Vuê il Messaggero Veneto al à proponût la pagjine Marilenghe, curade de Societât filologjiche furlane.O ringrazii la Sff e Sonia Sicco che e à scrit un toc dedicât ai blogs par furlan e mi à clamât par domandâmi une opinion a rivuart.
Tal prin coment us met l'articul. =)
3 commenti:
Miercus Prin di Avrîl
Messaggero Veneto
pagjine Marilenghe
MERCOLEDÌ, 01 APRILE 2009
Pagina 15 - Speciali
Furlans in rêt, e rive la manie dal “blog”
Dal “Furlanist” ae archeologjie sul computer: viaç tal mont virtuâl
di SONIA SICCO
La voie di comunicâ par furlan e cor te rêt. Un mont virtuâl dulà confrontâsi, cognossi int ma, soredut, condividi passions e interès. Dut chest scrivint intun blog, un diari personâl, in marilenghe: une forme di comunicazion che e à gambiât la maniere di relazionâsi e no dome chê dai zovins, par fevelâ di art, archeologjie, o salacor nome contant ce che al è sucedût te place dal paîs.
La aventure dal blog e tache tor la fin dai agns Novante, cuant che un american passionât di cjace al vierç la sô pagjine su internet. La robe e scomence a incressi a metât dal 1999, cuant che si forme la plateforme Blogger insiemit a altris servizis a gratis che a permetin di publicâ un blog in maniere semplice e svelte. La cognossince dal mieç si sparnice e i blog si jemplin di contats.
Il prin blog fûr par fûr par furlan al nassè in gracie di Dree Venier, vuê diretôr de riviste mensîl in lenghe furlane La Patrie dal Friûl. La rêt le scuvierzè «massime doprant la mail – al conte Venier – po dopo lant ator pai sîts o ai scuviert i blog». Venier le à definide une «folgorazion: cuntun sisteme une vore sempliç tu podevis publicâ chel che tut vevis voie: il test publicât (il cussì clamât post) intun moment al podeve leilu dut il mont». Il blog ILfurlanist al va in rêt intal 2003, «juste un moment prime dal grant boom dai blog e lu ai sierât, parcè che aromai mi impegnave masse, cheste istât, juste un moment prime de crisi dai blog, cumò insidiâts dai diferents social network».
Il contribût des gnovis tecnologjiis al è stât grandonon. Seont Venier, «cumò sul web si pues meti in pîts dut un sisteme editoriâl in pratiche sore nuie e cuntun public in teorie mondiâl, se si è bogns di fâsi viodi».
La difusion dal blog tant che diari personâl e à puartât a slargjâ la pratiche de scriture, scuasi bandonade de int, deventade in gracie dal web sei autôr e sei editôr di se stesse. Un esempli di passion condividude tal web e je chê dal enoblog sommelier furlane (sommelierfurlane.blogspot.com) o chê archeofurlane, metude in pîts te rêt di Venusia Dominici (archeofurlane.blogspot.com). «La mê idee e je che, prin di dut chi in Italie, ma ancje in regjon, lis ricercjis archeologjichis a sedin tantis, ma pôc valorizadis – e spieghe la Dominici, studentesse universitarie a Udin – cussì o ai pensât di meti in linie lis mês cognossincis, lis novitâts in chest cjamp, i apontaments, lis mostris di podê lâ a viodi, par dimostrâ che chest nol è un setôr esclusîf, ma al pues jessi, anzit al à di jessi, usufruît di ducj». Fevelant de sielte di scrivi par furlan, Dominici e met in lûs che «o vin, almancul noaltris furlans, di cirî di fâ di dut par tignî vive la nestre lenghe e la nestre tradizion, dimostrant che la marilenghe si pues doprâle in ogni cjamp, in ogni setôr, ancje chel storic-culturâl. Cussì o ai pensât di fâ ancje jo il gno piçul, vierzint il blog dulà che ducj a puedin riscuvierzi il Friûl sot di une altre lûs e intervignî cun domandis, conseis e coments».
Ma a esistin ancje blog che a fevelin di ce che al sucêt tal dulintor come chel di Christian Romanini (christianromanini.blogspot.com), viert in ocasion des elezions comunâls di Maian dal 2006. O chei leteraris come Contecurte (contecurte.splinder.com) che si definìs «une ostarie leterarie, li che si cjatisi par lei cualchi conte e fâle cognossi ai amîs. Un lûc viert a ducj chei che a àn plasê di lei e di scrivi in marilenghe, ma ancje dome di imparâ a cognossile». Lant indevant, si cjatin ancje Brâf furlan di Stefano Gasti (furlan.splinder.com), Cîl glaçât (cilglaciat.blogspot.com) o chel dal Crot (ilcrot.blogspot.com). No mancjin i blog coletîfs, come Fantats furlans (fantats.splinder.com) o chei politics tant che chel dal Comitât 482 (com482.blogspot.com). A dimostrazion di une vivarositât che no cognòs confins linguistics, nancje tal web.
tu ti ses smenteade dal "Il Dono", visto ca ai lèt ca tu colaboris ancje cun lòr.... ;-))))
Hehehehe! Sì Bilite, o soi contente di podê colaborâ cul Dono, stant che no puès donâ sanc mi sint un tic utile ancje jo! =)
Posta un commento