Ultime lezion a Rives Darcjan

Vuê o vin vude la ultime lezion pal laboratori di archeologjie te scuelute materne di Rives e o vin creât i vâs come l'om primitîf! Cu la paste Das colôr argjile ogni frutin al à lavorât par fâ un vasut cu la tecniche dal colombin e a son vignûts fûr propit dai biei lavôrs!

Cun la lezion di vuê si finìs cheste mê esperience cui fruts des maternis, il belanç al è stât positîf, la partecipazion ative e la comunicazion par furlan plui semplice di ce che o crodevi, cussì piçui a son plui vierts a cualsisedi regjistri linguistic.

O speri che ancje par lôr il nestri incuintri ur lassi alc di positîf come che al è stât par me!

Mandi mandi! :)

Cuinte lezion a Rives

Vuê cui fruts o vin provât a dissegnâ come che a fasevin i oms primitîfs, o ben tun grant cartelon (la parêt de grote) o vin poiât lis manutis e po dopo o vin soflât polvar di claps ros masanât e misturât cun aghe par creâ il colôr (piture lavabile).

Cualchidun plui brâf al à ancje volût dissegnâ cul cjarbon (matite) i mammut cjaçâts e i bisonts!

A la fin o vin batiât la nestre grote "La grote dai oms primitîfs di Rives"! :)

P.S. Un grazie a la mê amie Francesca pal "spunto" ;)

Cuarte lezion a Rives

Cuai jerino i animâi che a vivevin te Preistorie in Friûl? Cemût si clamavino? Provìn a ricostruî un ambient naturâl de ete preistoriche come se al fos un puzzle e po dopo lu colorìn. Maron pal mamut e l'ors, grîs pal rinoceront, al è ce lavorâ! :)

Cui piçui invezit o vin lete la storie dal dinosaur Quattropunte che dopo a àn dissegnât, cuntun pocjis di plui pontis ma biei distes! :)

Tierce lezion a Rives

Vuê cui frutins di Rives o vin cognossût l'om primitîf!

O scuen dî che i piçui a son pardabon sveâts e a san un sac di robis! :)

O vin viodût cemût che si è evolût, dulà che al viveve, cemût che si vistive e cemût che si furnive il mangjâ. Po dopo si sin viestûts come lôr doprant la cjarte crespe, cui cu la piel di mammut e cui cun chê di cocodril... un cocodril primitîf oviamentri! :D

Seconde lezion a Rives Darcjan

Vuê o soi tornade te materne di Rives pe seconde lezion dal laboratori e cui piçui o vin fevelât inmò di dinosaurs cui... Gnognosaurs!

Cul jutori dai simpatics animaluts di Dree Venier o vin imparât a colorâju e a dissegnâju, e o scuen dî di vê scuviert dai piçui artiscj! :)

Mi à fat ancje plasê vê viodût che i frutins si visavin ancje di ce che o vevi fevelât chê altre volte, de nassite dai animâi preistorics, di cemût che a jerin fats e di cemût che si clamavin! Segn che chest laboratori ur plâs e ur stimole la fantasie. Cualchidun di lôr vuê al à ancje volût spiegâmi lis robis par furlan :)

Un gracie a Dree Venier pe disponibilitât

Gnove publicazion sul tumul di Merêt

Vuê o ai vût il plasê di vê e di lei la gnove publicazion sul tumul di Merêt dulà che si cjatin ducj i inzornaments sul sgjâf e la conservazion di cheste struture impuartantone.

Finît di sgjavâ tal 2008 de Universitât dal Friûl il tumul nus à dât indaûr une schirie di informazions sul periodi protostoric furlan, ancje in face al confront cun altris struturis di cheste fate presintis sul teritori. Di lui o vevin za fevelât chi , chi e cui fruts de scuele primarie "Candotti" di Codroip, che a jerin restâts inmagâts di Rovul e de sô storie. Cumò chestis scuviertis a son fruibilis di ducj ancje gracie a cheste biele publicazion (par cure de Associazion Culturâl "La Grame").

Mi auguri che chestis ricercjis a vadin indevant ancje tai agns a vignî, e je une part de nestre storie masse impuartante par che e vignedi dismenteade sot tiere.

Par chest post o ringraci in maniere particolâr l'assessôr Claudio Violino.

Gnûf laboratori archeologjie! 1 lezion

Vuê o ai tacât un gnûf laboratori di archeologjie par furlan cui frutins de scuele materne di Rivis Darcjan! O vin scomençât cuntun biel libri plen di imagjins di viodi e di tocjâ: i piçui a jerin entusiascj, cui che al saveve za, cui che al contave dal tirannosaurus-rex. O vin viodût insiemi cemût che a jerin fats e ce che a mangjavin, cemût che a nassevin e cemût che si son estints. Po dopo o vin creât insiemi parts di dinosaur e i fruts si son viestûts par recitâ intune conte cun protagonist un piçul dinosaurut.

Si sin diviertûts e, ancje se la grande part di lôr no fevele par furlan, a àn capît dut ce che ur ai contât, dimostrant di jessi flessibii e atents a ogni novitât, cence problemis di sorte. Chest al è un pont che bisugne sfrutâ cun lôr, e no fâsi masse fastidis a fevelâur par furlan di cualsisedi argoment, tant plui di ce che ur plâs!

Ultimis su la protostorie furlane

Us segnali un interessant articul vignût fûr sul ultin numar di Tiere Furlane, la riviste culturâl de Regjon, scrit de professore Paola Càssola Guida de Universitât dal Friûl sui ultins studis fats in merit ae nestre protostorie. In particolâr si fevele dai tumui e cjistielîrs cun riferiment particolâr a chei studiâts pôc timp indaûr (S.Svualt, Merêt e Sedean). Biel ancje il confront cu lis realtâts protostorichis dal Cjars, de Dalmazie e Istrie, segn di une civiltât slargjade e ben organizade.

La riviste si le pues lei scjamantle dal sît de Regjon Friûl-VJ a chest link.

O aprofiti ancje par visâus che domenie ai 29 di Zenâr aes 15.00 te canoniche di Vençon si tignarà une cunvigne dal professôr Agnul Floramo propit su cheste tematiche, cul titul "I cjastelîrs: olmis di antighe int in Europe e in Friûl". Di no mancjâ!

Bon 2012!

Us auguri un bon 2012! ;)

A àn disglaçât Oetzi!

Us segnali che sul ultin numar dal National Geographic di Novembar al è un biel articulon su lis ultimis scuviertis su Oetzi, la mumie dal Similaun, che e je stade sotponude a cetancj esams e autopsiis par determinâ biadelore la cause de muart e par confermâ une vore di dâts su la vite di chest om di 5000 agns indaûr.
Daspò 20 agns il misteri di cheste mumie al continue inmò a apassionâ tancj studiôs e ricercjadôrs!
Us ricuardi ancje che fin ai 15 di Zenâr dal 2012 e je visitabile la mostre temporanee su Oetzi al Museu Archeologjic di Bolzan,cu la ricostruzion dal om vignût dal glaç! :)

Dentri un tumul protostoric a S.Svualt

Come che us vevi dit, îr ai 14 di Otubar al è stât inaugurât il tumul protostoric a S.Svualt, dongje de Aziende agrarie universitarie. Cetante int e à partecipât entusiaste a chest event unic tal so gjenar, la musealizazion dal tumul dal periodi dal Bronç (1900 d.d.C. cirche) che al jere stât scavât al inizi dai agns 2000. La sepolture, esempli ecelent pe metodologjie di sgjâf puartât indevant soredut cul impegn de prof. Paola Cassola Guida de Universitât di Udin, e je stade mantignude cuasi dal dut intate, permetint cussì di mostrâ ai visitadôrs la costruzion e la inumazion dal defont.
Te ocasion al è stât ancje presentât il libri "Una sepoltura monumentale dell'antica età del bronzo: il tumulo di S.Osvaldo (Udine) - scavi 2000-2002" par cure di Paola Cassola Guida e Massimo Calosi (edizioni Quasar, Roma 2011) dulà che si puedin cjatâ dutis lis ricercjis fatis in chescj agns sul sît.
Il tumul al merite lât a viodi e par chest o podês, a partî di lunis ai 17 di Otubar, prenotâ lis visitis vuidadis clamant i Civics Museus di Udin il lunis des 10 ae 13 e des 14 aes 17 clamant il numar 0432 271767 o il Studio D Friuli il martars e joibe des 10 aes 17 al numar 346 3257139.
Jo mi auguri dome une robe, che dut chest entusiasim no si sfanti in pôc timp ma che al sedi di sproc par continuâ cu lis ricercjis in chest cjamp de nestre preistorie inmò dute di scuvierzi.

(Te foto la gnove costruzion par visitâ il tumul)

Gjite cun Glesie Furlane!

I contats jenfri la Glesie di Aquilee e i teritoris sot de sô jurisdizion, fint dilà dai confins naturâi des Alps, par riscuvierzi lis ricjecis spirituâls e culturâls dal Patriarcjât e de nestre Glesie mari. Chest al è stât il leitmotiv de gjite organizade di Glesie Furlane chest an ai 24 di Setembar, une zornade tal mieç di bielecis naturâls, culturâls e storichis.
O sin partîts un groput di personis in coriere di Vençon, intune matine frescje ma plene di soreli, ae volte dal pas di Mont Crôs di Cjargne: par me e jere la prime volte che o fasevi cheste strade e o scuen dî che za dome chest e je une emozion uniche! La strade che si sberdee jenfri lis montagnis intune spirâl simpri plui alte che e met bardabon i brivits! Subit dilà dal pas o sin jentrâts in tiere austriache, ma si sint une cierte sugjestion a savê che ancje li secui indaûr si scoltave la peraule dal patriarcje di Aquilee, a cussì tancj (e in chê volte inmò di plui) km di distance.
La prime tape e je stade Aguntum, une citadine che sot di se e tapone ancjemò une vore di rescj romans, segn di une frecuentazion di chel lûc za te epoche che e va dal I al VII secul dopo di Crist. Chi o vin visitât il museu archeologjic di gnove fate, bielin, ma lassaitmi dî, no mi à plasût il sisteme di ricostruzion dai rescj gjavâts fûr.
In bande dal museu di fat a son i scavos de antiche citadine cu lis termis, lis stradis, il foro e ancje une cjase tipiche de epoche; po ben, fâ archeologjie nol vûl dî "fâ sù parsore de robe vecje" ma valorizâ ce che al è za. Un pôc come che si viôt tal palaç di Cnossos a Crete, un "scempio" di ce che invezit la archeologjie e varès di tutelâ!
Dut câs e je di bande lôr la volontât di valorizâ ancje chel pôc che si à.
Cjamine che ti cjamine nus è vignude propite fam, e cussì si sin inviâts viers la tant insumiade "pause pal gustâ", intun puest bielonon che al cjalave sot dute la valade di Lienz!
Tal dopomisdì invezit o sin rivâts a Lavan, dulà che si cjatin i rescj di une glesie di fate tipichementri aquileiese! Chi pre 'Sef (de plêf di Guart) nus à ben spiegât la plante dal edifici e il so disvilup, emozionant.
Chi sot te foto si viodin i rescj de glesie, un puest che al merite visitât ancje pal contest dulà che si cjate, cuntune viste bielonone e une pâs incredibile.
P.S. al rientro no podeve mancjâ une soste par une birute prime di tornâ a passâ il confin! ;)

Viaç a Crete/part 2

O volevi contâus inmò alc dai palaçs minoics di Crete.
Il prin che o ai visitât al è stât chel di Knossos, dongje dal cjâf luc de isule, la citadine di Heraklion (nord di Crete).
Dal sigûr al è stât il plui impuartant sedi in ordin di grandece sedi par vie de mitologjie che culì si è svilupade; al jere a stâ in chest palaç di fat il famôs re Minosse, fi di Zeus e Europe, sovran just e savi che al puartâ al massim splendôr il palaç te sô epoche.
La figure, pal plui mitologjiche ma cun cetancj elements che a fasin pensâ a un personaç esistît pardabon (ancje Tucidide al fevele di lui te sô opare "Guerra nel Peloponneso"), e je leade ancje al mît dal famôs taur che i jere stât mandât di Poseidon, par che lui lu sacrificàs in onôr dal diu dal mâr.
Ma stant che la bestie e jere masse biele, Minosse al decidè di no copâlu, stiçant cussì la rabie dal diu. Par punîlu alore Poseidon al fasè inemorà dal taur la femine di Minosse, Pasifae. Dal amôr dal taur e de principesse e nassè cussì une creature mieze om e mieze taur, il Minotaur.
La ricorence cussì ossessive de figure taurine te mitologjie greghe, e minoiche tal specific, e je leade al fat che il taur al jere considerât une bestie sacre; di fat, sedi tes pituris che tes costruzions, si cjate dispès la figure dai cuars, simbul dal dopli podê dal re, chel divin e chel temporâl.
Frecuentis a jerin ancje lis tauromachiis, o ben lis lotis rituâls cul taur che si fasevin in ocasion di fiestis o celebrazions.
Te foto achì us ai metût une piture famose cjatade propit a Knossos dulà che si viodin i oms saltâ sul taur.
al continue...

Viaç a Crete/part 1

O volevi condividi cun voaltris part dal gno viaç di cheste Istât, dulà che o ai cirût di coniugâ relax, mâr, divertiment e culture (e ancje bon mangjâ :)). Beh, chel puest lu ai propit cjatât e e je la isule di Crete!
E jere la seconde volte che o lavi in Grecie (la volte prime a Kos) e o scuen dî che e je pardabon un mont a part, plene di storie, di personis une vore ospitâls e di un mâr fantastic!
Prime di partî o savevi bielzà ce che o sarès lade a viodi, cu la ferme intenzion di visitâ plui robis pussibilis ancje se i dîs par zirâle no saressin stâts tancj (la isule no je tant piçule, e je la cuinte par grandece tal Mediteranei, daspò Sardegne, Sicilie, Corsiche e Cipro).
La sô vicende, se ben leade a fuart cun chê de Grecie continentâl e cun chê dai paîs dongje (Turchie, Egjit e Italie in primis) e scomence però cuntune individualitât che le caraterizarà par ducj i prins milenis di storie, in chel periodi clamât "minoic".
Di fat, za tor dal II mileni devant di Crist e scomence a deliniâsi chê civiltât che nô o cognossin come "civiltât minoiche" caraterizade dai famôs palaçs, simbui di une organizazion de societât pardabon indevant par chei timps.
I plui famôs a son stâts Knossos, Festòs e Malia, ma dute la isule e je impregnade di sîts minoics plui o mancul piçui, che dal sigûr a vevin tra di lôr une fite rêt di colegaments ma che a jerin ognidun ben indipendents e autosuficients.
La carateristiche principâl di chescj palaçs e jere il fat che no jerin dome lis abitazions dai siôrs (dal re in chest câs) ma vêrs centris dal podê cun libar acès di bande ancje di dute la popolazion che e gravitave ator dal edifici (regolât di pueste) e che e contribuive al sostentament de comunitât intune sorte di "ben comun"; chei che si son conservâts miôr di fat fint in dì di vuê a son propit i magazins dulà che si esercitave il scambi di bens primaris (vin, vueli, aliments e v.i.). O torni a dî duncje, une organizazion de societât une vore plui "indevant" di chê che o podìn imagjinâ ancje dome vuê, dulà che i palaçs dal podê a son ben lontans dal condividi alc cu la popolazion...
al continue...

(te foto une viodude dal palaç di Knossos, tal nord de Isule)

Finalmentri!

Une biele gnove!
O soi di gnûf a fevelâ di tumui protostorics furlans!
Ai 14 di Otubar si inaugurarà la gnove struture che e permetarà di visitâ il tumul protostoric di S.Svualt, ogjet di indagjin tai agns passâts di bande de Universitât dal Friûl.
Ricuardìn che il tumul, sepulture monumentâl di un individui de ete dal Bronç, al veve dât indaûr impuartants risultâts e soredut il scheletri dal inumât, furnint cussì grandis prospetivis tai studis di chest periodi.
L'aveniment al è cetant impuartant ancje par vie che al sarà il prin sît di chest gjenar musealizât e visitabil, cun didatiche organizade pes scuelis, come tal sît Neolitic di Samardencje.
L'apontament alore al è ai 14 di Otubar as 11.00 daûr il vecjo "manicomio" dulà che a saràn presints i responsabii dal sgjâf, la retore Cristiana Compagno e altris autoritâts.
(te foto la cuvierture di claps parsore de sepulture)

Se al è masse cjalt...

Vêmi ca che o soi tornade, simpri plene di ce fats! ;P
Duncje, il cjalt nus fâs patî in chescj dîs de fin di Avost, alore o volevi proponijus un doi apontaments "frescs frescs" de Societât Furlane di Archeologjie in merit a sgjâfs che si tignaràn di chi a pôc.
Un al è chel di Atimis, li dal Cjistiel Superiôr, che si ten za di cualchi an in ca e che al scomençarà ai 29 di Avost fint ai 2 di Setembar (e une seconde campagne dai 5 ai 9 di Setembar), sot de direzion di Massimo Lavarone. Par cui che al volès iscrivisi ve ca telefon: 0432 26560 o mail: sfaud@archeofriuli.it o mlavarone@alice.it.
Chel altri si tignarà a Aquilee a partî dai 19 di Setembar e al rivuardarà il toc ocidentâl des muris tart antichis de citât. Ancje chi o podarês domandâ informazion li de Societât.
In fin dai 24 ai 28 di Otubar si podarà partecipâ ai sgjâfs a Morus, in localitât Muris, dulà che a son stâts indivuduâts dai rescj di chê che e podarès jessi une "vile rustiche" romane.

O aprofiti di chest post par ringraziâ i miei "sostignidôrs" che mi seguissin ancje vie pal Istât, buinis vacancis a ducj!

Dopo la Sirie il Mali

E je di chescj dîs la gnove che la Universitât dal Friûl, insiemi cu la Societât Furlane di Archeologjie e la Sorintendince ai bens archeologjics de citât di Djennè, e à discutût su la pussibilitât di tutelâ e valorizâ il sît archeologjic de citât centri africane, famose pes sôs cjasis di pantan e pe sô moschee fate dute di tiere. Si è cussì fevelât de eventualitât di inviâ une campagne di sgjâfs te citadine di Djennè par protezi un patrimoni unic intal so gjenar. O ricuardi ancje che la Universitât dal Friûl e fâs part dal 2009 dal Wheap - World heritage earthen architecture, pal miorament dal stât di conservazion e de aministrazion dai sîts architetonics di tiere tal mont.
(te foto la maraveose moschee di tiere di Djennè)

Gnûf sgjâfs a Codroip

Il Museu Civic di Codroip in colaborazion cu la Societât Furlane di Archeologjie - Sezion Medi Friûl - cu la direzion di Costanza Brancolini e Giovanni Tasca e la colaborazion sientifiche di Giovanni Leonardi e Michele Cupitò de Universitât di Padue, a organizin la VI campagne di sgjâfs tal cjistielîr de Gradiscje (Codroip, zone parc des risultivis) tal periodi dai 4 ai 29 di Lui.
Il sît, za indagât in altris campagnis (2004-2009), al à puartât ae lûs i rescj di un cjistielîr di planure datât tor dal Bronç finâl-prin Fier (1300-800 p.d.C). Chest an si indagarà une zone cun scarics ceramics e il fossâl interni.
Par podê partecipâ lait sul sît de Societât Furlane di Archeologjie par discjamâ il modul o domandait informazions al Museu Civic di Codroip (0432-820174) Lu- Ve 9.00-12.00 o mandait une mail achì scavocodroipo.2011@virgilio.it.
Bon sgjâf a cui che al podarà lâ!!

Cunvigne Aquilee...e auguris!

Doman ai 11 di Març si tignarà une cunvigne su lis ultimis ricercjis su la ceramiche e la tiere sigjilade di Aquilee. Si scomençarà aes 9.30 li de Sale des Cunvignis cun diviers intervents sui studis dai reperts ceramics iscrits di Aquilee e di altris zonis dal teritori.
La cunvigne, metude adun de Soreintendince pai Bens Archeologjics dal Friûl-V.J., de Societât Furlane di Archeologjie e dal Dipartiment di Storie e Tutele dai Bens Culturâi de Universitât dal Friûl, e varà ancje une relatore a mi une vore cjare, che juste îr si è laureade in Archeologjie te nestre universitât, Laura Gerri di S.Denêl, amie e compagne di cors...augurons e compliments femine! :)

Antiquarium e museu dal fossil a Paulêt

Al è aromai prossim ae vierzidure il gnûf Antiquarium e museu dal fossil di Paulêt, daspò tante spiete, li de Vile Pitotti.
L'alestiment al sarà screât tra pôc plui di un mês e viert, par intant, dome tal fin setemane.
CE VIODI. Tal Museu a cjataran puest plui di 600 reperts archeologjics e paleontologjics, tra chei ancje il scheletri a grandece naturâl dal ursus spelaeus, riprodusût tal so ambient naturâl.
Si podarà ancje fâ une visite tridimensionâl sul paisaç ator di Paulêt fint a Cividât e Nimis cui reperts medievâi vignûts fûr dai sgjâfs ta chescj ultins agns.
(Te foto un scheletri di ursus spelaeus).

Baste!

No si pues plui viodi ciertis robis, o soi ingomeade di lei ciertis notiziis seguidis di cetantis declarazions di bande de fazion politiche che e minimize disastros anunciâts, e dulà che nissun al cîr di comedâ. A spessein dome a dâsi la colpe un cun chel altri, a taponâsi daûr il lavôr fat di chei vignûts prime di lôr, a tignî ben ferme la lôr cjadree cence cirî di salvâ il (pôc) salvabil che al reste. Intun paîs che al PODARèS vantâ un patrimoni culturâl unic viodi ciertis robis e sintî chestis declarazions di bande dai politic mi fâs dome stomi.

"Di cultura non si mangia", al à dit Tremonti, sì, di fat ducj i archeolics, i operadôrs che a podaressin lavora intun ambit vastissim in Italie, e ducj chei che si dan da fâ pe culture no mangjin parcè che no lavorin...

Ce schifo...

(te foto la ultime sdrumarie a Pompei, la (za) "Cjase dal Moralist"...)

Gnove scuvierte a Qatna

Il grant sgjâf di Qatna (Sirie) de Universitât dal Friûl insiemi cu la Direzion gjenerâl des antichitâts e dai museus de Sirie, rivât ae sô 12e campagne, nus regale une altre scuvierte, uniche intal so gjenar te archeologjie siro-palestinese; si trate di une oficine doprade par lavorâ il bronç e l'arint datade ae prime metât dal II mileni p.d.C.
Cheste scuvierte, fate intal edifici plui antîc dal sgjâf, o ben il palaç Orientâl (1800-1600 p.d.C.), e permetarà di fâ lûs su lis tecnichis di produzion dai metai e su lis rêts comerciâls tal Medi Orient Antîc. (Te foto in alt une viodude dal restaur dal palaç Reâl di Qatna).
Oltri a chest si è scuviert ancje un scarabut egjizi de seconde metât dal II mileni prin di Crist cun montadure in aur e cu la titolazion regâl dal faraon Amenhotep III. Chest al testemonee cemût che i rapuarts tra lis dôs civiltâts a fossin une vore strents. (Chi sot il scarabut egjizi cjatât a Qatna intune foto di Javier Ballestrer Serrano).

A proposit dal museu etnografic...

Biel, biel, biel!
La uniche robe che o pues conseâus e je chê di lâ a viodilu, parcè che il museu etnografic dal Friûl in vie Graçan a Udin, al è pardabon biel!
Plui di une ore e mieze di visite dilunc di salis ben alestidis, cun tancj temis e cetantis colezions di dut il Friûl, che a mostrin trop che il nestri teritori al sedi siôr di storie e di culture.
Une buine presince ancje de lenghe furlane, cuasi ducj i reperts a son nomenâts cui lôr nons origjinâi (pecjât che no sedin in marilenghe ancje i panei descritîfs...ma cuissà, plui indevant che cualchidun nol cjapi spont dal museu de storie catalane di Barcelone!).
Biele ancje la idee, te sale des mostris temporaneis, di lassâ la pene ai visitadôrs par scrivi i nons dai reperts come che a jerin clamâts tai timps (par esempli cumò la sale e je dedicade al lavôr dal marangon, cun ducj i soi imprescj).
Ae fin, intun avîs dai curadôrs dal museu, al è scrit l'intent di volê continuâ a cirî e valorizâ ancje l'aspiet linguistic de nestre culture.
Compliments ae dotore Tiziana Ribezzi e a ducj chei che a àn permetût chest lavôr.
Il museu cun di plui al ufrìs ancje percors di visitis vuidadis e laboratoris par scuelis e grups, o podês tignîsi inzornâts sul sît dal comun di Udin ae pagjine dedicade al museu.

Damis e feminis langobardis

Sabide ai 13 di Novembar aes 11.00 li de sede municipâl di Romans dal Lusinç, e tornarà a vierzi la sale espositive dal langobarts cu la mostre "Dame e donne longobarde": si cjataràn furniments feminins di diviersis classis sociâls di chei timps, in particolâr chel de femine cjatade te tombe 97 za esponude tal museu di Cividât, ma ancje di altris sepulturis, in particolâr chês de necropoli di Vilegnove di Fare, ative dal II secul d.C. che cualchi timp dopo e de vite a une societât une vore grande e radicade tal teritori.
La mostre si podarà visitâ fint ai 30 di Avrîl dal 2012
dal lunis al vinars des 11.00 aes 13.30
il lunis e il miercus ancje des 16.00 aes 18.00.
Par info
Comun di Romans dal Lusinç, Ufici Culture
ufficio.cultura@com-romans-d-isonzo.regione.fvg

Gnûf Museu etnografic dal Friûl

Al è stât inaugurât ai 22 di Otubar il gnûf Museu etnografic dal Friûl, intal Palaç Giacomelli in vie Graçan a Udin. Dopo tancj agns di spiete si podarà tornâ a gjoldi di colezions e materiâi inedits. il percors al cjape dentri tradizions furlanis, il teme dal sacri, dai ogjets de vite di ogni dì, dai vistîts, des mascaris, de musiche e dal spetacul. Oltri a lis visitis a lis salis espositivis a saràn disponibii ancje laboratoris didatics pai fruts des scuelis e iniziativis pai plui grancj.


I oraris pal periodi invernâl a son: dal martars ae domenie des 10.30 aes 17.00
Pal periodi estîf: dal martars ae domenie des 10.30 aes 19.00

Fint ai 31 di Otubar dal 2010 al sarà pussibil gjoldi di biliets a presits promozionâi

Par info:
telefon 0432 271920
fax 0432 271907
mail museoetnografico@comune.udine.it

Uniud in Sirie

O sin rivâts a puartâ a cjase un altri travuart, altris 5 agns di sgjâfs e ricercjis te aree archeologjiche de antighe Qatna. O feveli de Universitât dal Friûl, che a dispiet des ultimis polemichis "fondudis" di cualchi europarlamentâr, e à savût puartâ indevant lis sôs ecelencis.

La gnove campagne si ocuparà di fat dal restaur dal palaç reâl de antiche capitâl siriane e cun di plui di vierzi une gnove aree di sgjâf inmò di screâ.

Ae cerimonie di inaugurazion in Sirie e jere presinte ancje la nestre retore Cristiana Compagno, dongje de first lady siriane Asma al-Assad, il ministri de culture siriane e altris rapresentants politics internazionâi.

Par savênt di plui lait a viodi ancje il sît dal sgjâf!

Langobarts a For disore

In localitât Dondrace in comun di For disore ancje chest an si è puartât indevant cun sucès il sgjâf archeologjic di une necropoli une vore grande cun ben 25 sepulturis di ete langobarde. In 12 di chestis sepulturis a son vignûts fûr furniments cetant impuartants e ben conservâts (fibulis, braçâi, anei, imprescj), ancje se la culture langobarde di cheste zone no je inmò dal dut definide. Il Sgjâf al è stât puartât indevant dal architet Fabio Piuzzi cuntune equipe di professioniscj dal 2007 fint in dì di vuê; te ultime campagne e je stade ancje puartade ae lûs la jentrade dal antîc fortilizi di "Cuol di cjestiel" dal IV-V secul dopo di Crist.

Te localitât Pradigot invezit, in teritori di For disot, al è stât cjatât il basament de tor est di une fortificazion popolade fint al 1200.

(font Il Gazzettino - Udin)

Gnovis su Oetzi

De mumie di Oetzi o vevi za fevelât timp indaûr, cjatade tal 1991 su lis Alps e che cumò e polse a Bolzan.

Cuant che al è stât cjatât Oetzi al veve fint di subit jevât une grande curiositât e interès di bande di studiôs e apassionâts, une scuvierte uniche che cumò si insiore di altris gnovis interpretazions; l'archeolic Renato Fasolo di Verone di fat, di agns daûr a studiâ la mumie, al à presentadis lis provis a conferme de sô ipotesi che la muart di Oetzi no sedi stade acidentâl ma ben che il cuarp al sedi stât sepulît in forme rituâl. A pro di chest il fat che la mumie e jere dongje di un spiron di cret di forme triangolâr e al veve cun se ogjets simbul e sostancis terapeutichis che a podaressin costituî il so furniment. Cun di plui a son stâts cjatâts un arc, une manarie, une cosse e une stuerie "metûts dongje di un spiron di cret dulà che si viôt une plateforme triangolâr che e riclame la forme di un pugnâl", al spieghe Fasolo; chest lûc al podarès duncje jessi un puest di cult, come che al sarà carateristic plui indevant te Ete dal Ram. Intor de mumie a son stadis cjatadis ancje sostancis cun proprietâts terapeutichis, stant che si è scuviert che Oetzi al veve diviersis malatiis: un recipient cun framents e polvar di cjarbon che al coventave par supâ lis sostancis tossichis, doi foncs cun proprietâts antibiotichis e emostatichis; po dopo al jere ancje tatuât cun diviers segns e intor di lui e je stade cjatade une gusele di vues che i coventave par incidi la piel e meti dentri il cjarbon par colorâle.

Il so furniment cetant siôr al jude a capî duncje che al pues jessi stât metût dongje pal so ultin viaç dilà de vite.

Sot Tergeste

Dai 2 di Otubar ai 7 di Dicembar dal 2010 lì de Biblioteche Statâl di Triest in Largo Papa Giovanni XXIII e je in vore la mostre, organizade dal Dipartiment di Storie e Culture de Antichitât dal Mont Contemporanei de Universitât dai Studis di Triest, cu la colaborazion de Sorintendince pai Bens Archeologjics dal Friûl-VJ, il Comun di Triest e la Biblioteche Statâl, su lis scuviertis fatis tal cjamp de archeologjie urbane a Triest par un viaç tes vicendis storichis, tes trasformazions architetonichis e urbanistichis des origjins de citât fint ai prins agns dal Nûfcent.
Oraris de mostre:
lunis – joibe: 9 -18,30
vinars – sabide: 9.30 – 13,30.
Jentrade libare - La sede de mostre e je acessibile a lis personis disabilis
Visitis vuidadis su prenotazion Tel. 0405582855, +393497130346

Jo o vîf intun cjistiel

O vuli segnalâus une biele publicazion pene vignude fûr par cure de brave Laura Guaianuzzi di Manià, studentesse e po ricercjadore di Storie Medievâl de Universitât dal Friûl, che e à scrit e ilustrât un bielissim libri didatic, bilengâl talian/furlan, su un cjistiel medievâl furlan, chel di Cjistielvuardie. Il libri si clame "Io vivo in un castello/Jo o vîf intun cjistiel" (Ed. L'Omino Rosso) e al conte, cu la vôs dal piçul Pileu, fantacin che al vîf te Ete Medievâl, la vite e lis usancis di chei timps. Sempliç e svelt chest libri si adate benon pal ûs didatics tes scuelis, un biel strument par contâ in maniere clare e trative la storie de nestre Ete di Mieç.Interessant ancje par discuvierzi tiermins e nons gnûf di ogjets o usancis in vore ta chei timps.

Inmò cetancj compliments a Laura, o restìn in spiete dal to prossim lavôr! :)
(te foto la cuviertine dal libri)

La domus a Zui

Dai 6 di Avost ai 30 di Setembar dal 2011 si pues lâ a visitâ une biele mostre a Iulium Carnicum (Zui), dal titul "Abitare a Iulium Carnicum alla fine dell'età romana. Dallo scavo al progetto di valorizzazione di una casa a nord della città".
Cheste mostre e vûl rindi plui comprensibii i risultâts dai lavôrs su la aree archeologjiche dal paîs. Si trate di une domus romane indagade intai ultims agns che e à dât indaûr cetancj reperts riferibii ae vite cuotidiane dai antîcs abitants.