele stagjon, dulà che lis zornadis a son plui lungjis, la temperadure si alce e al è un plasê stâ di fûr, fâ cualchi cjaminade pe campagne o cualchi corse in biciclete! Vêso mai stât a fâ un zirut pe ipovie che e passe di lunc dal Cormôr? O podês partî dal parc dongje il stadio e lâ su fint a Buie! Jo une dì le ai fate dute, e crodêtmi, e vâl propite la pene!

Art a cost di ce??

Vuê o resti sciocade di une notizie che e zire sul web: il “pseudoartist” Guillermo Habacuc Vargas dal Costa Rica al varès metût intune galarie di un museu un cjan vagabont, peât intun cjanton de sale e lassât murî di fam e di sêt! Dut chest par sensibilizâ la opinion publiche sul probleme dal abandon dai cjans intal so paîs. Cun di plui al à vût il coragjo di clamâle opare di art! Centenârs di miârs di personis di dut il mont si son rivoltadis cuintri chest at disuman che secont me nol cjate definizion. Intun blog come chest, dulà che si propon e si publicize la art in ogni sô forme, no podevi no trasmeti chest messaç di indignazion e di rabie par chê che sta deventant “art a ducj i coscj”. Lei la notizie.

La archeologjie

Par lâ indenant o vin di capî cui che o sin e di dulà che o vignìn: cheste e je la archeologjie.
(Piero Pruneti, diretôr de riviste “Archeologia Viva”)

Lis presincis langobardis in Italie

Al Prin e ai 2 di Març a Udin e Cividât si è tignude une cunvigne nazionâl dal titul: "Lis presincis langobardis intes Regjons di Italie”.
Chest incuintri al fâs part dal “Progjet Langobarts” inviât de Federazion Taliane da lis Associazions Archeologjichis par metî in evidence lis realtâts plui piçulis intal periodi in cuistion, midiant da lis testimoneancis architetonichis, documentariis, iconografichis, religjosis, toponomastichis, e v. i. leadis a la storie dai singui lûcs e rivadis fint a vuè.
In fin a son stadis definidis lis prossimis tapis dal progjet, che a vignaran discutudis intun secont incuintri tal Novembar dal 2009 a Paestum (Sa), cun chescj temis:
- i cunfins e i sistemis difensîfs dai ducâts langobarts sul teritori nazionâl
- lis feminis dai Langobarts
- la toponomastiche riferintsi al periodi langobart.
La iniziative di Udin e Cividât e varà un seguit in ocasion de seste “Cunvigne di Toponomastiche locâl” a Branc di Tavagnà ai 17 di Mai dal 2008.

Visite a la mostre de simie crote!

Vuê o soi stade a viodi la mostre de simie crote in te glesie di Sant Francesc a Udin, come che us vevi segnalât chê altre dì.
E o scuen dîus che e je propite biele!!
Oltri che a vê tant materiâl di viodi e je ancje multimediâl e interative!
Jo e Christian (chi te foto cun me!) o vin provât i tancj esperiments che a jerin a disposizion: par esempli o vin fat la simulazion dal guant cence poleâr in maniere di provâ cemût che e funzionarès la man cence il dêt oponibil. Po dopo o vin provade une machine che e elaborave lis nestris musis e nus à fat viodi une simulazion che e invecjave i nestris caratars somatics: e cussì si sin viodûts come che o sarìn ca di 50 agns! Dut di ridi! Pardabon une visite di fâ!

Apontaments

Vierzidure straordenarie de tor medievâl di Puarte Vilalte a Udin in ocasion de setemane de culture. O podarês visitâle dai 25 ai 29 di Març, da lis 15.00 a lis 19.00. Us ricuardi che la tor e je la sede principâl de Societât Archeologjiche Furlane.

E ven fûr la ‘Savean romane.

Il curadôr dai Civics Museus di Udin, Maurizio Buora, al à evidenziât la impuartance de ‘Savean storiche evidenziade de sô posizion strategjiche sul as viari che al colegave in maniere trasversâl la planure Padane par rivâ fint a Aquilee e lant viers il flum Timâf. Grazie a indagjinis condotis di un equipe todescje a son vignudis ae lûs une strade romane in localitât Sant Gjal/Massile e i rescj di une fatorie romane te frazion di Privan. Cun di plui a son stadis cjatadis ancje monedis dal IV secul d.C. e un bronzut rafigurant Venere. Il 14 di Març e vignarâ vierzude une grande mostre a ‘Savean inte cjase medievâl di vie IV Novembar.

La simie crote

La simie crote. Storie naturâl da umanitât.
Ex glesie di sant Francesc, Udin, fint ai 21 di Setembar 2008.
Une biele mostre che nus puarte intal lunc viaç de evoluzion umane, daûr des ultimis teoriis e metint in relazion antropologjie, archeologjie, paleoantropologjie, zoologjie, gjenetiche e art.
Une esposizion nassude de colaborazion tra il Museu Furlan di Storie Naturâl di Udin, il Museu di Siencis Naturâls di Trent e il Museu Regjonâl di Siencis Naturâls di Turin.
Par savênt di plui, fracait achì.

Lis mês esperiencis (1)

Cuant che si tache a studiâ archeologjie si pense simpri al moment che si metarà pît in tun sgiâf: si fantastiche su trop che al podarà sedi interessant, si pense a dutis lis robis che a saltaran fûr sot dai voi e parcè no, si imagjine ancje un pocje di notorietât! Te Universitât di Udin i students a son mandâts a fâ pratiche a Aquilee, e prin o dopo ducj a podin contâ di cheste prime esperience come archeolics, ma soredut di trop dûr che al è in realtât chest lavôr, fat no dome di scovetutis e pineluts…

Cividât sît de Unesco

Za inviadis lis pratichis par ricognossi Cividât tal patrimoni de Unesco come sît storic de Italie dai Langobarts. Come che o podês lei tal Messaggero di vuê, il museu archeologjic di Cividât, vuê direzût de dot.e Serena Vitri, al è stât inaugurât tal 1990 inte sede atuâl. Chest museu, che al à dentri ancje reperts di ete romane e medievâl, al ospite une des plui grandis colezions langobardis. Duncje, se o passais par là us consei di fâ un salt a viodilu, ma no stêt a dismenteâsi nancje il templut langobart sul Nadison.

La mê cariere

La mê passion pe archeologjie e je scomençade cuant che o jeri piçule: i miei mi puartavin simpri a torzeon e jo mi incocalivi a cjalâ i vecjos borcs, lis cjasis di une volte, lis glesiis di agnorums, lis citâts plenis di storie e di culture. Po dopo une dì, tal gno piçul paisut (Vissandon), e je stade scuvierte par câs une tombe longobarde: la mestre nus puartà a viodile, e jo frutine o restai cussì incantesemade di chei cuatri vues inte buse che mai insumiai par setemanis! Di in chê volte o ai simpri let tancj libris su la storie e viodût un grum di documentaris di Piero Angela! Vignude grande (migo tant…) o ai lassât i miei siums di frute intal caset, fint cuant che a Udin a àn viert il cors di Archeologjie! Nol jere plui dome un sium il gno! Di fat…

Parcè chest blog?

Prin di dut o ai volût vierzi chest blog par vê un spazi dut gno, dulà che o pues fevelâ de mê grande passion e di condividile cun ducj chei che a amin la archeologjie, par dâ finalmentri spazi a un mont tant biel e interessant tant che ancjemò pôc valorizât. Po dopo o ai volût fâlu par furlan par slargjâ simpri di plui la famee di bloggarins in marilenghe, par mostrâ che ogni setôr al pues sedi frontât e discutût te nestre biele lenghe!

mandi!

Chê chi o soi jo a vore! =)