Doman, lunis ai 14 di Lui, o tachi a sgjavâ a Codroip inte zone dal Parc des Risultivis, par zontâ un pocje di esperience in sîts protostorics. Il sît, localizât inte zone des risultivis di Codroip e logât suntun grun di tiere, al conserve lis olmis di un cjastelîr, frecuentât intal Bronç resint-finâl I (1300-1100 p.d.C.) e tal Bronç finâl III-Fier iniziâl (1000-800 p.d.C.). Dal abitât si conserve il rilêf residuâl dal tiereplen sui lâts orientâl e ocidentâl e strichis di stratificazions protostorichis disturbadis in divierse misure di intervents agraris di ete romane. Intes precedentis campagnis di sgjâf (2004-2007) a son stadis viertis des trinceis esplorativis che a àn intercetât tocs di stratificazions protostorichis su lis clevis margjinalis; in particolâr scarics ceramics e olmis struturâls databilis tra il Bronç Resint Evolût e Bronç Finâl 1. Inte campagne 2008 si proviôt la prosecuzion de esplorazion des evidencis struturâls e dal jemplament dal fossâl interni. Lis ricercjis, che si davuelzaran dai 30 di Jugn ai 25 di Lui, a son organizadis dal Museu di Codroip in colaborazion cu la Societât Furlane di Archeologjie -sezion Friûl di Mieç- cu la direzion di Costanza Brancolini e Giovanni Tasca. I partecipants a saran impegnâts sot la vuide di operadôrs esperts intes operazions di: individuazion e delimitazion, pulizie, documentazion in plante e sezion di US; lavade e prime sistemazion dai reperts ceramics; documentazion e classificazion preliminâr dai reperts.
5 commenti:
Mandi Ninine, viôt di no fâ la buse masse in sot, se no e ven fûr la aghe di risultive :P
Alore? cemût ise lade cu la aghe? ;-)
Eh, come prime zornade no je lade tant ben, tor 11 di matine o vin scugnut sierâ dut e scjampâ vie di corse seno o cjapavin une lavade!!!
=(
La zornade però e je continuade intal museu di Codroip dulà che la Brancolini nus a vuidât ae scuvierte dai repert vignûts fûr in chei atris sgjâf dai cjastelirs! =)
Quant che tu tachis a scavà a Gridisçje familu savè che i ven a partati la gulision.
Edgar mi plasarès tant partecipâ al sgjâf di Gradiscje ma cumò o soi impegnade a Codroip, cuindi chest an nuie! Ma stant che no tu ses tant distant tu podis puartamile distess!! =)
Posta un commento