Il prin blog di archeologjie par furlan

Gnove publicazion sul tumul di Merêt

2012-02-15T08:59:00.004+01:00

Vuê o ai vût il plasê di vê e di lei la gnove publicazion sul tumul di Merêt dulà che si cjatin ducj i inzornaments sul sgjâf e la conservazion di cheste struture impuartantone.

Finît di sgjavâ tal 2008 de Universitât dal Friûl il tumul nus à dât indaûr une schirie di informazions sul periodi protostoric furlan, ancje in face al confront cun altris struturis di cheste fate presintis sul teritori. Di lui o vevin za fevelât chi , chi e cui fruts de scuele primarie "Candotti" di Codroip, che a jerin restâts inmagâts di Rovul e de sô storie. Cumò chestis scuviertis a son fruibilis di ducj ancje gracie a cheste biele publicazion (par cure de Associazion Culturâl "La Grame").

Mi auguri che chestis ricercjis a vadin indevant ancje tai agns a vignî, e je une part de nestre storie masse impuartante par che e vignedi dismenteade sot tiere.

Par chest post o ringraci in maniere particolâr l'assessôr Claudio Violino.

Gnûf laboratori archeologjie! 1 lezion

2012-02-13T13:04:00.002+01:00

Vuê o ai tacât un gnûf laboratori di archeologjie par furlan cui frutins de scuele materne di Rivis Darcjan! O vin scomençât cuntun biel libri plen di imagjins di viodi e di tocjâ: i piçui a jerin entusiascj, cui che al saveve za, cui che al contave dal tirannosaurus-rex. O vin viodût insiemi cemût che a jerin fats e ce che a mangjavin, cemût che a nassevin e cemût che si son estints. Po dopo o vin creât insiemi parts di dinosaur e i fruts si son viestûts par recitâ intune conte cun protagonist un piçul dinosaurut.

Si sin diviertûts e, ancje se la grande part di lôr no fevele par furlan, a àn capît dut ce che ur ai contât, dimostrant di jessi flessibii e atents a ogni novitât, cence problemis di sorte. Chest al è un pont che bisugne sfrutâ cun lôr, e no fâsi masse fastidis a fevelâur par furlan di cualsisedi argoment, tant plui di ce che ur plâs!

Ultimis su la protostorie furlane

2012-01-22T20:53:00.002+01:00

Us segnali un interessant articul vignût fûr sul ultin numar di Tiere Furlane, la riviste culturâl de Regjon, scrit de professore Paola Càssola Guida de Universitât dal Friûl sui ultins studis fats in merit ae nestre protostorie. In particolâr si fevele dai tumui e cjistielîrs cun riferiment particolâr a chei studiâts pôc timp indaûr (S.Svualt, Merêt e Sedean). Biel ancje il confront cu lis realtâts protostorichis dal Cjars, de Dalmazie e Istrie, segn di une civiltât slargjade e ben organizade.

La riviste si le pues lei scjamantle dal sît de Regjon Friûl-VJ a chest link.

O aprofiti ancje par visâus che domenie ai 29 di Zenâr aes 15.00 te canoniche di Vençon si tignarà une cunvigne dal professôr Agnul Floramo propit su cheste tematiche, cul titul "I cjastelîrs: olmis di antighe int in Europe e in Friûl". Di no mancjâ!

Bon 2012!

2012-01-02T17:19:00.003+01:00

Us auguri un bon 2012! ;)

A àn disglaçât Oetzi!

2011-11-03T13:48:00.005+01:00

Us segnali che sul ultin numar dal National Geographic di Novembar al è un biel articulon su lis ultimis scuviertis su Oetzi, la mumie dal Similaun, che e je stade sotponude a cetancj esams e autopsiis par determinâ biadelore la cause de muart e par confermâ une vore di dâts su la vite di chest om di 5000 agns indaûr.
Daspò 20 agns il misteri di cheste mumie al continue inmò a apassionâ tancj studiôs e ricercjadôrs!
Us ricuardi ancje che fin ai 15 di Zenâr dal 2012 e je visitabile la mostre temporanee su Oetzi al Museu Archeologjic di Bolzan,cu la ricostruzion dal om vignût dal glaç! :)

Dentri un tumul protostoric a S.Svualt

2011-10-15T14:27:00.004+02:00

Come che us vevi dit, îr ai 14 di Otubar al è stât inaugurât il tumul protostoric a S.Svualt, dongje de Aziende agrarie universitarie. Cetante int e à partecipât entusiaste a chest event unic tal so gjenar, la musealizazion dal tumul dal periodi dal Bronç (1900 d.d.C. cirche) che al jere stât scavât al inizi dai agns 2000. La sepolture, esempli ecelent pe metodologjie di sgjâf puartât indevant soredut cul impegn de prof. Paola Cassola Guida de Universitât di Udin, e je stade mantignude cuasi dal dut intate, permetint cussì di mostrâ ai visitadôrs la costruzion e la inumazion dal defont.
Te ocasion al è stât ancje presentât il libri "Una sepoltura monumentale dell'antica età del bronzo: il tumulo di S.Osvaldo (Udine) - scavi 2000-2002" par cure di Paola Cassola Guida e Massimo Calosi (edizioni Quasar, Roma 2011) dulà che si puedin cjatâ dutis lis ricercjis fatis in chescj agns sul sît.
Il tumul al merite lât a viodi e par chest o podês, a partî di lunis ai 17 di Otubar, prenotâ lis visitis vuidadis clamant i Civics Museus di Udin il lunis des 10 ae 13 e des 14 aes 17 clamant il numar 0432 271767 o il Studio D Friuli il martars e joibe des 10 aes 17 al numar 346 3257139.
Jo mi auguri dome une robe, che dut chest entusiasim no si sfanti in pôc timp ma che al sedi di sproc par continuâ cu lis ricercjis in chest cjamp de nestre preistorie inmò dute di scuvierzi.

(Te foto la gnove costruzion par visitâ il tumul)

Gjite cun Glesie Furlane!

2011-10-05T22:30:00.007+02:00

I contats jenfri la Glesie di Aquilee e i teritoris sot de sô jurisdizion, fint dilà dai confins naturâi des Alps, par riscuvierzi lis ricjecis spirituâls e culturâls dal Patriarcjât e de nestre Glesie mari. Chest al è stât il leitmotiv de gjite organizade di Glesie Furlane chest an ai 24 di Setembar, une zornade tal mieç di bielecis naturâls, culturâls e storichis.
O sin partîts un groput di personis in coriere di Vençon, intune matine frescje ma plene di soreli, ae volte dal pas di Mont Crôs di Cjargne: par me e jere la prime volte che o fasevi cheste strade e o scuen dî che za dome chest e je une emozion uniche! La strade che si sberdee jenfri lis montagnis intune spirâl simpri plui alte che e met bardabon i brivits! Subit dilà dal pas o sin jentrâts in tiere austriache, ma si sint une cierte sugjestion a savê che ancje li secui indaûr si scoltave la peraule dal patriarcje di Aquilee, a cussì tancj (e in chê volte inmò di plui) km di distance.
La prime tape e je stade Aguntum, une citadine che sot di se e tapone ancjemò une vore di rescj romans, segn di une frecuentazion di chel lûc za te epoche che e va dal I al VII secul dopo di Crist. Chi o vin visitât il museu archeologjic di gnove fate, bielin, ma lassaitmi dî, no mi à plasût il sisteme di ricostruzion dai rescj gjavâts fûr.
In bande dal museu di fat a son i scavos de antiche citadine cu lis termis, lis stradis, il foro e ancje une cjase tipiche de epoche; po ben, fâ archeologjie nol vûl dî "fâ sù parsore de robe vecje" ma valorizâ ce che al è za. Un pôc come che si viôt tal palaç di Cnossos a Crete, un "scempio" di ce che invezit la archeologjie e varès di tutelâ!
Dut câs e je di bande lôr la volontât di valorizâ ancje chel pôc che si à.
Cjamine che ti cjamine nus è vignude propite fam, e cussì si sin inviâts viers la tant insumiade "pause pal gustâ", intun puest bielonon che al cjalave sot dute la valade di Lienz!
Tal dopomisdì invezit o sin rivâts a Lavan, dulà che si cjatin i rescj di une glesie di fate tipichementri aquileiese! Chi pre 'Sef (de plêf di Guart) nus à ben spiegât la plante dal edifici e il so disvilup, emozionant.
Chi sot te foto si viodin i rescj de glesie, un puest che al merite visitât ancje pal contest dulà che si cjate, cuntune viste bielonone e une pâs incredibile.
P.S. al rientro no podeve mancjâ une soste par une birute prime di tornâ a passâ il confin! ;)

Viaç a Crete/part 2

2011-09-22T14:08:00.008+02:00

O volevi contâus inmò alc dai palaçs minoics di Crete.
Il prin che o ai visitât al è stât chel di Knossos, dongje dal cjâf luc de isule, la citadine di Heraklion (nord di Crete).
Dal sigûr al è stât il plui impuartant sedi in ordin di grandece sedi par vie de mitologjie che culì si è svilupade; al jere a stâ in chest palaç di fat il famôs re Minosse, fi di Zeus e Europe, sovran just e savi che al puartâ al massim splendôr il palaç te sô epoche.
La figure, pal plui mitologjiche ma cun cetancj elements che a fasin pensâ a un personaç esistît pardabon (ancje Tucidide al fevele di lui te sô opare "Guerra nel Peloponneso"), e je leade ancje al mît dal famôs taur che i jere stât mandât di Poseidon, par che lui lu sacrificàs in onôr dal diu dal mâr.
Ma stant che la bestie e jere masse biele, Minosse al decidè di no copâlu, stiçant cussì la rabie dal diu. Par punîlu alore Poseidon al fasè inemorà dal taur la femine di Minosse, Pasifae. Dal amôr dal taur e de principesse e nassè cussì une creature mieze om e mieze taur, il Minotaur.
La ricorence cussì ossessive de figure taurine te mitologjie greghe, e minoiche tal specific, e je leade al fat che il taur al jere considerât une bestie sacre; di fat, sedi tes pituris che tes costruzions, si cjate dispès la figure dai cuars, simbul dal dopli podê dal re, chel divin e chel temporâl.
Frecuentis a jerin ancje lis tauromachiis, o ben lis lotis rituâls cul taur che si fasevin in ocasion di fiestis o celebrazions.
Te foto achì us ai metût une piture famose cjatade propit a Knossos dulà che si viodin i oms saltâ sul taur.
al continue...

Viaç a Crete/part 1

2011-09-19T17:32:00.004+02:00

O volevi condividi cun voaltris part dal gno viaç di cheste Istât, dulà che o ai cirût di coniugâ relax, mâr, divertiment e culture (e ancje bon mangjâ :)). Beh, chel puest lu ai propit cjatât e e je la isule di Crete!
E jere la seconde volte che o lavi in Grecie (la volte prime a Kos) e o scuen dî che e je pardabon un mont a part, plene di storie, di personis une vore ospitâls e di un mâr fantastic!
Prime di partî o savevi bielzà ce che o sarès lade a viodi, cu la ferme intenzion di visitâ plui robis pussibilis ancje se i dîs par zirâle no saressin stâts tancj (la isule no je tant piçule, e je la cuinte par grandece tal Mediteranei, daspò Sardegne, Sicilie, Corsiche e Cipro).
La sô vicende, se ben leade a fuart cun chê de Grecie continentâl e cun chê dai paîs dongje (Turchie, Egjit e Italie in primis) e scomence però cuntune individualitât che le caraterizarà par ducj i prins milenis di storie, in chel periodi clamât "minoic".
Di fat, za tor dal II mileni devant di Crist e scomence a deliniâsi chê civiltât che nô o cognossin come "civiltât minoiche" caraterizade dai famôs palaçs, simbui di une organizazion de societât pardabon indevant par chei timps.
I plui famôs a son stâts Knossos, Festòs e Malia, ma dute la isule e je impregnade di sîts minoics plui o mancul piçui, che dal sigûr a vevin tra di lôr une fite rêt di colegaments ma che a jerin ognidun ben indipendents e autosuficients.
La carateristiche principâl di chescj palaçs e jere il fat che no jerin dome lis abitazions dai siôrs (dal re in chest câs) ma vêrs centris dal podê cun libar acès di bande ancje di dute la popolazion che e gravitave ator dal edifici (regolât di pueste) e che e contribuive al sostentament de comunitât intune sorte di "ben comun"; chei che si son conservâts miôr di fat fint in dì di vuê a son propit i magazins dulà che si esercitave il scambi di bens primaris (vin, vueli, aliments e v.i.). O torni a dî duncje, une organizazion de societât une vore plui "indevant" di chê che o podìn imagjinâ ancje dome vuê, dulà che i palaçs dal podê a son ben lontans dal condividi alc cu la popolazion...
al continue...

(te foto une viodude dal palaç di Knossos, tal nord de Isule)

Finalmentri!

2011-09-14T14:22:00.002+02:00

Une biele gnove!
O soi di gnûf a fevelâ di tumui protostorics furlans!
Ai 14 di Otubar si inaugurarà la gnove struture che e permetarà di visitâ il tumul protostoric di S.Svualt, ogjet di indagjin tai agns passâts di bande de Universitât dal Friûl.
Ricuardìn che il tumul, sepulture monumentâl di un individui de ete dal Bronç, al veve dât indaûr impuartants risultâts e soredut il scheletri dal inumât, furnint cussì grandis prospetivis tai studis di chest periodi.
L'aveniment al è cetant impuartant ancje par vie che al sarà il prin sît di chest gjenar musealizât e visitabil, cun didatiche organizade pes scuelis, come tal sît Neolitic di Samardencje.
L'apontament alore al è ai 14 di Otubar as 11.00 daûr il vecjo "manicomio" dulà che a saràn presints i responsabii dal sgjâf, la retore Cristiana Compagno e altris autoritâts.
(te foto la cuvierture di claps parsore de sepulture)

Se al è masse cjalt...

2011-08-25T15:06:00.003+02:00

Vêmi ca che o soi tornade, simpri plene di ce fats! ;P
Duncje, il cjalt nus fâs patî in chescj dîs de fin di Avost, alore o volevi proponijus un doi apontaments "frescs frescs" de Societât Furlane di Archeologjie in merit a sgjâfs che si tignaràn di chi a pôc.
Un al è chel di Atimis, li dal Cjistiel Superiôr, che si ten za di cualchi an in ca e che al scomençarà ai 29 di Avost fint ai 2 di Setembar (e une seconde campagne dai 5 ai 9 di Setembar), sot de direzion di Massimo Lavarone. Par cui che al volès iscrivisi ve ca telefon: 0432 26560 o mail: sfaud@archeofriuli.it o mlavarone@alice.it.
Chel altri si tignarà a Aquilee a partî dai 19 di Setembar e al rivuardarà il toc ocidentâl des muris tart antichis de citât. Ancje chi o podarês domandâ informazion li de Societât.
In fin dai 24 ai 28 di Otubar si podarà partecipâ ai sgjâfs a Morus, in localitât Muris, dulà che a son stâts indivuduâts dai rescj di chê che e podarès jessi une "vile rustiche" romane.

O aprofiti di chest post par ringraziâ i miei "sostignidôrs" che mi seguissin ancje vie pal Istât, buinis vacancis a ducj!

Dopo la Sirie il Mali

2011-04-27T18:26:00.003+02:00

E je di chescj dîs la gnove che la Universitât dal Friûl, insiemi cu la Societât Furlane di Archeologjie e la Sorintendince ai bens archeologjics de citât di Djennè, e à discutût su la pussibilitât di tutelâ e valorizâ il sît archeologjic de citât centri africane, famose pes sôs cjasis di pantan e pe sô moschee fate dute di tiere. Si è cussì fevelât de eventualitât di inviâ une campagne di sgjâfs te citadine di Djennè par protezi un patrimoni unic intal so gjenar. O ricuardi ancje che la Universitât dal Friûl e fâs part dal 2009 dal Wheap - World heritage earthen architecture, pal miorament dal stât di conservazion e de aministrazion dai sîts architetonics di tiere tal mont.
(te foto la maraveose moschee di tiere di Djennè)

Gnûf sgjâfs a Codroip

2011-04-14T18:13:00.000+02:00

Il Museu Civic di Codroip in colaborazion cu la Societât Furlane di Archeologjie - Sezion Medi Friûl - cu la direzion di Costanza Brancolini e Giovanni Tasca e la colaborazion sientifiche di Giovanni Leonardi e Michele Cupitò de Universitât di Padue, a organizin la VI campagne di sgjâfs tal cjistielîr de Gradiscje (Codroip, zone parc des risultivis) tal periodi dai 4 ai 29 di Lui.
Il sît, za indagât in altris campagnis (2004-2009), al à puartât ae lûs i rescj di un cjistielîr di planure datât tor dal Bronç finâl-prin Fier (1300-800 p.d.C). Chest an si indagarà une zone cun scarics ceramics e il fossâl interni.
Par podê partecipâ lait sul sît de Societât Furlane di Archeologjie par discjamâ il modul o domandait informazions al Museu Civic di Codroip (0432-820174) Lu- Ve 9.00-12.00 o mandait une mail achì scavocodroipo.2011@virgilio.it.
Bon sgjâf a cui che al podarà lâ!!

Cunvigne Aquilee...e auguris!

2011-03-10T13:33:00.005+01:00

Doman ai 11 di Març si tignarà une cunvigne su lis ultimis ricercjis su la ceramiche e la tiere sigjilade di Aquilee. Si scomençarà aes 9.30 li de Sale des Cunvignis cun diviers intervents sui studis dai reperts ceramics iscrits di Aquilee e di altris zonis dal teritori.
La cunvigne, metude adun de Soreintendince pai Bens Archeologjics dal Friûl-V.J., de Societât Furlane di Archeologjie e dal Dipartiment di Storie e Tutele dai Bens Culturâi de Universitât dal Friûl, e varà ancje une relatore a mi une vore cjare, che juste îr si è laureade in Archeologjie te nestre universitât, Laura Gerri di S.Denêl, amie e compagne di cors...augurons e compliments femine! :)

Antiquarium e museu dal fossil a Paulêt

2011-03-01T21:24:00.004+01:00

Al è aromai prossim ae vierzidure il gnûf Antiquarium e museu dal fossil di Paulêt, daspò tante spiete, li de Vile Pitotti.
L'alestiment al sarà screât tra pôc plui di un mês e viert, par intant, dome tal fin setemane.
CE VIODI. Tal Museu a cjataran puest plui di 600 reperts archeologjics e paleontologjics, tra chei ancje il scheletri a grandece naturâl dal ursus spelaeus, riprodusût tal so ambient naturâl.
Si podarà ancje fâ une visite tridimensionâl sul paisaç ator di Paulêt fint a Cividât e Nimis cui reperts medievâi vignûts fûr dai sgjâfs ta chescj ultins agns.
(Te foto un scheletri di ursus spelaeus).

Baste!

2010-11-30T13:50:00.000+01:00

No si pues plui viodi ciertis robis, o soi ingomeade di lei ciertis notiziis seguidis di cetantis declarazions di bande de fazion politiche che e minimize disastros anunciâts, e dulà che nissun al cîr di comedâ. A spessein dome a dâsi la colpe un cun chel altri, a taponâsi daûr il lavôr fat di chei vignûts prime di lôr, a tignî ben ferme la lôr cjadree cence cirî di salvâ il (pôc) salvabil che al reste. Intun paîs che al PODARèS vantâ un patrimoni culturâl unic viodi ciertis robis e sintî chestis declarazions di bande dai politic mi fâs dome stomi.

"Di cultura non si mangia", al à dit Tremonti, sì, di fat ducj i archeolics, i operadôrs che a podaressin lavora intun ambit vastissim in Italie, e ducj chei che si dan da fâ pe culture no mangjin parcè che no lavorin...

Ce schifo...

(te foto la ultime sdrumarie a Pompei, la (za) "Cjase dal Moralist"...)

Gnove scuvierte a Qatna

2010-11-10T18:19:00.003+01:00

Il grant sgjâf di Qatna (Sirie) de Universitât dal Friûl insiemi cu la Direzion gjenerâl des antichitâts e dai museus de Sirie, rivât ae sô 12e campagne, nus regale une altre scuvierte, uniche intal so gjenar te archeologjie siro-palestinese; si trate di une oficine doprade par lavorâ il bronç e l'arint datade ae prime metât dal II mileni p.d.C.
Cheste scuvierte, fate intal edifici plui antîc dal sgjâf, o ben il palaç Orientâl (1800-1600 p.d.C.), e permetarà di fâ lûs su lis tecnichis di produzion dai metai e su lis rêts comerciâls tal Medi Orient Antîc. (Te foto in alt une viodude dal restaur dal palaç Reâl di Qatna).
Oltri a chest si è scuviert ancje un scarabut egjizi de seconde metât dal II mileni prin di Crist cun montadure in aur e cu la titolazion regâl dal faraon Amenhotep III. Chest al testemonee cemût che i rapuarts tra lis dôs civiltâts a fossin une vore strents. (Chi sot il scarabut egjizi cjatât a Qatna intune foto di Javier Ballestrer Serrano).

A proposit dal museu etnografic...

2010-10-31T09:40:00.005+01:00

Biel, biel, biel!
La uniche robe che o pues conseâus e je chê di lâ a viodilu, parcè che il museu etnografic dal Friûl in vie Graçan a Udin, al è pardabon biel!
Plui di une ore e mieze di visite dilunc di salis ben alestidis, cun tancj temis e cetantis colezions di dut il Friûl, che a mostrin trop che il nestri teritori al sedi siôr di storie e di culture.
Une buine presince ancje de lenghe furlane, cuasi ducj i reperts a son nomenâts cui lôr nons origjinâi (pecjât che no sedin in marilenghe ancje i panei descritîfs...ma cuissà, plui indevant che cualchidun nol cjapi spont dal museu de storie catalane di Barcelone!).
Biele ancje la idee, te sale des mostris temporaneis, di lassâ la pene ai visitadôrs par scrivi i nons dai reperts come che a jerin clamâts tai timps (par esempli cumò la sale e je dedicade al lavôr dal marangon, cun ducj i soi imprescj).
Ae fin, intun avîs dai curadôrs dal museu, al è scrit l'intent di volê continuâ a cirî e valorizâ ancje l'aspiet linguistic de nestre culture.
Compliments ae dotore Tiziana Ribezzi e a ducj chei che a àn permetût chest lavôr.
Il museu cun di plui al ufrìs ancje percors di visitis vuidadis e laboratoris par scuelis e grups, o podês tignîsi inzornâts sul sît dal comun di Udin ae pagjine dedicade al museu.

Damis e feminis langobardis

2010-10-30T10:46:00.002+02:00

Sabide ai 13 di Novembar aes 11.00 li de sede municipâl di Romans dal Lusinç, e tornarà a vierzi la sale espositive dal langobarts cu la mostre "Dame e donne longobarde": si cjataràn furniments feminins di diviersis classis sociâls di chei timps, in particolâr chel de femine cjatade te tombe 97 za esponude tal museu di Cividât, ma ancje di altris sepulturis, in particolâr chês de necropoli di Vilegnove di Fare, ative dal II secul d.C. che cualchi timp dopo e de vite a une societât une vore grande e radicade tal teritori.
La mostre si podarà visitâ fint ai 30 di Avrîl dal 2012
dal lunis al vinars des 11.00 aes 13.30
il lunis e il miercus ancje des 16.00 aes 18.00.
Par info
Comun di Romans dal Lusinç, Ufici Culture
ufficio.cultura@com-romans-d-isonzo.regione.fvg

Gnûf Museu etnografic dal Friûl

2010-10-27T18:12:00.000+02:00

Al è stât inaugurât ai 22 di Otubar il gnûf Museu etnografic dal Friûl, intal Palaç Giacomelli in vie Graçan a Udin. Dopo tancj agns di spiete si podarà tornâ a gjoldi di colezions e materiâi inedits. il percors al cjape dentri tradizions furlanis, il teme dal sacri, dai ogjets de vite di ogni dì, dai vistîts, des mascaris, de musiche e dal spetacul. Oltri a lis visitis a lis salis espositivis a saràn disponibii ancje laboratoris didatics pai fruts des scuelis e iniziativis pai plui grancj.

I oraris pal periodi invernâl a son: dal martars ae domenie des 10.30 aes 17.00
Pal periodi estîf: dal martars ae domenie des 10.30 aes 19.00

Fint ai 31 di Otubar dal 2010 al sarà pussibil gjoldi di biliets a presits promozionâi

Par info:
telefon 0432 271920
fax 0432 271907
mail museoetnografico@comune.udine.it

Uniud in Sirie

2010-10-06T20:00:00.001+02:00

O sin rivâts a puartâ a cjase un altri travuart, altris 5 agns di sgjâfs e ricercjis te aree archeologjiche de antighe Qatna. O feveli de Universitât dal Friûl, che a dispiet des ultimis polemichis "fondudis" di cualchi europarlamentâr, e à savût puartâ indevant lis sôs ecelencis.

La gnove campagne si ocuparà di fat dal restaur dal palaç reâl de antiche capitâl siriane e cun di plui di vierzi une gnove aree di sgjâf inmò di screâ.

Ae cerimonie di inaugurazion in Sirie e jere presinte ancje la nestre retore Cristiana Compagno, dongje de first lady siriane Asma al-Assad, il ministri de culture siriane e altris rapresentants politics internazionâi.

Par savênt di plui lait a viodi ancje il sît dal sgjâf!

Langobarts a For disore

2010-09-20T18:13:00.000+02:00

In localitât Dondrace in comun di For disore ancje chest an si è puartât indevant cun sucès il sgjâf archeologjic di une necropoli une vore grande cun ben 25 sepulturis di ete langobarde. In 12 di chestis sepulturis a son vignûts fûr furniments cetant impuartants e ben conservâts (fibulis, braçâi, anei, imprescj), ancje se la culture langobarde di cheste zone no je inmò dal dut definide. Il Sgjâf al è stât puartât indevant dal architet Fabio Piuzzi cuntune equipe di professioniscj dal 2007 fint in dì di vuê; te ultime campagne e je stade ancje puartade ae lûs la jentrade dal antîc fortilizi di "Cuol di cjestiel" dal IV-V secul dopo di Crist.

Te localitât Pradigot invezit, in teritori di For disot, al è stât cjatât il basament de tor est di une fortificazion popolade fint al 1200.

(font Il Gazzettino - Udin)

Gnovis su Oetzi

2010-09-13T17:40:00.001+02:00

De mumie di Oetzi o vevi za fevelât timp indaûr, cjatade tal 1991 su lis Alps e che cumò e polse a Bolzan.

Cuant che al è stât cjatât Oetzi al veve fint di subit jevât une grande curiositât e interès di bande di studiôs e apassionâts, une scuvierte uniche che cumò si insiore di altris gnovis interpretazions; l'archeolic Renato Fasolo di Verone di fat, di agns daûr a studiâ la mumie, al à presentadis lis provis a conferme de sô ipotesi che la muart di Oetzi no sedi stade acidentâl ma ben che il cuarp al sedi stât sepulît in forme rituâl. A pro di chest il fat che la mumie e jere dongje di un spiron di cret di forme triangolâr e al veve cun se ogjets simbul e sostancis terapeutichis che a podaressin costituî il so furniment. Cun di plui a son stâts cjatâts un arc, une manarie, une cosse e une stuerie "metûts dongje di un spiron di cret dulà che si viôt une plateforme triangolâr che e riclame la forme di un pugnâl", al spieghe Fasolo; chest lûc al podarès duncje jessi un puest di cult, come che al sarà carateristic plui indevant te Ete dal Ram. Intor de mumie a son stadis cjatadis ancje sostancis cun proprietâts terapeutichis, stant che si è scuviert che Oetzi al veve diviersis malatiis: un recipient cun framents e polvar di cjarbon che al coventave par supâ lis sostancis tossichis, doi foncs cun proprietâts antibiotichis e emostatichis; po dopo al jere ancje tatuât cun diviers segns e intor di lui e je stade cjatade une gusele di vues che i coventave par incidi la piel e meti dentri il cjarbon par colorâle.

Il so furniment cetant siôr al jude a capî duncje che al pues jessi stât metût dongje pal so ultin viaç dilà de vite.

Sot Tergeste

2010-09-09T17:09:00.002+02:00

Dai 2 di Otubar ai 7 di Dicembar dal 2010 lì de Biblioteche Statâl di Triest in Largo Papa Giovanni XXIII e je in vore la mostre, organizade dal Dipartiment di Storie e Culture de Antichitât dal Mont Contemporanei de Universitât dai Studis di Triest, cu la colaborazion de Sorintendince pai Bens Archeologjics dal Friûl-VJ, il Comun di Triest e la Biblioteche Statâl, su lis scuviertis fatis tal cjamp de archeologjie urbane a Triest par un viaç tes vicendis storichis, tes trasformazions architetonichis e urbanistichis des origjins de citât fint ai prins agns dal Nûfcent.
Oraris de mostre:
lunis – joibe: 9 -18,30
vinars – sabide: 9.30 – 13,30.
Jentrade libare - La sede de mostre e je acessibile a lis personis disabilis
Visitis vuidadis su prenotazion Tel. 0405582855, +393497130346

Jo o vîf intun cjistiel

2010-08-23T16:44:00.007+02:00

O vuli segnalâus une biele publicazion pene vignude fûr par cure de brave Laura Guaianuzzi di Manià, studentesse e po ricercjadore di Storie Medievâl de Universitât dal Friûl, che e à scrit e ilustrât un bielissim libri didatic, bilengâl talian/furlan, su un cjistiel medievâl furlan, chel di Cjistielvuardie. Il libri si clame "Io vivo in un castello/Jo o vîf intun cjistiel" (Ed. L'Omino Rosso) e al conte, cu la vôs dal piçul Pileu, fantacin che al vîf te Ete Medievâl, la vite e lis usancis di chei timps. Sempliç e svelt chest libri si adate benon pal ûs didatics tes scuelis, un biel strument par contâ in maniere clare e trative la storie de nestre Ete di Mieç.Interessant ancje par discuvierzi tiermins e nons gnûf di ogjets o usancis in vore ta chei timps.

Inmò cetancj compliments a Laura, o restìn in spiete dal to prossim lavôr! :)
(te foto la cuviertine dal libri)

La domus a Zui

2010-08-13T21:16:00.003+02:00

Dai 6 di Avost ai 30 di Setembar dal 2011 si pues lâ a visitâ une biele mostre a Iulium Carnicum (Zui), dal titul "Abitare a Iulium Carnicum alla fine dell'età romana. Dallo scavo al progetto di valorizzazione di una casa a nord della città".
Cheste mostre e vûl rindi plui comprensibii i risultâts dai lavôrs su la aree archeologjiche dal paîs. Si trate di une domus romane indagade intai ultims agns che e à dât indaûr cetancj reperts riferibii ae vite cuotidiane dai antîcs abitants.

Avost archeologjic

2010-08-09T20:43:00.007+02:00

La sezion cjargnele de Societât Furlane di Archeologjie e à inmaneât par cheste Istât une schirie di apontaments cetant interessants, us zonti i prossims:

TUMIEÇ– Miercus ai 11 di Avost a lis 18. 00 – Salute Multimediâl di Palaç Frisacco
- dot.re Paola VISENTINI, Museu Furlan di Storie Naturâl – Udin, “Il sito neolitico di Bannia-Palazzine di Sopra (Pordenone) e la Cultura dei vasi a bocca quadrata in Friuli”.

VERZEGNIS – Lunis ai 16 di Avost a lis 15. 00 – Place dal Municipi
- dot.re Gloria VANNACCI LUNAZZI, Diretore dai sgjâfs e dot. Luca VILLA, Universitât Catoliche di Milan, Visite vuidade ai sgjâfs dal insediament fortificât di Colle Mazèit.

FORS DISORE – Joibe ai 19 di Avost a lis 15. 00 –li dal Municipi, vie Nazionâl, n. 84
- arch. Fabio PIUZZI, Universitât dai Studis di Triest, prof. Sauro GELICHI, dot.re Alessandra CIANCIOSI e dot.re Silvia CADAMURO, Universitât dai Studis di Vignesie, Visite vuidade ai sgjâfs te fortificazion di Cuol di Cjastièl e te necropoli di Andrazza.

TUMIEÇ– Vinars ai 20 di Avost a lis 18. 00 – Salute Multimediâl di Palaç Frisacco
- dot.re Gabriella PETRUCCI, Universitât dai Studis di Triest, “L’archeozoologia: la potenzialità della ricerca sui resti animali negli antichi insediamenti della Carnia”.

RAVASCLêT – Vinars ai 27 di Avost a lis 20. 30 – Albierc Bellavista
- prof.re Paola CASSOLA GUIDA, Universitât dai Studis di Udin, “Il Friuli prima dei Romani. Ricerche e scoperte nei luoghi della protostoria”. Introduzion e proiezion di un documentari su lis scuviertis.

Colorìn la materie grise!

2010-08-06T11:31:00.003+02:00

Al è par tancj zovins il moment di decidi ce fâ dopo des scuelis superiôrs, une sielte che e pues cambiâti la vite, e, ancje se cussì no, dal sigûr e pues vierziti la ment a prospetivis gnovis. Chest an o ai vût l'onôr di cognossi la retore de Universitât di Udin, Cristiana Compagno, une femine che o stimi une vore pe sô fuarce e determinazion dute furlane! E cussì o ai volût zontâ a chest post il so apel a pro de Universitât dal Friûl (come che le à clamade ancje jê!) te sperance che la NESTRE Universitât no vignedi sdrumade tal tramai...triestin!
Cjale il video.

Il cjistiel di Ahrensperg

2010-07-13T18:03:00.000+02:00

E je tacade la cuarte campagne di sgjâfs tal cjistiel medievâl di Ahrensperg a Biacis (Pulfar), organizade dal Dipartiment di Storie e tutele dai bens culturâi de Universitât dal Friûl e direzude de dotoresse Simonetta Minguzzi.
Chest an, cul jutori di une cuindisine di students universitaris, si vûl meti in lûs dut ce che al reste dal edifici di forme cuadrangolâr “par podê cussì tornâ a scrivi la storie dal fortilizi, che dal sigûr al à vude une vite plui articolade di ce che si pense”, e spieghe la dot.se Minguzzi.
Il cjistiel al fo assediât tal 1306 dal cont di Gurize e daspò sdrumât par ordin dal patriarcje tal 1364.
La costruzion si cjate tun plan su la rive che e sta parsore dal torent Biacis, afluent dal Nadison, e e conserve inmò une tor alte uns 10 metris, che e je in fase di restaur.

Mandiiiiiiiiiiiiiiii, o fâs un salt a cjatâ Minù

2010-06-14T10:57:00.001+02:00

Aghe di Poç

2010-06-11T13:03:00.004+02:00

Vuê o vuli fevelâus dal grup di ricercje Aghe di Poç, che si cjate tal gno comun "adotîf", Puçui.
Chest grup al è nassût tal 1981 daûr de volontât di riscuvierzi la culture e la identitât daspò de tragjedie dal taramot. Cjapant come spont il poç di aghe che ancjemò si cjate te place dal paîs, e che forsit al à dât il non al centri abitât in ete romane, chest grup di ricercje al à volût tornâ a studiâ i percors storics che a àn caraterizât chest teritori. Cussì si son disvilupâts diviers setôrs: la riscuvierte de archeologjie preistoriche, lis tradizions dal passât fint a rivâ a la storie de Grande Vuere, che e à viodût il paîs di Puçui protagonist te omonime bataie tal Otubar dal 1917.
Tal sît si cjatin tantis notiziis interessantis su la storie dal paîs, su lis associazions dal teritori e lis robis di podê lâ a visitâ (o ricuardi il centri visitis storic archeologjc di Samardencje, dongje dal cetant impuartant sît dal Neolitic, un dai plui grancj de Europe).
Insome, un comun, chel di Puçui, di scuvierzi e di visitâ!

Inmò Aquilee

2010-05-18T19:06:00.002+02:00

Sul gnûf numar de riviste nazionâl "Archeologia Viva" (n.141, Mai/Jugn) une biele schirie di articui su Aquilee, che je stade dedicade ancje la cuviertine. De ricostruzion des origjins, ai ultins sgjâf fats e lis scuviertis che a vegnin fatis di continui, dal museu archeologjic ai famôs mosaics, un biel percors storic e di aprofondiment firmât di diviers studiôs de antighe citât romane.

Gnove Tiere Furlane

2010-05-08T09:18:00.006+02:00

Al è vignût fûr il gnûf numar di Tiere Furlane, la riviste cuadrimestrâl publicade de Regjon dedicade al mont rurâl, che cheste volte e dediche une biele part a la archeologjie!
Si vierç di fat cuntun biel articul di Paola Visentini e Mauro Rottolo su lis origjins de agriculture, po dopo un altri aprofondiment par cure des professoressis Elisabetta Borgna e Paola Cassola Guida e de dotore Susi Corazza sul Friûl prime dai Romans, o ben su la culture dai cjastielîrs.
La riviste e je stade presentade joibe di sere a Caprive li di Villa Russiz, un contest pardabon bielon dulà che a jerin presints l'assessôr regjonâl ae agriculture Claudio Violino, lis relatoris dai articui prof. Borgna e Cassola, il gjornalist de Rai Armando Mucchino, il coordenadôr editoriâl Enos Costantini e il diretôr Christian Romanini.
Cumò o podês cjatâ la riviste ancje on-line al sît www.regione.fvg.it/tierefurlane.

Archeologjie subacuie

2010-05-02T08:58:00.003+02:00

- Archeologia subacquea del Mar Adriatico e del Mar Ionio. Ricerca, tutela e valorizzazione dei relitti -

Si davuelzarà une cunvigne une vore impuartante ai 4 e 5 di Mai a Grau su la cognossince e la fruizion dal patrimoni storic-archeologjic sot aghe. Organizât dal Ministeri par i Bens e lis Ativitâts Culturâls – Direzion Regjonâl par i Bens Culturâi e Paesagjistics dal Friûl - VJ - Sorintendence par i Bens Archeologjics dal Friûl - VJ e de Iniziative Adriatiche-Ioniche Segretariât Permanent, la cunvigne e cjaparà dentri ospits de Italie, Cravuazie e Slovenie. Tra i sogjets in esam Turisim, Culture e Cooperazion interuniversitarie: i itineraris culturâi e maritims e i Bens Culturâi subacuis dulà che si zonte il teme dal patrimoni ogjet dal Congrès.
La finalitât e je chê di infuartî la rêt di contats e di trasmeti il patrimoni di cognossincis in materie di tutele e valorizazion di un ben comun.
I lavôrs a tacaràn aes 9.00 cui salûts dal Sindic dal Comun di Grau, Silvana Olivotto, dal Sorintendint par i Bens Archeologjics, Luigi Fozzati, dal Diretôr Regjonâl, Giuseppe Bilardi, dal Diretôr Gjenerâl pes Antichitâts dal MIBAC, Stefano De Caro, dal Diretôr dal DISCAM-Universitât di Triest, Claudio Zaccaria, di Simonetta Minguzzi dal Dipartiment di Storie e Tutele Bens Culturâi de Universitât dal Friûl.

Cunvignis

2010-04-27T22:16:00.007+02:00

Un mês di Mai interessant lì de biblioteche civiche di Codroip, cuntune serie di cunvignis dedicadis al Antîc Egjit e a Rome antighe.

Si tache vinars ai 7 cul incuintri intitulât: "Perchè affascina l'Egitto?" cun Cesare Feruglio Dal Dan, par capî il parcè che cheste antighe civiltât nus meravee cussì tant, midiant l'esam des sôs origjins, de sô art, de sô religjon e de sô lenghe.

Vinars ai 14 di Mai si tignarà une altre cunvigne cun par teme l'Egjit: "La donna nell'antico Egitto", simpri cun Dal Dan, sul rûl e la condizion de femine dilunc de storie egjizie.

Po dopo vinars ai 21 cunvigne cun Diana Bitto "La misura del tempo presso i Romani".

Vie a sgjavâ!

2010-04-19T22:21:00.004+02:00

Us segnali che la Societât Furlane di Archeologjie e à viertis lis iscrizions pal sgjâf di Atimis, lì dal cjistiel medievâl Superiôr. Il periodi al è dai 19 ai 30 di Lui. Par cui che al vûl provâ la emozion di un vêr sgjâf archeologjic al pues iscrivisi lì de segretarie in vie Micesio 2 a Udin o clamant il numar 0432 26560, o pûr mandant une mail a sfaud@archeofriuli.it. I lavôrs a saran direzûts di Massimo Lavarone, Massimo Fumolo e Filippo Rosset.

Universitât dal Friûl

2010-04-10T12:33:00.003+02:00

Une schirie di apontaments par fâ il pont de situazion e par mostrâ il grant impegn de Universitât dal Friûl intal cjamp de archeologjie; chest il program che si davuelzarà dilunc plui zornadis intai mês di Avrîl e Mai inte Sale Ajace dal Comun di Udin.

Si scomençarà ai 20 di Avrîl aes 18 sot sere cul intervent dal prof. Daniele Morandi Bonacossi: Tesori dell’antica Siria. La scoperta del regno di Qatna.

Po dopo ai 27 di Avrîl, simpri aes 18, la prof.re Paola Cassola e la prof.re Elisabetta Borgna: Il Friuli prima dei Romani. Ricerche e scoperte nei luoghi della protostoria (la conference e sarà compagnade de proiezion di un documentari).

Ai 4 di Mai, a lis 18, il prof. Frederick Mario Fales e la prof.re Marina Rubinich: Dallo scavo delle ‘Grandi Terme’ alla storia di Aquileia. Le ricerche dell’Università di Udine in località Braida Murada.

Ai 11 di Mai, aes 18, la prof.re Simonetta Minguzzi: I custodi delle valli: la vita in un castello del Friuli Orientale.

Ae fin, ai 18 di Mai a lis 18, il prof. Alessandro Canci: Ossa dalla terra. Cosa ci raccontano i resti scheletrici umani rinvenuti negli scavi archeologici dell’Università di Udine.

Fieste de Patrie

2010-03-31T21:33:00.003+02:00

Il 3 di Avrîl al è dongje, e mi vegnin sù un pocjis di riflessions. Cheste date a mi mi fâs vignî i sgrisui, ma no steit a fraintindimi, i miei a son sgrisui di emozion. No sai, par me e je impuartante la solenitât di cheste fieste, che no je la solite ricorence furlane creade dome par fâ ghiringhei o cjantosis, ma e je la NESTRE fieste. Une fieste di cjapâ sul serio. O sin di simpri un popul, che al à vût simpri il so teritori, lis sôs cjasis, i soi cjamps, i soi paîs, la sô lenghe. O vin simpri stât chi, su chestis stradis, sot di chest cîl, parsore di chest teritori che ogni tant nus da une sdrondenade ma che no vin volût mai bandonâ. Cemût si puedie no pensâ a chestis robis. Cemût si puedie vivi une vite che no tegni cont di cheste fonde.
Mi fâs pôre il mont che al ven indevant, e se o pensi ai fîs o nevôts che o varai no ai voie che a vivedin cence savê ce che a àn daûr, tal lôr DNA. Parcè che disinsi la veretât, nô o sin cussì, tal ben o tal mâl, ma o sin furlans, e no ai voie che dute cheste frenesie nus fasi dismenteâ cui che o sin.

Eco, cheste fieste e je par ricuardânus almancul une volte ad an cui che o sin e ce che o sin stâts, parcè che no je vere che no podaressin tornâ a sedi chê int che par secui e à simpri tignût dûr, sot di parons crudêi, di invasôrs forescj e di taramots disastrôs. Nus àn staronzâts di ogni bande, tal teritori, te lenghe, te scuele e vuê... te cussience.

Pensìn a dute chê int che e à fat tant par nô, par che no si pierdedin, che e à scrit libris, che e à scombatût, che e à lavorât, che e à sufiert...no stin a permeti che dute cheste bataie e sedi stade di bant.

Eco, cheste fieste jo le dedichi a lôr, e cun cheste zornade ur dîs grazie, par vêmi fate deventâ cemût che o soi vuê.

Oms di tiere

2010-03-26T17:10:00.004+01:00

Ancje vuê o soi stade a presentâ il video Oms di tiere (Uomini di terra, zirât di Massimo Garlatti Costa) inte scuele e in particolâr in chê di Sedean; lis voltis prime o jeri stade a Cjasteons di Strade e Flaiban, dentri di chel progjet clamât Progetto Protostoria, metût in pîts di ben 11 comuns interessâts de presince dai cjastelîrs.
Pardabon une bielissime esperience, no la prime par me a scuele cui fruts, che mi à entusiasmade! O speri di vê mote la cussiençute di cualchi frut e di vêlu stimolât a interessâsi a la archeologjie, come che a àn fat cun me cuant che o jeri piçule!
Us ricuardi ancje la serade finâl ai 8 di Avrîl a Sedean, dulà che si presentarà dut il Progjet e si proietarà il documentari di Massimo, a prest!

Evoluzion a Triest

2010-03-21T20:34:00.003+01:00

Interessante mostre su Charles Darwin a Triest, in particolâr al Science Centre Immaginario Scientifico di Grignan, fint ai 30 di Mai dal 2010. La visite si davuelç midiant di multivisions che a scorin lis imagjins sul percors sientific che al à puartât il grant ricercjadôr a formulâ la sô famose teorie su la evoluzion. La mostre si pues lâ a viodile dome di domenie, des 10.00 aes 20.00. Par info clamait chi: 040/224424.

10.000!

2010-03-17T18:37:00.001+01:00

GRACIIS A DUCJ!!

Faraon cence pâs

2010-03-13T18:59:00.004+01:00

Dopo 88 agns de scuvierte de sô tombe, dopo agns di studis, di ipotesis, di analisis e teoriis la mumie di Tutankhamon no cjate inmò pâs; di fat e je vignude fûr une gnove scuvierte daspò altris analisis efetuadis sul so dna, o ben che il faraon-frut (faraone-bambino, par vie de sô zovine etât cuant che al è muart) al sarès nassût daûr di un rapuart incestuôs. Cheste teorie azardade, ma che e podarès cjatâ fonde par vie dal fat che in chê epoche i rapuarts tra personis de stesse famee regâl a jerin vonde difondûts, e je stade proferide dal archeolic egjizian Zahi Hawass, vice ministri de Culture dal 2009 e segretari gjenerâl dal Consei superiôr pes antichitâts dal Cairo. Us zonti il link cu la notizie interie, buine leture!
(inte foto la sô mumie...ce biel che al è!)

Sgarfant...te farcadice!

2010-03-01T17:46:00.005+01:00

La mê amie Stefania di Viluce mi segnale chest biel apontament organizât de pro loco di Ruvigne (www.prolocoragogna.it): sabide ai 6 di Març inte Sale teatrâl comunâl a lis 20.45 al vignarà mostrât il video-document Farcadice:diari di viaç di Luca Peresson e Carlo Della Vedova, une cjalade cuntun voli speciâl a lis comunitâts di emigrants in Argjentine, Belgjiche e Canadà. La serade e sarà ocasion ancje par scoltâ biele musiche e viodi i fruts de scuele medie di Ruvigne che a recitaràn.
Lait sul sît de pro loco par viodi il program de serade.

Inmò Aquilee

2010-02-21T23:06:00.003+01:00

Une altre scuvierte a Aquilee, cheste volte si trate di une bare di len, cuntun riviestiment in lamine di plomp intal interni (carateristiche riscontrade soredut in ambit orientâl) e somearès datade al II-III secul dopo Crist. Il rinveniment al è stât fat in localitât Morone, dongje de citadine romane, ma ancjemò no si sa ce che al è dentri te casse, e si spere duncje di cjatâ, dilà dai vues, ancje elements di furniment.
Stin in spiete! =)

Aquilee etrusche?!?!

2010-02-13T13:32:00.005+01:00

Ma vêso let chestis declarazions de Bertacchi, archeolighe e za diretore dal museu archeologjic di Aquilee?! La studiose e à ipotizât une presince etrusche inte citadine romane studiant dai reperts che i son stât "recapitâts" a cjase intune maniere misteriose; des ultimis gnovis al somearès che i reperts a sedin origjinâi e duncje lis ipotesis a son viertis a ogni pussibile interpretazion! Par savênt di plui fracait a chì e chi! Si vierzie une gnove pagjine di storie furlane?!?!?!

Didatiche a Paestum

2010-02-11T15:08:00.007+01:00

Sul Messaggero di vuê e je une biele notizie di interscambi culturâl: i liceus "Marinelli", "Stellini" e "Copernico" di Udin a parteciparan al "Progetto Paestum" cul sostegn de Societât Furlane di Archeologjie. Cussì un grup di students, cui insegnants, i socis de societât e trê students di archeologjie de universitât a laran de fin di Mai fint ai prins di Jugn inte localitât campane par contribuî al mantigniment des struturis archeologjichis. Une biele maniere par sensibilizâ i zovins su la impuartance dai bens culturâi e dal lôr mantigniment. O zonti dome un parê personâl: parcè chestis iniziativis no son plui frecuentis e a cjapin dentri ancje i sîts storics-archeologjics locâi?
(inte foto il templi di Poseidon a Paestum)

Mostre di...pês!

2010-01-27T22:10:00.003+01:00

Us segnali cheste mostre interessante a San Vît dal Tiliment sui pês inte antichitât, e in particolâr te ete romane, cun reperts che a rivin di vilis rustichis dal sanvitês e de zone di Cjasarse, conservâts intal museu di San Vît e intal Museus Civics di Udin. In mostre ancje un biel esemplâr di pês di staderie in bronç a forme di cjâf di femine scuviert a Zui.

Il Cjistiel di Ruvigne

2010-01-23T17:40:00.005+01:00

Vuê o ai stât a visitâ il cjistiel di Ruvigne cuntune vuide "speciâl"! La mê coleghe Stefania (di Vile, tocje specificâ ben senò si ufindin di ches bandis!) difat nus à compagnât a viodi il borc di San Pieri, dulà che o ai podût cognossi un pocje di storie dal gno teritori, parcè che, come che al sucêt dispes, lis robis lis vin dongje e no lis viodìn! Sdrumât di cetancj taramots il borc al è stât plui voltis tornât a fâ sù, fint a la ultime ristruturazion che e je inmò in cors; nus contave Stefania che in chest bielissim contest al vignarà un centri culturâl, cun spazis espositîfs, salons par riceviments e cerimoniis, cence contâ che al è intune suaze naturâl meraveose! Eco di fat ce che si pues viodi di lassù (inte foto).
Une visite che us consei pardabon di fâ!

Pai amîs furlans intal forest!

2010-01-16T16:14:00.004+01:00

Biele iniziative di Ente Friuli nel mondo in colaborazion cu la Societât Furlane di Archeologjie, par dâ la oportunitât ai furlans intal forest di tornâ in Patrie e visitâ la lôr tiere in maniere "alternative", cun spirit archeologjic! Il tiermin pe presentazion des domandis di partecipazion al è il 28 di Fevrâr 2010.
Ve ca il link!

P.S. Grazie a Daniele pe segnalazion =)

Tombis medievâls

2010-01-06T13:41:00.004+01:00

Si vierç ben l'an, o miôr, si è sierât ben il 2009, stant che une grande scuvierte e je stade fate propi la vilie di Nadâl a San Canzian dal Lusinç, sot de glesie di San Proto (inte foto). A son vignûts fûr di fat 2 scheletris, un di om e un di femine, datâts a la ete basse medievâl (la glesie di fat e je stade fate sù intal secul XV), periodi no masse siôr di scuviertis pal Friûl, che e rint inmò plui impuartante la scuvierte di San Canzian. Us met il link par lei par intîr la gnove.

Bon...gnûf principi!

2010-01-04T20:44:00.004+01:00

O soi tornade!
Cence dâus tantis spiegazions us dîs dome che il gno blog mi è mancjât pardabon, la voie di scrivi, di informâmi, di condividi cun altris lis mês esperiencis e lis mês opinions mi àn sburtât a tornâ a cjapâ in man cheste mê "creature". No par ultim in tiermins di impuartance mi à fate ancje rifleti ce che Andrea mi veve scrit intal ultin post prime di sierâ, o ben che dut ce che al è di furlan al è un pecjât che al sieri e alore...BENTORNâTS A DUCJ!!! =D

mandi

2009-06-04T13:17:00.003+02:00

Par cumò o voi, cun displasê. O speri che al sedi un moment, ma no rivant a stai daûr cun continuitât mi somee plui just sierâlu, almancul par un pôc. Grazie a ducj chei che mi àn seguît fint cumò. Maman

Gnove scuvierte a Luxor

2009-05-21T09:47:00.002+02:00

La mission taliane a Luxor (Egjit) e à discuviert un gnûf tesaur inte tombe di Harwa: un grant basrilêf cuntune dance funebre, 4 mumiis, di cui 2 ben conservadis e cun olmis di aur su la muse e sul cuarp, e un ritrat funerari piturât suntune taule di len dal II secul dopo di Crist che al mostre un zovin cun bafs, toghe e mantel.
Trops tesaurs inmò di discuvierzi!

Storie e archeologjie intal comun di Maian

2009-05-19T16:02:00.000+02:00

L'aministrazion comunâl di Maian e à inmaneât un bielissim programe culturâl cun escursions intal teritori par discuvierzi i lûcs e i paesagjios; cun di plui si tignaràn, inte Sale dal Consei dal Palaç Comunâl, incuintris cun esperts di archeologjie e storie che nus spiegaràn chestis evidencis. Si tache joibe ai 21 aes 20.45 cuntun incuintri dal titul "Dalla Protostoria al Medioevo", percors storic culturâl vie par i ritrovaments archeologjics intal Comun di Maian, tignût des archeolighis Tiziana Cividini e Chiara Magrini.

La cunvigne di toponomastiche

2009-05-18T15:53:00.004+02:00

Sabide la cunvigne di toponomastiche a Branc e je lade ben, i intervents a son stâts interessants e la coordenadore, dopo un prim moment di "panic", e je lade vie avonde ben (almancul cussì mi àn dite!). Prossim apontament doman di sere aes 20.30 pal intervent "Par une ricercje archeologjiche dal teritori: i rilevaments 4D" par cure di Ivano Sebastianutti dal comun di Tavagnà. Us spieti!
Inte foto cun me i relatôrs Filippo Rosset e Benvenuto Castellarin.

toponomastiche a Branc

2009-05-15T12:52:00.004+02:00

Vuê aes 18.30 si vierzin i lavôrs de setime cunvigne di toponomastiche a Branc di Tavagnà cu la scree de mostre " La Panarie' 1924-1931. Lis cartulinis di Giovanni Fiorini" cu la presentazion di Gisella Fiorini. Po dopo la presentazion dal sît internet "Fotografie e teritori", par cure di Franco Martelli Rossi.

Il divorzi di Indrì VIII

2009-05-13T10:50:00.005+02:00

Interessant articul vuê sul Corîr suntun document ecezionâl: finalmentri publiche la pergamene dal 1530 indiriçade dai Pari di Ingletiere al pape Clement VII par l' anulament dal matrimoni tra Indrî VIII e Catarine di Aragone par podê sposâ Ane Bolene: leieit a chì.

Cunvigne di toponomastiche

2009-05-09T12:29:00.003+02:00

Dai 15 ai 24 di Mai al Centri Sociâl di Branc di Tavagnà si davuelzarà la setime cunvigne di toponomastiche locâl. Sabide 16 o fasarai di coordenadore ai varis intervents dai relatôrs, cun inizi aes 15. Us spieti! =)
Par viodi miôr la locandine fracait su la imagjin

Scuele taliane

2009-05-07T11:17:00.011+02:00

O ai un grant displasê, ma ancje une grande rabie. Chest an, inte Universitât dal Friûl, pai students iscrits al cors di lauree in Conservazion dai Bens Culturâi e Archeologjie a saràn atîfs dome i sgjâfs didatics di Aquilee. Gjavâts chei medievâi, chei mediorientâi e chei protostorics. Inutil stâ chi a spiegâ il parcè. O jerin une des universitâts cun plui ufierte didatiche, une ponte di ecelenze in chest cjamp...ce avilizion. Chê altre dì o soi lade a fevelâ cu la diretrice de scuele medie di Basilian par proponi il gno laboratori didatic di archeologjie. Dopo l'entusiasim iniziâl pe biele ativitât, la solite rispueste: no vin bêçs. Ma cemût si fasie a vivi intun paîs che al gjave i bêçs ai zovins e ai students, a lis scuelis, a la culture! Jo no lu aceti!

Inte foto: la scuele taliane

989...

2009-05-06T18:13:00.003+02:00

Cunvigne

2009-05-05T12:08:00.003+02:00

Doman ai 6 di Mai in tor Puarte Vilalte aes 18 interessant incuintri cul prof. Lorenzo Braccesi, docent universitari a Vignesie e Padue, sul teme "Il confine alle Alpi. Dall'Italia augustea all'Italia risorgimentale".

Patrimoni artistic dal FVG intun click

2009-04-26T19:39:00.003+02:00

Doman ai 27 di Avrîl des 10.00 aes 12.30 lì dal Parc Scientific e Tecnologjic di Udin "L. Danieli" in vie Linussio 51 l'Universitât dal Friûl e Friuli Innovazione a presentin i risultâts dal prin an di ricercje su la informatiche pai Bens Culturâi. Lait a viodi a chì pal program.

2009-04-22T20:09:00.003+02:00

Mi ricuarde la Societât Filologjiche Furlane che vinars ai 24 di Avrîl a Vile Manin di Passarian e sarà inaugurade la mostre "Ugo Pellis 1882-1943. Il Friuli nelle immagini" che e durarà fint ai 7 di Lui 2009.
Ve chì i oraris:
martars- vinars 14.00-19.00
sabide-domenie 10.00-19.00
lunis sierât
ingrès libar

Pieri Pauli Pasolini

2009-04-21T07:22:00.000+02:00

Ai 23 di Avrîl il prof. Roberto Dapit de Facoltât des Sciencis de Formazion Primarie de Universitât di Udin al tignarà dai seminaris su la figure di Pieri Pauli Pasolini, ve chì il link cui programs.

XX agns de SFA

2009-04-19T10:20:00.004+02:00

Dai 18 ai 26 di Avrîl, des 17 aes 19 la tor di Puarte Vilalte e restarà vierte in ocasion de mostre fotografiche pai vincj agns di ativitât de societât, cun fotos di events, aveniments e iniziativis de SFA e des sôs sezions. Auguris! =)

Cjstiei vierts

2009-04-18T09:58:00.003+02:00

Vuê e doman podìn lâ a visitâ i cjistiei de regjon, vierts in ocasion de zornade "castelli aperti", program organizât dal consorzi pe Salvaguardie dai Cjistiei Storics dal Friûl Vignesie Julie.
Par info: www. consorziocastelli.it

Apontaments

2009-04-15T15:27:00.004+02:00

Us segnali doi apontaments di lâ a sintî:

- doman ai 16 di Avrîl aes 20.30 lì de Sale don Attilio Della Mora intal oratori di San Canzian dal Lusinç, presentazion dal libri "Torri di Porta Aquileia" a cure de autrice Desiree Dreos.

- Simpri doman aes 20.30 lì de biblioteche a Codroip la dott.re Diana Bitto e tratarà il teme: "La scrittura dei numeri dalla preistoria al medioevo".

Lis olmis dal dinosaur

2009-04-14T07:00:00.000+02:00

Bielissim zîr in moto îr, judât ancje di une grandiose zornade di soreli! O ai aprofitât cussì di viodi puescj de nestre regjon che al jere un grum che no viodevi, la zone di Pinçan, Barcis, Claut e la piçule frazion di Lesis, di dulà che partìs la stradute blancje che e puarte a un straordenari ritrovament, lis olmis di un dinosaur di 215 milions di agns indaûr! Di lâ a viodi! =)

Pasche e pascute...

2009-04-13T09:19:00.004+02:00

Buine Pasche e pascute a ducj! =)

Imperatîf...vinci!

2009-04-09T15:16:00.003+02:00

Dopo cualchi zornade dulà che mi soi un tic sierade in silenzi (mi sintivi di tasê par rispiet, no mi lave di scrivi nuie), al è vignût il moment di tornâ a soridi un pôc, e nuie di miôr che sfogâsi un tic sberlant tal stadio (intal câs di usgnot a cjase dal Gian!) =D Cun di plui sul MV di vuê une dichiarazion "shock" di Fabio Quagliarella: che se o passìn il turno di Uefe al va in television e al lei une poesie par furlan! Alore jo o tifi ancjemò plui fuart: FUARCE UDIN!!! =)

O soi dongje...

2009-04-06T15:26:00.002+02:00

O soi dongje cul cûr e cul pinsîr...

Mostre sui Langobarts

2009-04-04T09:00:00.000+02:00

Fint ai 7 di Jugn o podês lâ a viodi la mostre dal titul "I Langobarts" di Mario Micossi inte glesie di Sante Marie a Cividât.
Oraris: Vinars 16.00 – 19.00; Sabide, domenie e festîfs 10.00 –12.30 / 15.00 – 19.30.

Buine fieste de Patrie!

2009-04-03T00:05:00.000+02:00

Buine fieste a ducj i furlans, cu la sperance che la nestre identitât no vadi pierdude!

Pagjine Marilenghe

2009-04-01T22:04:00.003+02:00

Vuê il Messaggero Veneto al à proponût la pagjine Marilenghe, curade de Societât filologjiche furlane.
O ringrazii la Sff e Sonia Sicco che e à scrit un toc dedicât ai blogs par furlan e mi à clamât par domandâmi une opinion a rivuart.
Tal prin coment us met l'articul. =)

Pe Patrie

2009-03-31T20:18:00.002+02:00

Us segnali chescj apontaments inmaneâts de Filologjiche in ocasion de fieste de Patrie dai 3 di Avrîl:

Comun di Codroip

Provincie di Udin

Societât Filologjiche Furlane

Fieste de Patrie dal Friûl, ai 3 di Avrîl dal 2009

Codroip - Biblioteche Civiche Don Gilberto Pressacco

Dai 3 ai 10 di Avrîl proiezions pes scuelis
- pai fruts des Scuelis primariis Omenuts vol. 4. Il mont des ruedis, carton animât par furlan realizât de Societât Filologjiche Furlane
- pai arlêfs des Scuelis mediis Friûl viaç te storie: des origjinis ae fin dal stât patriarcjâl, documentari realizât de Provincie di Udin

Joibe ai 2 di Avrîl aes siet sot sere
Scree de mostre E nas une lenghe Nasce una lingua The birth of a language
Consegne de Costituzion de Republiche Taliane voltade par furlan ai zovins di Codroip che a àn a pene finît 18 agns
In serade, conference su lis potenzialitâts de marilenghe tant che mieç di comunicazion moderni e creatîf: proiezion di doi video musicâi dal grup codroipês Jonokognòs cu la regjie di Marco DAgostini e coment dai fumuts 3 di Avrîl e La disfide di Spilimberc dal disegnadôr di Bertiûl Luca Malisan

Vinars ai 3 di Avrîl aes vot e mieze di sere
Conference Napoleon a Codroip: la bataie dal Tiliment par cure di Paolo Foramitti inte suaze dai incuintris di argoment storic Al jere une volte

O sês ducj invidâts a partecipâ.

Cjarlin centri culturâl par 3 dîs

2009-03-26T17:48:00.004+01:00

Vuê sul MV un biel articul dulà che si fevele dal impuartant incuintri internazionâl di archeologjie che si tignarà doman, sabide e domenie a Cjarlin, dal titul "Late Roman Glazed Pottery in Carlino and in Central-East Europe: production, function and distribution"...tant l'inglês lu savês no? =)

O soi tornade...sul gjornal!

2009-03-25T20:12:00.005+01:00

Ve chì che o soi di gnûf! Cumò o soi un tic plui abronzade che no te foto...=)
Us segnali chest articul dal MV di vuê su la mostre des Grovis di Basilian che us vevi za fevelât: lait a viodi il prin coment.
O vês timp inmò fint domenie par lâ a viodile!

Inte foto: jo dongje de Cividini e la assessore ae culture di Basilian D'Avena Mariagrazia.

O voi in feriis!

2009-03-14T18:52:00.004+01:00

Mandi a ducj! O voi une setemane a suiâ i vues de umiditât intal cjalt!! =) Si viodìn ca di 8 dîs!

e vie no...

2009-03-10T21:40:00.004+01:00

O soi simpri plui sconcertade a sintî in ce condizions che o sin oramai cu la universitât (no dome dal Friûl, ma jo o vîf in particolâr cheste realtât).
Martars in biblioteche di storie in Palaç Antonini o vin fate une riunion tra students, cu la presince ancje di rapresentants dal ateneu, su la riduzion dai oraris des bibliotechis, a seguit oviamentri dai tais proviodûts (ancje) pe istruzion. Al à fevelât par prin il delegât dal Retôr, il prof. Ludovico Rebaudo, spiegantnus la reâl situazion economiche de universitât. Cualchi dât tant par capîsi: cumò come cumò la universitât di Udin e jê in deficit di 8 milions di euros (!), che a deventaràn 11 milions entri il prossim an. Oramai o savìn che il nestri ateneu al è sotfinanziât dal 1992, creant duncje cheste situazion di emergjence.

Lis primis risorsis a jessi duncje tajadis a son stadis propit lis bibliotechis (pont fondamentâl di studi e ricercje par un student...) sedi in oraris che in materiâl; ven a stâi: cun il 16 di Fevrâr i oraris si son ridots a 40 oris setemanâls (un student lavoradôr cuant podial lâ a reperî i libris se dopo des 17 al ciate sierât?), cun di plui no podaràn jessi comprâts plui che tancj libris e ancje rivistis (inzornaments, ultimis ricercjiis...il mont de culture al è in continue evoluzion!). Insome, une situazion no dome di discomut, ma ancje di involuzion culturâl; par une universitât nassude a pene 30 agns indaûr, za jessi in chestis condizions...

Tra i varis intervents, sedi dai students che dai rapresentants (a jerin presints ancje il preside de facoltât di Letaris prof. Tabarroni e il diretôr de biblioteche di Storie prof. Zannini) e je vignude fûr cualchi propueste; la plui votade e je stade chê di meti in pîts un grup di students volontariis che si metaràn a disposizion par cuvierzi lis oriis di sieradure, ufrìnt distess il servizi di consultazion libris. Pe serie: dopo 1200 euros di tassis ad an...ma o ai di dî che la adesion e je stade alte, duncje sperìn che "par cumò" la situazion di emergjence si podedi risolvi in cheste maniere, in spiete di cualchi soluzion plui continuative.

Mostre a Basilian

2009-03-06T22:06:00.003+01:00

Vuê aes 17.30 o soi stade ae inaugurazion de mostre fotografiche sul sgjâf di Grovis a Basilian. Inte biele cornîs di Vile Zamparo, centri culturâl dal comun, e jê stade alestide cheste mostre, che e durarà fint al 29 di Març, realizade cun undis cuadris espositîfs, dulà che si ripercorin i 10 agns di sgjâf di cheste localitât. Grovis (il significât de peraule al è "grun di claps") in comun di Basilian, al confin cul comun di Merêt di Tombe, al è il sît che dal 1999 in cà al sta dant grancj e impuartants risultâts in evidencis archeologjichis, intun arc di timp comprendût tra il I secul prin di Crist e il VII secul dopo Crist, o ben fint te epoche Altmedievâl (chi in Friûl ta chest periodi o vevin za presincis langobardis). A esponi i risultâts des ricercjis a jerin lis dotoris Cividini, Maggi e Magrini, che a àn fint dal inizi segûit i lavôrs; al incuintri a àn partecipât ancje un rapresentant de Sovrintendince e la Bancje di Credit Cooperatîf di Basilian, il prin finanziadôr dai lavôrs. Il fint dal incuintri, tra l'altri, al jere ancje chel di cjatâ un acuardi tra ents e comun su la maniere di proseguî lis ricercjiis. Plui indevant us contarai di plui su chest impuartant e prometint sît!

An academic 2009

2009-03-04T14:03:00.000+01:00

Lunis ai 9 di Març aes 11 inaugurazion dal gnûf an academic in plaçâl Kolbe. Che al sedi un moment ancje di riflession su la situazion critiche dal nestri ateneu...

Mostre dal libri antîc

2009-03-02T13:35:00.005+01:00

Dai 13 ai 15 di Març, intal Palaç de Permanente a Milan, si davuelzarà la vincjesime edizion de Mostre dal Libri Antîc, apontament impuartant par ducj i apasionâts e colezioniscj. Inaugurazion ai 12 di Març aes 18.30.

Il diu dal soreli

2009-02-28T14:51:00.003+01:00

Îr si è vierte une mostre al Palaç Bricherasio di Torin dal titul Akhenaton faraone del sole, il faraon che al à istituît il cult di Aton, disc solâr, fasintlu deventâ uniche divinitât dal Regn. La storie dal faraon Akhenaton (Ehknaton-chel che al è util a Aton), omp di Nefertiti, e je une vore avincente, cun lui l'Egjit al passà agns di gambiaments e di contrascj, par vie de sô riforme "amarniane", stant che al impedì il cult di chei altris deis e la sierade dai templis. Ma forin ancje agns di rinovament culturâl e artistic. O vês timp par lâ a viodi la mostre fint al 14 di Jugn.

Sgjâfs estîfs

2009-02-27T13:46:00.003+01:00

Daûr segnalazion de Societât Furlane di Archeologjie us met a chì i programs dai sgjâfs estîfs che o podês svolzi come volontaris, par imparâ il lavôr di archeolic e cognossi miôr il nestri teritori (e no dome);

Paestum: dai 28 di Mai ai 6 di Jugn
Codroip-Cjastelîr de Gridiscjie: dai 28 di Jugn ai 24 di Lui (fûr di sabide e domenie)
Atimis-cjstiel superiôr: dai 28 di Jugn ai 24 di Lui (fûr di sabide e domenie)
Atimis-Sant Zorz: date e program di definî
Verzegnis-Cuel Mazeit: dai 27 di Lui ai 14 di Avost

Bagnarie-Amburgo

2009-02-24T13:30:00.002+01:00

Gnovis ricercjiis su teritori di Bagnarie, ancje cheste volte seguidis de Universitât di Amburgo su progjet de Roemische-Germanische Kommission di Francoforte sul Meno e dal Deutsche Institut di Archeologjie. Come che aromai si sa la zone e je interessade de presince di tracis romanis ma ancje langobardis. A lis ricercjiis a parteciparàn ancje il Museu di Udin e la Societât Furlane di Archeologjie. Ve chì il link cu la notizie.

Inte foto: piçule statue in bronç di Venere cjatade l'an passât a 'Sevean

Incuintris a Aquilee

2009-02-13T17:39:00.003+01:00

Interessants incuintris a Aquilee su diviers temis cun la partecipazion di professôrs de Universitât dal Friûl; si tache ai 20 di Fevrâr aes 18 inte Sale Pasqualis cul intervent dal dott. Mirabile de Universitât di Reggio Calabrie che al presentarà un volum di studiis sul teatri di Taormine; e intervignarâ la dotore Rubinich de Universitât dal Friûl. Par chei altris apontaments fracait a chì!

Cunvigne su Qatna

2009-02-11T10:34:00.004+01:00

Miercus ai 18 di Fevrâr aes 18 inte Sale conference de Fondazion CRUP, vie Manin 15 a Udin, e sarà inmaneade la cunvigne in ocasion dai prins 10 agns de mission archeologjiche de Universitât dal Friûl a Mishrifeh (antighe Qatna), in Sirie. Cun di plui al vignarà ancje presentât il prim volum dai Studis Archeologjics di Qatna. A saràn presints, sore dai professôrs de Universitât, ancje il Preside, il President de Fondazion CRUP e il sindic Honsell.

Mandi...

2009-02-09T21:30:00.002+01:00

Gjeroglific a la SFA

2009-02-07T20:16:00.004+01:00

Ai 5 di Març al tache un minicors di 3 lezions di scriture gjeroglifiche inte sede de Societât Furlane di Archeologjie, in Tor di Puarte Vilalte; par cui che al è interessât us met chest link!

Cunvigne su Darwin

2009-02-05T22:28:00.007+01:00

Îr o ai stât a sintî la interessante cunvigne su Darwin tignude dal antropolic di fame mondiâl Ian Tattersall, inte bielissime sale dal Parlament di Udin. Dopo une prime introduzion al pinsîr di Darwin, su la sô teorie evoluzionistiche ilustrade bielzà 150 agns indaûr intal libri "La origjin des speciis", il specialist al è intervignût spiegantnus i soi ultims studis, proponint une sô interpretazion su la evoluzion: o ben, la sô idee e je che, inte evoluzion, umane tant che animâl, a son dai moments plui "lents" e moments dulà che lis speciis a si evolvin plui "di corse". Cun di plui, chescj "salts" evolutîfs a son ben visibii intai nestris gjens dulà che a son dai "rescj" di gjens di altris nimâi e bateris, prove inconfutabile che noaltris o derivin di formis di vite precedentis, e che o sin il risultât di un lavôr lunc milions di agns. Ce dî, un argoment une vore interessant e stimolant par cui che al vûl capî lis nestris lidrîs e il nestri straordenari procès evolutîf.

Va ca la mê interviste su RadioUno

2009-02-02T23:02:00.005+01:00

Come che us vevi dit, vuê o ai stât a RadioUno, ospit te trasmission "Vuê o fevelìn di..." di Antonella Lanfrit, che o ringrazii.
Ve ca la mê interviste.

Archeofurlane su Radio1

2009-01-30T14:55:00.004+01:00

O soi stade contatâde di Antonella Lanfrit di Rai Radio1 inte gnove trasmission radiofoniche par furlan "Vuê o fevelin di..." par un intervent sul teme de archeologjie; un cuart di ore dulà che o ai fevelât dal gno blog e dal gno pregjetut di laboratori didatic. O podarês scoltâmi lunis ai 3 di Fevrâr a lis 15.15 su la frecuence regjionâl FM 94.9.

Charles Darwin e la evoluzion umane

2009-01-29T10:00:00.000+01:00

150 agns indaûr al vignive dât ae stampe un dai libris che di plui a àn gambiât la muse de storie, "La origjin des speciis" di Charles Darwin. A Udin e vignarà ricuardâde cheste impuartantissime figure che tant nus à dât ai 4 di Fevrâr, a lis 18.00, lì dal Salon dal Parlament in cjistiel, cul contribût di un antropolic di fame mondiâl, Ian Tattersall. Apontament di no pierdi!

Auguris!

2009-01-28T19:11:00.003+01:00

Tancj auguris a une persone speciâl...! =)

Tesaurs d'Egjit

2009-01-26T11:02:00.003+01:00

Bielissime mostre a Torin, uniche tappe in Italie, di passe 500 reperts dal Antîc Egjit, cjatâts a Alessandria, Canopo e Heracleion, sul delte dal Nilo, cumò sprofondadis sot 6 metros di aghe. Dai 7 di Fevrâr ai 31 di Mai ae Venaria Reale. Par dutis lis informazions cjalait a chì e chì.

La Mariutine

2009-01-22T16:32:00.004+01:00

Come za acenât timp indaûr jo e la mê coleghe Francesca ( inte foto cun me intant che o sgjavìn!) o sin daûr a promovi il nestri progjet di laboratori di archeologjie par fruts; si trate di un cors di ativitât didatiche sedi teoriche che pratiche sul mont de archeologjie, cun esperiments in sgjâfs simulâts, in te costruzion di mosaics o inte piture come che si faseve une volte. Cun di plui il laboratori al sarà disvilupât sedi par talian sedi par furlan, par dâ une ofierte didatiche plui ampie. Cumò o stin vint i prins contats par lavorâ in cualchi centro estîf, sperant che cheste esperience nus puarti a pandile ancje in te scuelis cul mês di Setembar. O aprofiti ancje par ringraziâ Christian pe segnalazion su so blog! Sperìn ben!! =)

Concors pai bb. cc., une comedie?

2009-01-20T08:00:00.000+01:00

O vareis let o sintût in chescj dîs la polemiche vignude fûr in merit al concors nazionâl dal Mibac (Ministeri pai Bens e Ativitâts Culturâls); dut il mont de archeologjie si è mot cun indignazion par il svolziment des provis preseletivis e ancje par la grave disorganizazion dal concors intîr. Si lei di int rivade a jentrâ ancje cence recuisîts (...), de difusion di domandis sbaliadis e confusionadis, di criteris di valutazion assurts, di disparitât di timps pe preparazion de prove... Par chest l'ANA (Associazion Nazionâl Archeolics) e la CIA (Confederazion Italiane Archeolics) a àn domandât di retificâ il concors ma nuie di fâ, il ministri Bondi nol à dât rispueste. Jo personalmentri o cognòs cualchidun dai mei coleghis che a son stâts a fâ il concors e a sintî ce razze di domandis che a jerin al jere di sgrusulâsi! Mi spiegaiso a ce che mi covente a mi archeolighe savè equazions e disequazions, nozions su codic DNA e RNA, petroli e cacau?!? Robis di mats. E dopo jo mi incazzi come une bestie cun chei che mi domandin:"Ma cu la tô lauree dulà âstu di lâ a vore? In Egjit?" Mah, viodint cemût che a van lis robis chi in Italie forsit o ai cualchi sperance in plui di lavorâ cun Zahi Hawass!

L'aiar

2009-01-19T18:24:00.003+01:00

5000!

2009-01-15T07:31:00.000+01:00

Ustie! Rît e scherçe o sin rivâts a 5000 contats!! Graziiiiiissssss! =)

Il gotic intal Patriarcjiât di Aquilee

2009-01-14T11:20:00.000+01:00

Us ricuardi la mostre lì de glesie di Sant Francesc a Udin, che fint dal '300 e je stade abelide di impuartantis pituris, vuê restauradis e tornadis ae lôr bielece. Un biel articul su la mostre podeis leilu a chì.