Sgjâf finît

Ecomi ca, tornade prin dal timp dal sgjâf di Magliano Sabina; di fat lis previsions no son stadis confermadis e lì che o vin sgjavât nol è vignût fûr propite nuie! =( La zone si clame Colle del Giglio, une colinute dulà che intai agns passâts a son vignudis in lûs cetantis sepolturis sabinis, cun furniduris une vore sioris, che a son stadis di grant aiût par capî la societât dal lûc.
Chest sgjâf al veve di sedi une conferme e une continuazion dai studiis tacâts a Colle del Forno, purtrop chest nol è stât pussibil; la aree indagade chest an, probabilmentri, e jere za stade disturbade (spalant une fuesse al è saltât fûr un pachet di sigaretis!), e dal sigûr no di archeolics. La richece dai furniments saltâts fûr intai agns passâts a àn sburtât clandestins a cirî prin di noaltris elements preziôs che no podaràn plui jessi testemoneâts.

I Sabins / 2

O jerin restâts al augure, cheste figure une vore impuartante inte antighitât, rivât a noaltris ancje grazie a lis numerosis citazions intal mont antîc; cun dut a chel però, rarissims a son stâts i ritrovaments di ogjets che testemoneavin la sô figure. Beh, a Colle del Forno o vin cjatât ben 2 lituis, cioè il simbul de sô incarghe; traviers chest strument lui al faseve i auspicis par capî il volê dai dius. Orientantsi cun il soreli, cui ponts cardinâi e cun altris riferiments al delineave cul lituo une regjon di spazi in cîl e in tiere dulà studiâ il svol dai uciei e interpretant la volontât divine. Une specie di sacerdot dal timp, une alte carighe rispietade e tignude in alte considerazion.
Dut chest par fâ capî che la necropoli di Colle del Forno e je stade dal sigûr une zone di sepolturis impuartantis, di grancj personaçs de societât di Eretum, l’insediament che Colle del Forno e jere il cimitieri.
Inte foto il lituo cjatât a Colle del Forno (dal museu di Fara Sabina).

I Sabins / 1

Domenie o partìs par un gnûf sgjâf a Magliano Sabina, in provincie di Rieti, cul gno prof. di etruscologjie e antichitâts italichis Enrico Benelli (gno relatôr pe tesi!). Za di un 3 agns jo e i miei compagns di universitât o lin par cualchi setemane a sgjavâ intal teritori che al fo patrie dai antîcs Sabins, popolazion stanziade in chê zone che vuê e comprent su par jù la provincie di Rieti apont, e che e ve strets rapuarts cui Romans; pensait par esempli il famôs episodi dal rat des Sabinis, o la origjine di cualchi re di Rome, come Numa Pompilio e Anco Marcio, che e jerin apont Sabins.
Fint l’an passât o vin sgjavât a Colle del Forno, in comun di Montelibretti (prov. di Rome), une impuartante necropoli sabine, dulà che a son vignudis in lûs une cuarantine di tombis a cjamare, retaç di personaçs impuartants, in particolâr di vuerîrs, stant che si è cjatât armis e furniments pertinents propit a cheste categorie di personis.
No son mancjâts però ritrovaments di sepolturis femininis e ancje di chel personaç tant inomenât te antichitât: l’augure.
Ma di chest us fevelarai intal prossim post! =)
Inte foto une cjartine de Sabine antighe, cun indicadis lis popolazions dal centri Italie.

vie in stampe!

E je lade in stampe... finalmentri! La mê tesi! =)
Il titul al è: "La tomba 31 di Colle del Forno", e al è il gno studi sui materiâi di une tombe che e fâs part di une necropoli sabine che o vin scavât cul prof. di etruscologjie dongje Rome. Al inizi il lavôr mi someave grandonon, mi soi fate dôs setemanis sierade intal museu di Fara Sabina a netâ, selezionâ, catalogâ e disegnâ no sai trops tocs di dimensions a voltis ridiculis pûr di cjatâ fûr une cualsisei corispondence jenfri di lôr! Daspò il lavôr al è passat sui libris par tirâ fûr un pocje di storie de necropoli, di tipologjiis di tombis che si cjatin in chescj lûcs e di confront tra materiâi. Un lavoron che mi a puartât vie un biel pôcs di mês ma che ae fin mi à lassade sodisfate! Cumò starìn a viodi cemût che a va in chê dì! O soi un tic spauride! =)

La mê cariere

La mê passion pe archeologjie e je scomençade cuant che o jeri piçule: i miei mi puartavin simpri a torzeon e jo mi incocalivi a cjalâ i vecjos borcs, lis cjasis di une volte, lis glesiis di agnorums, lis citâts plenis di storie e di culture. Po dopo une dì, tal gno piçul paisut (Vissandon), e je stade scuvierte par câs une tombe longobarde: la mestre nus puartà a viodile, e jo frutine o restai cussì incantesemade di chei cuatri vues inte buse che mai insumiai par setemanis! Di in chê volte o ai simpri let tancj libris su la storie e viodût un grum di documentaris di Piero Angela! Vignude grande (migo tant…) o ai lassât i miei siums di frute intal caset, fint cuant che a Udin a àn viert il cors di Archeologjie! Nol jere plui dome un sium il gno! Di fat…

mandi!

Chê chi o soi jo a vore! =)